နိုင်ငံ့စီးပွားမြှင့်တင်ရေးရန်ပုံငွေမှ ချောင်းဆုံမြို့နယ်အတွင်း စီမံကိန်းကျေးရွာများသို့ ချေးငွေထောက်ပံ့ပေးအပ်ပွဲအခမ်းအနားကို ဇန်နဝါရီလ ၁၇ ရက်နေ့၊ မွန်းလွဲပိုင်းက ချောင်းဆုံမြို့၊ ကျွန်းသာယာခန်းမ၌၊ကျင်းပပြုလုပ်ခဲ့ရာ မွန်ပြည်နယ် ဝန်ကြီးချုပ် ဦးဇော်လင်းထွန်း၊ ပြည်နယ်ဝန်ကြီးများ၊ တာဝန်ရှိသူများ၊ ဒေသခံ တောင်သူများ တက်ရောက်သည်။
အခမ်းအနားတွင် ပြည်နယ်ဝန်ကြီးချုပ်က မွန်ပြည်နယ်သည် စိုက်ပျိုး၊ မွေးမြူရေးကို အခြေခံသည့် ပြည်နယ်တစ်ခု ဖြစ်သည်နှင့်အညီ စိုက်ပျိုးရေး၊ မွေးမြူရေးလုပ်ငန်းများတိုးချဲ့ နိုင်ရန်နှင့် ထုတ်လုပ်မှုစွမ်းအား မြင့်မားလာစေရန်အတွက် သွင်းအားစု၊ ငွေကြေးအရင်းအနှီးနှင့် နည်းပညာများ စဉ်ဆက်မပြတ် ပံ့ပိုးဆောင်ရွက်ပေးလျက်ရှိကြောင်း၊ နိုင်ငံ့စီးပွားမြှင့်တင်ရေးရန်ပုံငွေမှ မတည်ထောက်ပံ့ငွေများကို
စိုက်ပျိုးရေး ကဏ္ဍများအနေနဲ့ နွေစပါး၊ ပဲမျိုးစုံ၊ နေကြာ၊ ရာသီပေါ်သီးနှံနှင့် ရော်ဘာသီးနှံ စိုက်ပျိုးလုပ်ကိုင်လျက်ရှိသော တောင်သူများနှင့် မွေးမြူရေးကဏ္ဍအနေဖြင့် ကြက်၊ ဝက် မွေးမြူရေးတို့အတွက် အရင်းမပျောက် မတည် လည်ပတ်ရန်ပုံငွေအား သက်သာသော အတိုးနှုန်းဖြင့်ထုတ်ချေးပေးနိုင်ရေး စီစဉ်ဆောင်ရွက် ပေးထားကြောင်း၊ စီမံကိန်း အကောင်အထည်ဖော် ဆောင်ရွက်ရာတွင် မြေပြင်အထိ အဆင့်ဆင့် ကြီးကြပ်၍ ချေးငွေများ အလေအလွင့် မရှိစေရေးနှင့် လုပ်ငန်းများ အမှန်တကယ် အောင်မြင်အောင် ဆောင်ရွက်ကြစေရေး အလေးထား ဆောင်ရွက်သွားကြရန် လိုကြောင်း၊ တောင်သူလယ်သမားများ၏ အခန်းကဏ္ဍကို တိုးတက်စေရန်နှင့် လုပ်ကွက်ငယ်တောင်သူများ၏ တစ်ဦးချင်းစီ ဝင်ငွေတိုးတက်လာစေရေး ဆောင်ရွက်ပေးလျက်ရှိသလို တစ်ဖက်ကလည်း တောင်သူများအနေဖြင့် စိုက်ပျိုးလုပ်ငန်းများ တိုးချဲ့လုပ်ကိုင်ဆောင်ရွက်ခြင်းဖြင့် ဒေသတွင်း စာနပ်ရိက္ခာဖူလုံမှုရှိစေရေး ဝိုင်းဝန်း ကြိုးပမ်း ဆောင်ရွက်ပေးကြရန်ဖြင့် အမှာစကားပြောကြားခဲ့သည်။
