မွန်ပြည်နယ်အတွင်းရှိ မြို့နယ်အသီးသီးတွင် သန့်ရှင်း၍ စိမ်းလန်းစိုပြေသာယာလှပပြီး အများပြည်သူများ စိတ်အေးချမ်းမြေ့မှုများ ရရှိစေရေးအတွက် ပြည်သူ့အကျိုးပြု စုပေါင်းသန့်ရှင်းရေးကို အပတ်စဉ်ပုံမှန် ဆောင်ရွက်လျက်ရာ မွန်ပြည်နယ် ဝန်ကြီးချုပ် ဦးအောင်ကြည်သိန်းနှင့် ပြည်နယ်ဝန်ကြီးများသည် ဖေဖော်ဝါရီလ ၁၁ ရက်နေ့၊ နံနက်ပိုင်းက မော်လမြိုင်မြို့၊ တောင်ဝိုင်း ဘိုးဘွားများ ခိုလှုံရာ ရိပ်သာ၌ ဘိုးဘွားရိပ်သာ အတွင်း၊ အပြင်နှင့် ဘေးပတ် ဝန်းကျင်ရှိ ခြုံနွယ်များ၊ မြက်များနှင့် အမှိုက်များအား ဌာနဆိုင်ရာများ၊ မြန်မာနိုင်ငံရဲတပ်ဖွဲ့၊ မီးသတ်တပ်ဖွဲ့ဝင်များ၊ လူမှုရေးအသင်းအဖွဲ့များ၊ အများပြည်သူများ တစ်တက်တစ်အားပါဝင်၍ စုပေါင်းသန့်ရှင်းရေး ဝိုင်းဝန်း ဆောင်ရွက်နေမှုအပေါ် ကြည့်ရှုအားပေးခဲ့သည်။
ဆက်လက်ပြီး ပြည်နယ်ဝန်ကြီးချုပ်က ဘိုးဘွားရိပ်သာ ပုရဝုဏ်အတွင်းတွင် စုပေါင်းသန့်ရှင်းရေး ဝိုင်းဝန်း ဆောင်ရွက်နေမှုအပေါ် လှည့်လည်ကြည့်ရှုခဲ့ပြီး တာဝန်ရှိသူများနှင့် တွေ့ဆုံ၍ ဘိုးဘွားရိပ်သာ အတွက် လိုအပ်သည်များကို ဖြည့်ဆည်းဆောင်ရွက်ပေးခဲ့သည်။
အဲဒီကမှတစ်ဆင့် ပြည်နယ်ဝန်ကြီးချုပ်သည် မြို့ပြအင်္ဂါရပ်များနှင့် ကိုက်ညီမှုရှိစေရေး၊ မြို့ပြဖွံ့ဖြိုးတိုးတက်ရေးအတွက် ဆောင်ရွက်ပေးလျက်ရှိရာတွင် အများပြည်သူများ သွားလာနေထိုင်မှုအဆင်ပြေမွေ့စေရေးအတွက် မော်လမြိုင်မြို့၊ မော်လမြိုင်တက္ကသိုလ် သွားရာလမ်းတစ်လျှောက် လမ်းတိုးချဲ့ခြင်း၊ အဆင့်မြှင့်တင်ခြင်းနှင့် လမ်းဘေးဝဲ၊ ယာ လူသွား စင်္ကြန် (ပလက်ဖောင်း) တိုးချဲ့ အဆင့်မြှင့်တင်ခြင်း အပိုင်းလိုက် ဆောင်ရွက်ပြီးစီးမှု အခြေအနေအား ကြည့်ရှုစစ်ဆေးခဲ့သည်။
ထို့နောက် လုပ်ငန်းဆောင်ရွက်နေမှုအခြေနှင့် ပတ်သက်၍ တာဝန်ရှိသူမှ ရှင်းလင်းတင်ပြခဲ့ပြီး ပြည်နယ်ဝန်ကြီးချုပ်က မြို့တွင်းသန့်ရှင်းသာယာ၊ လှပစေရေး၊ အမှိုက်များကို စနစ်တကျ စွန့်ပစ်စေရေး၊ အများပြည်သူများ စိတ်အေးချမ်းသာစွာ နေထိုင်သွားလာမှုရှိစေရေး ဆောင်ရွက်ကြရန် လမ်းညွှန်မှာကြားသည်။
