မွန်ပြည်နယ်အတွင်း တန်းခိုးကြီး ဘုရားစေတီပုထိုးများစွာတည်ရှိသည့်အနက်မှ သထုံမြို့တွင် တည်ထားကိုးကွယ်တော်မူသော ရွှေစာရံစေတီတော်မြတ်ကြီး လုံးတော်ပြည့် ရွှေသင်္ကန်းဆက်ကပ်ရန် အတွက် ဒုတိယအကြိမ် အလှူငွေပေးအပ်လှူဒါန်းခြင်း အခမ်းအနားကို ဇန်နဝါရီလ ၁၅ ရက်နေ့၊ နံနက်ပိုင်းက သထုံမြို့ သုဝဏ္ဏဘူမိ သာသနာ့ဗိမ္မာန်တော်၌ကျင်းပပြုလုပ်ခဲ့ရာ ဆရာတော်၊ သံဃာတော် အရှင်သူမြတ်များ၊ မွန်ပြည်နယ် ဝန်ကြီးချုပ် ဦးဇော်လင်းထွန်း၊ ပြည်နယ်ဝန်ကြီးများ၊ အလှူရှင်များတက်ရောက်သည်။
ဦးစွာ ပြည်နယ်ဝန်ကြီးချုပ်မှ ရွှေစာရံစေတီတော်မြတ်ကြီးကို ဖူးမြော်ကြည်ညို၍ ပန်း၊ ဆီမီး၊ ရေချမ်း ကပ်လှူပူဇော်သည်။
ဆက်လက်ပြီး စေတီတော်မြတ်ကြီး လုံးတော်ပြည့် ရွှေသင်္ကန်းဆက်ကပ်ရန် အတွက် ဒုတိယအကြိမ် အလှူငွေပေးအပ်လှူဒါန်းခြင်း အခမ်းအနားကိုကျင်းပပြုလုပ်ရာ အခမ်းအနားကို နမောတဿ သုံးကြိမ်ရွတ်ဆို ဖွင့်လှစ်၍ သထုံမြို့၊ ဓမ္မမေဒနီ စာသင်တိုက်ကြီး၏ ဦးစီးပဓါနနာယက ဆရာတော် ဘဒ္ဒန္တ ဉာဏောသူရိယ ဘိဝံသ ထံမှ ငါးပါးသီလတော်မြတ်အား ခံယူဆောက်တည်ခဲ့ကြပြီး သံဃာတော်အရှင်သူမြတ်များ ရွတ်ပွားသရဇ္ဈာယ်မူသော ပရိတ် တရားတော်များ နာယူကြည်ညို၍ ဆရာတော်အရှင်သူမြတ်များထံ ပြည်နယ်ဝန်ကြီချုပ်နှင့် ပြည်နယ်ဝန်ကြီးတို့မှ လှူဖွယ်ဝတ္ထုပစ္စည်းများ ဆက်ကပ်လှူဒါန်းခဲ့ကြသည်။
ထို့နောက် စေတီတော်မြတ်ကြီး လုံးတော်ပြည့် ရွှေသင်္ကန်းဆက်ကပ်ရန် အတွက် ဒုတိယအကြိမ်အဖြစ် လူဒါန်းရရှိငွေ အလှူငွေကျပ် (၃၁၉၅) သိန်းအား အလှူရှင်များကိုယ်စား ပေးအပ်လှူဒါန်းမှုအပေါ် ရွှေစာရံစေတီတော် ဘဏ္ဍာတော်ထိန်း ဂေါပကအဖွဲ့မှ လက်ခံရရယူခဲ့သည်။
အဲဒီနောက် ပြည်နယ်ဝန်ကြီးချုပ်နှင့် တာဝန်ရှိသူများက အလှူရှင်များအား ဂုဏ်ပြုမှတ်တမ်းလွှာများ အသီးသီးပြန်လည်ပေးအပ်ခဲ့ကြပြီး လှူဒါန်းမှုအစုစုတို့အတွက် အနုမောဒနာ တရားနာယူ ကြည်ညို၍ ရေစက်သွန်းချ အမျှ ပေးဝေခဲ့ကြကာ အခမ်းအနားကို “ဗုဒ္ဓသာသနံ စိရံတိဋ္ဌတု”သုံးကြိမ်ရွတ်ဆိုဆုတောင်း၍ ရုပ်သိမ်းခဲ့သည်။
အဲဒီကမှ တစ်ဆင့် ပြည်နယ်ဝန်ကြီးချုပ်နှင့် အဖွဲ့သည် သထုံမြို့၊ စိုက်ပျိုးရေးသိပ္ပံကျောင်းသို့ ရောက်ရှိခဲ့ကြပြီး ၂၀၂၂ – ၂၀၂၃ ဘဏ္ဍာရေးနှစ်တွင် အသစ်တည်ဆောက်သည့် မွေးမြူရေးသိပ္ပံကျောင်း (၂) စာသင်ဆောင်၊ သုတေသနဆောင်၊ လက်တွေ့သင်ကြားရေး ဆောင်၊ ကျောင်းသားအိပ်ဆောင်၊ ဝန်ထမ်းဆောင်နှင့် ဆက်စပ်အဆောက်အဦများ တည်ဆောက်ပြီးစီးနေမှု အခြေအနေတို့အား ကြည့်ရှုစစ်ဆေးခဲ့သည်။
အဲဒီနောက် တာဝန်ရှိသူများနှင့် တွေ့ဆုံ၍ စိုက်ပျိုးရေး၊ မွေးမြူရေး သိပ္ပံပညာရပ်များကို စာတွေ့၊ လက်တွေ့ လေ့ကျင့်သင်ကြားပို့ချပေးနိုင်ရန်နှင့် သင်ကြားရေးနည်းစနစ်များကောင်းဖြင့် ကျွမ်းကျင်တတ်မြောက်သော ပညာရှင်များ မွေးထုတ်ပေးထုတ်ပေးနိုင်ရေး အလေးထား ဆောင်ရွက်ကြရန်၊ တည်ဆောက်ရေး လုပ်ငန်းများကိုလည်း အရည်အသွေးပြညံ့မီစွာဖြင့် သတ်မှတ်အချိန်အတွင်း အချိန်မီ ပြီးစီးနိုင်ရေး ဆောင်ရွက်ကြရန် လမ်းညွှန်မှာကြားခဲ့သည်။