ထို့နောက် ပြည်နယ်ဝန်ကြီးချုပ်နှင့် တာဝန်ရှိသူများမှ စီမံကိန်း ကျေးရွာရှိ တောင်သူများအား နိုင်ငံ့စီးပွားမြှင့်တင်ရေးရန်ပုံငွေမှ စိုက်ပျိုး၊ မွေးမြူရေးစရိတ် ချေးငွေများ အသီးသီး ထောက်ပံ့ပေးအပ်ခဲ့ကြပြီး နိုင်ငံ့စီးပွားမြှင့်တင်ရေးရန်ပုံငွေနှင့် ဆောင်ရွက်သည့်ကျေးရွာများမှ တောင်သူများကိုယ်စား တောင်သူတစ်ဦးမှ ကျေးဇူးတင်စကား ပြန်လည်ပြောကြာခဲ့ကြသည်။
အဲဒီနောက် ပြည်နယ်ဝန်ကြီးချုပ်မှ တောင်သူများအား ရင်းရင်းနှီးနှီး လိုက်လံနှုတ်ခဲ့ကာ တောင်သူများ၏ လိုအပ်ချက်များကို ပေါင်းစပ်ညှိနှိုင်း၍ လိုအပ်သည်များကို ဖြည့်ဆည်းဆောင်ရွက်ပေးခဲ့သည်။
မော်လမြိုင် ပညာရေးဒီဂရီကောလိပ် ၂၀၂၂- ၂၀၂၃ ပညာသင်နှစ် ပညာရေးစုံညီပွဲတော် အခမ်းအနားကို ဇန်နဝါရီလ ၁၈ ရက်နေ့၊ နံနက်ပိုင်းက မော်လမြိုင် ပညာရေးဒီဂရီကောလိပ်၊ ပညာညီလာခန်းမ၌ ကျင်းပပြုလုပ်ရာ ပြည်နယ်ဝန်ကြီးချုပ်က မွန်ပြည်နယ်ရဲ့ တစ်ခုတည်းသော ဆရာအတတ်ပညာ ဖြန့်ဝေပေးရာ နေရာမှာ ပညာရေးဒီဂရီကောလိပ်ဖြစ်သည်နှင့် အညီ ဘက်စုံဖွံ့ဖြိုးတိုးတက်တဲ့ ပညာရေးစနစ်ဖော်ဆောင်မှုအတွက် ဘာသာရပ်အမျိုးမျိုး၊ သင်နည်းအဖုံဖုံနဲ့ စာတွေ့ လက်တွေ့ သင်ကြားလေ့ကျင့်ပေးလျက်ရှိကြောင်း၊ ပညာရေးမှာ အားထားရမယ့် ထူးချွန်တဲ့ ဆရာကောင်း၊ ဆရာမွန်၊ ဆရာချွန်များ ပေါ်ထွက်လာနိုင်လို့ နှစ်ထောင်းအားရလည်း ဖြစ်မိရသလို ပညာသင်နှစ်တိုင်း၏ ပညာရေးစုံညီပွဲတော်ကို အဓိပ္ပာယ်ပြည့်ဝစွာ ကျင်းပမှုအတွက်လည်း ဂုဏ်ယူဝမ်းမြောက်ပါကြောင်း၊ ဆရာ၊ ဆရာမ ကောင်းများ ဖြစ်လာကြမည့် မောင်၊ မယ်များအနေဖြင့် ပညာနဲ့စည်းကမ်းသာမက စိတ်ဓာတ် ကိုပါ ပြုပြင်မြှင့်တင်ပေးနိုင်မယ့် လေ့ကျင့်ပုံဖော်ပေးနိုင်မယ့် ဥယျာဉ်မှူး ကောင်းများ ဖြစ်ကြမယ်လို့ ယုံကြည် မျှော်လင့်မိပါကြောင်းဖြင့် အမှာစကားပြောကြားခဲ့သည်။
