မွန်ပြည်နယ်တွင် (၇၆)နှစ်မြောက် ပြည်ထောင်စုနေ့ အထိမ်းအမှတ် ဂုဏ်ပြုညစာစားပွဲအခမ်းအနားကို ဖေဖော်ဝါရီလ ၁၂ ရက်နေ့၊ ညပိုင်းက မော်လမြိုင်မြို့၊ မောရဝတီ ပန်းခြံ၌ ကျင်းပပြုလုပ်ခဲ့ရာ မွန်ပြည်နယ်ဝန်ကြီးချုပ် ဦးအောင်ကြည်သိန်းနှင့်ဇနီး၊ အရှေ့တောင်တိုင်းစစ်ဌာနချုပ်တိုင်းမှူး ဗိုလ်ချုပ်မြတ်သက်ဦးနှင့် ဇနီး၊ ပြည်နယ်ဝန်ကြီးများ၊ ဌာနဆိုင်ရာ အကြီးအကဲများ၊ ဖိတ်ကြားထားသော ဧည့်သည်တော်များ တက်ရောက်ခဲ့ကြသည်။
အခမ်းအနားတွင် တိုင်းရင်းသားရိုးရာ အကများ၊ ပညာရေးဒီဂရီကောလိပ်ကျောင်းမှ ကျောင်းသား၊ ကျောင်းသူလေးများ၏ အကအလှများ၊ နည်းပညာတက္ကသိုလ် (မော်လမြိုင်)မှ ကျောင်းသား၊ ကျောင်းသူလေးများ၏ ဂုဏ်ပြုဖျော်ဖြေတင်ဆက်နေမှုများနှင့် ခေတ်ပေါ်တေးဂီတ ဖျော်ဖြေတင်ဆက်သီဆိုနေမှုများကို ကြည့်ရှုအားပေးခဲ့ကြသည်။
ထို့နောက် ပြည်နယ်ဝန်ကြီးချုပ်၊ တိုင်းမှူးနှင့် တာဝန်ရှိသူများက ဂုဏ်ပြုဖျော်ဖြေတင်ဆက်ပေးခဲ့ကြသည့် တိုင်းရင်းသားရိုးရာ အကအဖွဲ့များ၊ ကျောင်းသား၊ ကျောင်းသူလေးများနှင့် ခေတ်ပေါ်တေးဂီတ ဝိုင်းတော်သားများနှင့် အဆိုရှင်များကို ဂုဏ်ပြုချီးမြှင့်ငွေများ၊ ဂုဏ်ပြုပန်းစည်းများ ပေးအပ်ချီးမြှင့်ခဲ့ကြပြီး အခမ်းအနားသို့ တက်ရောက်လာသူများအား ရင်းရင်းနှီးနှီးအား လိုက်လံနှုတ်ဆက်ခဲ့ကြသည်။
မွန်ပြည်နယ်မသန်စွမ်းသူများ၏ အခွင့်အရေးများဆိုင်ရာကော်မတီ လုပ်ငန်းညှိနှိုင်းအစည်းအဝေးကို ဖေဖော်ဝါရီလ ၁၃ ရက်နေ့၊ မွန်းလွဲပိုင်းက မွန်ပြည်နယ်အစိုးရအဖွဲ့ရုံး၊ အောင်ဆန်းခန်းမ၌ ကျင်းပပြုလုပ်ရာ မွန်ပြည်နယ် ဝန်ကြီးချုပ် ဦးအောင်ကြည်သိန်း၊ ပြည်နယ်ဝန်ကြီးများ၊ မွန်ပြည်နယ်မသန်စွမ်းသူများ၏ အခွင့်အရေးများဆိုင်ရာကော်မတီဝင်များ တက်ရောက်သည်။
အစည်းအဝေးတွင် ပြည််နယ်ဝန်ကြီးချုပ်က မွန်ပြည်နယ်အနေဖြင့် မသန်စွမ်းသူများ အခွင့်အရေး များဆိုင်ရာကော်မတီကို ဖွဲ့စည်းဆောင်ရွက်ခဲ့ပြီး မသန်စွမ်းမှု ဆိုင်ရာအရေးကိစ္စတို့ကို ပြည်သူလူထုအတွင်း သဘောပေါက်နားလည်နိုင်စွမ်း မြှင့်တင်ပေးခြင်း၊ မသန်စွမ်းသူများ၏ ဂုဏ်သိက္ခာ၊ အခွင့်အရေးများ၊ ကောင်းကျိုးစီးပွားတို့အတွက် ပံ့ပိုးပေးခြင်းတို့ကို