မော်လမြိုင်၊ အောက်တိုဘာ ၈
မွန်ပြည်နယ်တွင် မျိုးဆက်သစ် အားကစားသမားကောင်းများ ပေါ်ထွန်းလာစေရေးနှင့် အားကစားကဏ္ဍ ဖွံ့ဖြိုးတိုးတက်စေရေးတို့ကို အလေးထားဆောင်ရွက်လျက်ရှိရာ အသက် (၁၆) နှစ်အောက် အမျိုးသား ချစ်ကြည်ရေး ခြေစမ်းဘောလုံးပြိုင်ပွဲကို ၂၀၂၂ ခုနှစ်၊ အောက်တိုဘာလ ၇ ရက်နေ့၊ ညနေပိုင်းက မော်လမြိုင်မြို့၊ ကျောင်းသားအားကစားကွင်း၌ ကျင်းပပြုလုပ်ရာ ပြည်နယ် ဝန်ကြီးချုပ် ဦးဇော်လင်းထွန်း၊ ပြည်နယ်ဝန်ကြီးများ၊ အားကစားဝါသနာရှင်များမှ မွန်ပြည်နယ် အသက် (၁၆) နှစ်အောက် အမျိုးသားဘောလုံးအသင်းနှင့် ကရင်ပြည်နယ် အသက် (၁၆) နှစ်အောက် အမျိုးသား ဘောလုံးအသင်းတို့ ချစ်ကြည်ရေး ခြေစမ်း ဘောလုံးအားကစား ယှဉ်ပြိုင်နေမှုအား ကြည့်ရှုအားပေးသည်။
မွန်ပြည်နယ်၊ အားကစားနှင့် ကာယပညာာကော်မတီမှ ဖွင့်လှစ်သည့် ဗိုဗီနမ်အားကစား သင်တန်း၊ သင်တန်းဆင်းပွဲ အခမ်းအနားကို ယနေ့နံနက်ပိုင်းက မော်လမြိုင်မြို့၊ ပြည်နယ်အားကစားခန်းမ၌ ကျင်းပပြုလုပ်ရာ ပြည်နယ်ဝန်ကြီးချုပ်က မျိုးဆက်သစ် လူငယ်များကို ဗလ(၅)တန်နဲ့ ဟန်ချက်ညီစွာ ဖွံ့ဖြိုးလာစေရန်အတွက် အားကစားဟာ မရှိမဖြစ်လိုအပ်တဲ့ အခန်းကဏ္ဍက ပါဝင်နေကြောင်း၊ လူငယ်၊ လူရွယ်များ ကျန်းမာသန်စွမ်းပြီး ကိုယ်ကာယကြံ့ခိုင်စေရန် အားကစား လှုပ်ရှားမှုများမှာ ပါဝင်ကြဖို့ လိုအပ်သလို စာရိတ္တဘက်စုံဖွံ့ဖြိုးအောင်၊ ပိုမို ကြံ့ခိုင်အောင် လေ့ကျင့်ပေးကြဖို့လည်း လိုအပ်ကြောင်း၊ သင်တန်းသူ၊ သင်တန်းသားများအနေနဲ့ ဗိုဗီနမ်အားကစားနည်းရဲ့ ပညာရပ်တွေကို ပိုမိုကျွမ်းကျင်မှုရှိလာအောင် ဆက်လက် လေ့ကျင့်သွားကြရန်နှင့် ထူးချွန်တဲ့ အားကစားသမားကောင်းများ ဖြစ်လာစေရန် စွမ်းစွမ်းတမံ ကြိုးစားဆောင်ရွက်သွားကြစေလိုကြောင်း ပြောကြားသည်။
ထို့နောက် သင်တန်းသား၊ သင်တန်းသူများမှ ဗိုဗီနမ်အားကစားနည်းအား သရုပ်ပြသခဲ့ကြမှုအပေါ် ကြည့်ရှုအားပေးသည်။
အဲဒီနောက် သင်တန်းဆင်းလက်မှတ်များ၊ သင်တန်းထူးချွန်ဆုနှင့် နည်းပြဆရာများအား ဂုဏ်ပြုဆုငွေများကို ပြည်နယ်ဝန်ကြီးချုပ်၊ ပြည်နယ်ဝန်ကြီးများမှ အသီးသီးချီးမြှင့်ခဲ့ကြသည်။