ထို့နောက် မော်လမြိုင် ပညာရေးဒီဂရီကောလိပ်၊ ကျောင်းအုပ်ဆရာမကြီး ဒေါ်ဝင်းသိင်္ဂီကျော်မှ ပညာရေးစုံညီပွဲတော်ကျင်းပပြုလုပ်ရခြင်းရည်ရွယ်ချက်အား ရှင်းလင်းပြောကြားခဲ့ကာ ပြည်နယ်ဝန်ကြီးချုပ်နှင့် တာဝန်ရှိသူများက ထူးချွန်ဆုရ ကျောင်းသူ၊ကျောင်းသားများအား ဂုဏ်ပြုဆုများ အသီးသီးချီးမြှင့်ခဲ့ကြခဲ့ကြသည်။
အဲဒီနောက် ပြည်နယ်ဝန်ကြီးချုပ်မှ ပညာရေးစုံညီပွဲတော်အတွက် အလှူငွေများပေးအပ်ခဲ့ပြီး ကျောင်းသူ၊ ကျောင်းသားလေးများ၏ တေးသီချင်းများ၊ တေးသရုပ်ဖော်များနှင့် အကအလှများဖြင့် ဖျော်ဖြေတင်ဆက်ခဲ့ကြမှုအပေါ် ကြည့်ရှုအားပေးခဲ့ကြသည်။
ဆက်လက်ပြီး ပြည်နယ်ဝန်ကြီးချုပ်နှင့် တာဝန်ရှိသူများသည် မော်လမြိုင် ပညာရေးဒီဂရီကောလိပ် ဘာသာရပ်ဆိုင်ရာ ပြခန်းအား ဖဲကြိုးဖြတ်ာဖွင့်လှစ်ပေခဲ့ကြပြီး ပြခန်းများအား လှည့်လည်ကြည့်ရှုအားပေးခဲ့ကြသည်။
မွန်ပြည်နယ်အတွင်း ဆောင်ရွက်မည့် တန် (၆၀) ကျ အဆင့်မြင့် ဆန်စက်တည်ထောင်နိုင်ရေးအတွက် လုပ်ငန်းညှိနှိုင်း အစည်းအဝေးကို ယနေ့နံနက်ပိုင်းက ပြည်နယ်အစိုးရဖွဲ့ရုံး၊ အောင်ဆန်းခန်းမ၌ ကျင်းပပြုလုပ်ရာ ဦးစွာ ရွှေမြိုင်စိုက်ပျိုးရေးနှင့် အထွေထွေစီးပွားရေး သမဝါယမအသင်း (အောင်သဇင်သမဝါယမအသင်း)၊ ဥက္ကဌ ဦးအောင်ဇော်ဦးမှ မွန်ပြည်နယ်တွင် တန် (၆၀) ကျ ဆန်ကြိတ်ခွဲစက် တည်ဆောက်ရန် ဆောင်ရွက်ထားရှိမှုနှင့် သမဝါယမအသင်းများနှင့် ပူးပေါင်းဆောင်ရွက်မည့် အစီအစဉ်များအား ရှင်းလင်းတင်ပြခဲ့ပြီး ပြည်နယ်ဝန်ကြီးချုပ်က မွန်ပြည်နယ်အတွင်း ဆန်ကြိတ်စက်ကြီးများ တည်ထောင်ခြင်းဖြင့် ဆန်နှင့် စိုက်ပျိုးရေးထုတ်ကုန်များကို အရည်အသွေးမီ ထုတ်လုပ်နိုင်ရေး အားပေးဆောင်ရွက်ရန်၊ ဒေသထွက်ကုန်များကို အခြေခံသည့် ကုန်ထုတ်လုပ်မှုလုပ်ငန်းများ အောင်မြင်စွာ ဆောင်ရွက်ခြင်းဖြင့် နိုင်ငံ့ စီးပွားမြှင့်တင်ရေးဆောင်ရွက်ကြရန်နှင့် အဆင့်မြင့် ဆန်စက်အား ကာလတိုအတွင်း မြန်မြန်ဆန်ဆန် တည်ထောင်နိုင်ရေးအတွက် သမဝါယမကဏ္ဍအနေဖြင့်သာမက ကဏ္ဍအသီးသီးအလိုက် လိုအပ်သည်များကို ဝိုင်းဝန်း ပူးပေါင်း ဆောင်ရွက်ပေးကြရန် လမ်းညွှန်မှာကြားခဲ့သည်။
အဲဒီနောက် တက်ရောက်လာသူများမှ ဖြည့်စွက်ဆွေးနွေး တင်ပြခဲ့ကြပြီး ပြည်နယ်ဝန်ကြီးချုပ်က လိုအပ်သည်များကို ပေါင်းစပ်ညှိနှိုင်းဆောင်ရွက်ပေးခဲ့သည်။
မွန်ပြည်နယ် ဒေသဆိုင်ရာ ခရီးသွားလုပ်ငန်းကော်မတီ အစည်းအဝေး အမှတ်စဉ် (၁/ ၂၀၂၃) အစည်းအဝေးကို ယနေ့ မွန်းလွဲပိုင်းက ပြည်နယ်အစိုးရအဖွဲ့ရုံး၊ အောင်ဆန်းခန်းမ၌ ကျင်းပပြုလုပ်ရာ မွန်ပြည်နယ် ဒေသဆိုင်ရာ ခရီးသွားလုပ်ငန်းကော်မတီဥက္ကဋ္ဌ ပြည်နယ်ဝန်ကြီးချုပ်က မွန်ပြည်နယ်အတွင်း အထင်ကရ တန်ခိုးကြီး ဘုရား၊ စေတီများ၊ သဘာဝပတ်ဝန်းကျင်အလှအပများနှင့် ယဉ်ကျေးမှု အမွေအနှစ်များရှိသဖြင့် ခရီးသွားလုပ်ငန်းဖွံ့ဖြိုးတိုးတက်ရန် အလားအလာကောင်းများ ရှိကြောင်း၊ သဘာဝကိုအခြေခံသည့် ခရီးသွားလုပ်ငန်းများအား ဖော်ဆောင်ပေးရန် လိုအပ်သလို ခရီးသွားဒေသများတွင် လုံခြုံရေးနှင့် ဘေးအန္တရာယ်ကင်းရှင်းရေးများကို ဦးစားပေး ဆောင်ရွက်ကြရန်လိုအပ်ကြောင်း၊ ခရီးသွားဧည့်သည်များ ဆွဲဆောင်နိုင်မည့် ခရီးသွားဒေသများတွင် သန့်ရှင်းသာယာလှပရေးကို အလေးထားဆောင်ရွက်ကြရန် လိုအပ်ပြီး ဟိုတယ်၊ တည်းခိုရိပ်သာများ၏ ပြယုဂ်များ ပိုမို ကောင်းမွန်စေရေး ဆောင်ရွက်ပေးကြရန်နှင့် ခရီးသွားလုပ်ငန်း ရေရှည်တိုးတက်ရေးတွက် လုပ်ဆောင်ပေးကြရန်ဖြင့် အမှာစကား ပြောကြားခဲ့သည်။
