မွန်ပြည်နယ်၊ ၂၀၂၃ ခုနှစ်၊ ပြည်နယ်အဆင့် ဘေးအန္တရာယ်ဆိုင်ရာစီမံခန့်ခွဲမှုအခြေခံသင်တန်း အမှတ်စဉ် (၁/၂၀၂၃) သင်တန်းဖွင့်ပွဲ အခမ်းအနားကို ဖေဖော်ဝါရီလ ၂၀ ရက်နေ့၊ နံနက်ပိုင်းက မော်လမြိုင်မြို့၊ ပြည်နယ်ခန်းမ၌ ကျင်းပပြုလုပ်ရာ မွန်ပြည်နယ် ဝန်ကြီးချုပ် ဦးအောင်ကြည်သိန်း၊ ပြည်နယ်တရားလွှတ်တော်တရားသူကြီးချုပ်၊ ပြည်နယ်ဝန်ကြီးများ၊ ဌာနဆိုင်ရာအကြီးအကဲများ၊ သင်တန်းသူ၊ သင်တန်းသားများ တက်ရောက်သည်။
အခမ်းအနားတွင် ပြည်နယ်ဝန်ကြီးချုပ်က သဘာဝဘေးနှင့် ပတ်သက်၍ ထိရောက်ကျယ်ပြန့်စွာ အသိပညာပေးနိုင်စေရန်၊ သဘာဝဘေး ရင်ဆိုင်တုံ့ပြန်ရေးလုပ်ငန်းများမှာပြည်သူများ ပူးပေါင်းပါဝင်လာစေရန်နှင့် ထိရောက်တဲ့ ဘေးအန္တရာယ်စီမံခန့်ခွဲမှု နည်းလမ်းများ ပေါင်းစပ်ပြီး စနစ်တကျစီမံဆောင်ရွက်နိုင်ရန် ရည်ရွယ်၍ ယခုကဲ့သို့ သင်တန်းများ ဖွင့်လှစ် ဆောင်ရွက်ပေးရခြင်းဖြစ်ကြောင်း၊ ပြည်နယ်တွင်လည်း ဖြစ်ပွားခဲ့သည့် သဘာဝဘေးဖြစ်စဉ်များ ဖြစ်ပေါ်သည်နှင့်တပြိုင်နက် ဘေးအန္တရာယ်ဆိုင်ရာ စီမံခန့်ခွဲမှု နည်းလမ်းကောင်းများဖြင့် အောင်မြင်စွာဆောင်ရွက်နိုင်ခဲ့သည်ကို တွေ့မြင်ကြရမှာဖြစ်ကြောင်း၊ ဘေးအန္တရာယ်များကို ကြိုတင်ခန့်မှန်းခြင်း၊ ကြိုတင်သတိပေးချက်များကို ထုတ်ပြန်ခြင်း၊ ကြိုတင်ပြင်ဆင်ခြင်း၊ အသိပညာပေးခြင်း၊ ဘေးအန္တရာယ်တစ်ခုချင်းစီအလိုက် စီမံချက်များရေးဆွဲထားခြင်းစတဲ့ အချက်များအတိုင်း ဆောင်ရွက်ကြရမည်ဖြစ်ကြောင်း၊ သင်တန်းသူ၊ သင်တန်းသားများအနေဖြင့် ဘေးအန္တရာယ်စီမံခန့်ခွဲမှု ပညာရပ် များကို ထိရောက်စွာ အသုံးချပြီး ပြည်သူလူထု၏ အသက်၊ အိုးအိမ်၊ စည်းစိမ်များကို ဘေးအန္တရာယ်များမှ ထိခိုက်ပျက်စီးမှု အနည်းဆုံး ဖြစ်အောင် ကူညီဆောင်ရွက်ပေးကြရန် မှာကြားလိုကြောင်းဖြင့် သင်တန်းအဖွင့်အမှာစကားပြောကြားခဲ့သည်။
ဆက်လက်ပြီး မွန်ပြည်နယ် ဘေးအန္တရာယ်ဆိုင်ရာစီမံခန့်ခွဲမှုဦးစီးဌာန၊ ညွှန်ကြားရေးမှူးမှ သင်တန်းဖွင့်လှစ်ရခြင်း၏ ရည်ရွယ်ချက်အား ရှင်းလင်း တင်ပြခဲ့သည်။