မွန်ပြည်နယ် ကုန်သည်များနှင့် စက်မှုလက်မှုလုပ်ငန်းရှင်များအသင်း၏ နှစ်ပတ်လည် အသင်းသားစုံညီပွဲကို ယနေ့နံနက်ပိုင်းက မော်လမြိုင်မြို့၊ မွန်ပြည်နယ် ကုန်သည်များနှင့် စက်မှု၊ လုပ်ငန်းရှင်များအသင်း၊ ကုန်စည်ဒိုင်ခန်းမ၌ကျင်းပရာ ပြည်နယ်ဝန်ကြီးချုပ်က မွန်ပြည်နယ်အတွင်း အလားအလာကောင်းသည့် ဒေသထွက် ကုန်ကြမ်းများထုတ်လုပ်ခြင်းနှင့် တစ်ပိုင်တစ်နိုင် ကုန်ထုတ် စီးပွားရေးလုပ်ငန်းများ ဆောင်ရွက်ခြင်းကို တစိုက်မတ်မတ် အားပေးလျက်ရှိကြောင်း၊ ပြည်နယ်၏ အဓိက ထွက်ကုန်များဖြစ် သည့် ရာဘာ၊ ရေထွက်ကုန်ပစ္စည်းများ၊ သစ်သီးဝလံ၊ ဆား နှင့် ဆန်စပါး၊ ကွမ်းသီး အစရှိတဲ့ ထုတ်ကုန်ပစ္စည်းများကို ထုတ်ကုန်အရည်အသွေး မြင့်မားလာခြင်း၊ ဈေးကွက်ပိုမိုရရှိလာခြင်း၊ တီထွင်ဆန်းသစ်မှုများ ပိုမိုသိရှိလာနိုင်ခြင်း တို့အတွက် ဆောင်ရွက်ပေးကြရမည်ဖြစ်ကြောင်း၊ ပြည်တွင်းထုတ်ကုန်လုပ်ငန်းများ တိုးချဲ့လုပ်ကိုင်နိုင်ရန်နှင့် ပြည်နယ်တွင်းဖြစ် စီးပွားရေး လုပ်ငန်းများ ပိုမိုဖွံ့ဖြိုး အားကောင်းလာစေရေးတို့အတွက် ပုဂ္ဂလိက ကဏ္ဍ၊ သမဝါယမမှ ကဏ္ဍနှင့် နည်းပညာများ ဖြန့်ဝေပေးခြင်း၊ ဈေးကွက် ရရှိရေး ချိတ်ဆက်ဆောင်ရွက်ပေးခြင်း၊ ထုတ်ကုန် အရည်အသွေး စွမ်းဆောင်မှု မြှင့်တင်ခြင်း လုပ်ငန်းများတွင်လည်း ကဏ္ဍအသီးသီးမှ ဝိုင်းဝန်း ဆောင်ရွက်ပေးကြဖို့ ကြောင်းဖြင့် ပြောကြားခဲ့သည်။
ထို့နောက် မွန်ပြည်နယ် ကုန်သည်များနှင့် စက်မှုလက်မှုလုပ်ငန်းရှင်များအသင်း တာဝန်ရှိသူမှ အသေးစား၊ အငယ်စားနှင့် အလတ်စား စီးပွားရေးလုပ်ငန်းများ ဖွံ့ဖြိုးတိုးတက်လာစေရေးနှင့် ပတ်သက်၍ ဆောင်ရွက်ထားရှိအခြေအနေများနှင့် ပတ်သက်၍ ရှင်းလင်းတင်ပြခဲ့သည်။
ထို့နောက် ပြည်နယ်ဝန်ကြီးချုပ်က ကုန်သည်များနှင့် စက်မှုလက်မှုလုပ်ငန်းရှင်များနှင့် အသေးစား၊ အငယ်စားနှင့် အလတ်စား စီးပွားရေးလုပ်ငန်းရှင်များနှင့် ရင်းရင်းနှီးနှီး တွေ့ဆုံနှုတ်ဆက်ခဲ့သည်။