အဲဒီနောက် ပြည်နယ်ဟိုတယ်နှင့် ခရီးသွား ညွှန်ကြားမှုဦးစီးဌာန၊ ညွှန်ကြားရေးမှူး ဦးဇေယျာထွန်းမှ ပြည်နယ်အတွင်း ခရီးသွားလုပ်ငန်း ဖွံဖြိုးတိုးတက်ရေး ဆောင်ရွက်ထားရှိမှု၊ သတ်မှတ်စည်းကမ်းများနှင့်အညီ လိုင်စင်ထုတ်ပေးမှု အခြေအနေများနှင့် ပတ်သက်၍ ရှင်းလင်းတင်ပြပြီး ကော်မတီဝင်များမှ ဖြည့်စွက်ဆွေးနွေး တင်ပြခဲ့ကြမှုအပေါ် ပြည်နယ်ဝန်ကြီးချုပ်က လိုအပ်သည်များကို ပေါင်းစပ်ညှိနှိုင်း ဆောင်ရွက်ပေးခဲ့သည်။
မွန်ပြည်နယ်တွင် နိုင်ငံတကာအဆင့်မီ အပြည်ပြည်ဆိုင်ရာ လေဆိပ်စီမံကိန်းအတွက် မြေယာလျှော်ကြေးပေးချေနိုင်ရေး လုပ်ငန်းညှိနှိုင်း အစည်းအဝေးကို ယနေ့မွန်းလွဲပိုင်းက ပြည်နယ်အစိုးရဖွဲ့ရုံး၊ အောင်ဆန်းခန်းမ၌ ဆက်လက်ကျင်းပပြုလုပ်ရာ ပြည်နယ်ဝန်ကြီးချုပ်က မော်လမြိုင်မြို့အနီး နိုင်ငံတကာအဆင့်မီ အပြည်ပြည်ဆိုင်ရာ လေဆိပ်စီမံကိန်း အကောင်အထည်ဖော် ဆောင်ရွက်နိုင်ရေး မြေနေရာလျှော်ကြေးများတွက် သတ်မှတ်ကာလ ဘဏ္ဍာရေးနှစ်အတွင်း ပြီးပြတ်အောင် ဆောင်ရွက်ကြရမည် ဖြစ်ကြောင်း၊ လေဆိပ်စီမံကိန်း ဧရိယာအတွင်း မြေနေရာများအပေါ် အသုံးပြုသည့် မြေအမျိုးအစားအလိုက် ပေါ်မူတည်၍ မြေယာလျှော်ကြေး ပေးချေ ဆောင်ရွက်ကြရန်လိုကြောင်း၊ မြေယာလျော်ကြေးပေးချေခြင်းလုပ်ငန်းအား မြေယာစီမံခန့်ခွဲရေး ဥပဒေ၊ နည်းဥပဒေ၊ လုပ်ထုံးနည်းများနှင့်အညီ ဖြစ်စေရေး ဆောင်ရွက်ကြရန်နှင့် သက်ဆိုင်ရာဌာနများမှလည်း ပူးပေါင်းဆောင်ရွက်ပေးကြရန် လမ်းညွှန်မှာကြားခဲ့သည်။
ထို့နောက် လေကြောင်းပို့ဆောင်ရေး ညွှန်ကြားမှုဦးစီးဌာန၊ လေယာဉ်ကွင်းစံချိန်စံညွှန်းနှင့် စစ်ဆေးရေးဌာန(ခွဲ) ညွှန်ကြားရေးမှူး ဦးဇော်မင်းမှ နိုင်ငံတကာအဆင့်မီ အပြည်ပြည်ဆိုင်ရာ လေဆိပ်စီမံကိန်းအတွက် မြေယာလျှော်ကြေးပေးချေနိုင်ရေး ဆောင်ရွက်ထားရှိမှု အခြေအနေများနှင့် ပတ်သက်၍ ရှင်းလင်းတင်ပြခဲ့ပြီး ဌာနဆိုင်ရာ တာဝန်ရှိသူများမှ ရှင်းလင်းဆွေးခဲ့ကြမှုအပေါ် ပြည်နယ်ဝန်ကြီးချုပ်က လိုအပ်သည်များကို ပေါင်းစပ်ညှိနှိုင်း ဆောင်ရွက်ပေးခဲ့သည်။