ဆောင်ရွက်ပေးလျက်ရှိကြောင်း၊ ထို့အပြင် မသန်စွမ်းသူများအား ထောက်ပံ့ပေးခြင်း၊ ပုဂ္ဂလိက မသန်စွမ်းအထူးပညာသင် ကျောင်းများအားတည်ထောင်ခွင့်ပြုမိန့်ပြုနိုင်ရေးဆောင်ရွက်ပေးခြင်း၊ မသန်စွမ်းမှု ဆိုင်ရာ အသိပညာပေးမှုများ ဆောင်ရွက်ခြင်း၊ အထူးလိုအပ်ချက်ရှိသော ကလေးများ ပြုစုလေ့ကျင့်မှုဆိုင်ရာ အသိပညာများပေးခြင်း၊ မသန် စွမ်းသူများအတွက် အတားအဆီးမဲ့ ခရီးသွားလုပ်ငန်းဖော်ဆောင် ခြင်းဆိုင်ရာ အထောက်အကူပြုစေရန် မသန်စွမ်းမှုအမြင်များနှင့် လက်သင်္ကေတပြဘာသာ စကား အသိပညာပေးမှုများကို ဆောင်ရွက်လျက်ကြောင်း၊ မသန်စွမ်းသူများ ကိုယ်တိုင်ဦးဆောင်တဲ့ မသန်စွမ်း အသင်းအဖွဲ့တွေ လည်း ပေါ်ပေါက်လာပြီ ဖြစ်၍ ပြည်နယ်အတွင်းမှာ ရှိတဲ့မသန်စွမ်းသူ တွေအတွက် အင်မတန်အားတက်စရာပဲဖြစ်ပါကြောင်း၊ မသန်စွမ်းမှုကို အကြောင်းပြုလို့ မသန်စွမ်းသူများကို ခွဲခြားဆက်ဆံခြင်း မပြုကြဖို့နှင့် မသန်စွမ်းသူများ ၏ ဂုဏ်သိက္ခာ၊ စွမ်းရည်နှင့် စွမ်းဆောင်နိုင်မှုများကို အလေးထား အသိအမှတ်ပြုပေးကြဖို့ လိုအပ်ကြောင်း၊ မသန်စွမ်းသူ များ၏ အခွင့်အရေးများကို အပြည့်အဝကာကွယ်ပေးနိုင်ဖို့နဲ့ မသန်စွမ်း သူများ၏ လူမှုဘဝများဖွံ့ဖြိုးတိုးတက်စေဖို့ မိမိတို့ရဲ့ ကိုယ်စွမ်းဉာဏ်စွမ်း ရှိသရွေ့တိုးတက်လုပ်ဆောင်ပြီး ဝိုင်းဝန်းဆွေးနွေးပေးကြရန်ဖြင့် အမှာစကားပြောကြားခဲ့သည်။
ထို့နောက် ပြည်နယ်လူမှုရေးရာဝန်ကြီး ဦးမြတ်သွင်က မွန်ပြည်နယ်မသန်စွမ်း သူများအသင်းနှင့်ပတ်သက်၍ ရှင်းလင်းတင်ပြခဲ့သည်။
အဲဒီနောက် မွန်ပြည်နယ်လူမှုဝန်ထမ်းရုံး၊ ညွှန်ကြားရေးမှူးမှ မွန်ပြည်နယ် မသန်စွမ်းသူများ၏ အခွင့်အရေးများဆိုင်ရာ ကိစ္စရပ်များ၊ လုပ်ငန်းဆောင်ရွက်ချက်များနှင့် ပတ်သက်၍ ရှင်းလင်းတင်ပြခဲ့ပြီး ပြည်နယ်မသန်စွမ်းသူများ၏ အခွင့်အရေးများဆိုင်ရာကော်မတီဝင်များမှ သက်ဆိုင်ရာကဏ္ဍအလိုက် ရှင်းလင်းတင်ပြခဲ့ကြမှုအပေါ် ပြည်နယ်ဝန်ကြီးများ ဖြည့်စွက်ဆွေးနွေးတင်ပြခဲ့ကြပြီး ပြည်နယ်ဝန်ကြီးချုပ်က လိုအပ်သည်များကို ပေါင်းစပ်ညှိနှိုင်းဆောင်ရွက်ပေးခဲ့ကာ မသန်စွမ်းသူများ၏ အခွင့်အရေးများဆိုင်ရာ ကိစ္စရပ်များဆောင်ရွက်နိုင်ရန် ထောက်ပံ့ငွေများ ပေးအပ်ခဲ့သည်။