အဲဒီနောက် ပြည်နယ်ဝန်ကြီးချုပ်က သင်တန်းအတွက် ထောက်ပံ့ငွေများ ပေးအပ်ခဲ့ပြီး သင်တန်းသူ၊ သင်တန်းသားများအား ရင်းရင်းနှီးနှီးတွေ့ဆုံအားပေးခဲ့သည်။
မွန်ပြည်နယ်အတွင်း စိုက်ပျိုးမွေးမြူရေး လုပ်ငန်းများနှင့် အခြားကုန်ထုတ်လုပ်ငန်းမျာအတွက် ဆိုလာစနစ်သုံး ရေတင်စနစ် ဆောင်ရွက်နိုင်ရေး လုပ်ငန်းညှိနှိုင်းအစည်းအဝေးကို ယနေ့နံနက်ပိုင်းက ပြည်နယ်အစိုးရဖွဲ့ရုံး၊ အောင်ဆန်းခန်းမ၌ ကျင်းပပြုလုပ်ရာ ဦးစွာ စက်သုံးဆီ အစားထိုး ဆိုလာစနစ်ဖြင့် ရေတင်နိုင်သည့်နည်းစနစ်နှင့်ပတ်သက်၍ တာဝန်ရှိသူတစ်ဦးမှ ရှင်းလင်းတင်ပြခဲ့သည်။
ထို့နောက် တက်ရောက်လာသူများမှ သက်ဆိုင်ရာကဏ္ဍအလိုက် ရှင်းလင်းဆွေးနွေးခဲ့ကြပြီး ပြည်နယ်ဝန်ကြီးများက ဝိုင်းဝန်းအကြံပြု ဆွေးနွေးတင်ပြခဲ့ကြသည်။
ဆွေးနွေးတင်ပြခဲ့မှုများအပေါ် ပြည်နယ်ဝန်ကြီးချုပ်က မွန်ပြည်နယ်အတွင်း စိုက်ပျိုးရေးကို အဓိကထား၍ မွေးမြူရေးလုပ်ငန်း၊ ဆားလုပ်ငန်းနှင့် အခြားကုန်ထုပ်လုပ်ငန်းများအတွက် လိုအပ်သည့် စိုက်ပျိုးရေ၊ လုပ်ငန်းသုံးရေများ ရရှိနိုင်ရန်အတွက် နည်းလမ်းပေါင်းစုံမှ ဆောင်ရွက်ပေးလျက်ရှိကြောင်း၊ စက်သုံးဆီ အစားထိုး ဆိုလာစနစ်ဖြင့် ရေတင်နိုင်သည့်နည်းစနစ်အား ကျယ်ကျယ်ပြန့်အသုံးပြုမည်ဆိုပါက တောင်သူများအပြင် အခြားကုန်ထုတ်လုပ်ငန်းများ လုပ်ကိုင်နေသူများအတွက် များစွာအကျိုးကျေးဇူးများ ရရှိနိုင်မည်ဖြစ်ကြောင်း၊ အဆိုပါနည်းစနစ်ကို ရေရှည်အသုံးပြုနိုင်စေရန်နှင့် တောင်သူများကို ပညာပေးခြင်းနှင့် နည်းပညာများပေးခြင်းတို့လည်း ဆောင်ရွက်ပေးစေလိုကြောင်းဖြင့် ပြောကြားခဲ့ကာ လိုအပ်သည်များကို ပေါင်းစပ်ညှိနှိုင်း ဆောင်ရွက်ပေးခဲ့သည်။
၂၀၂၃ ခုနှစ်၊ မတ်လ ၁၉ ရက်နေ့တွင်ကျရောက်မည့် (၄၉)နှစ်မြောက် မွန်ပြည်နယ်နေ့ အထိမ်းအမှတ် အခမ်းအနား အောင်မြင်စွာ ကျင်းပနိုင်ရေး ယဉ်ကျေးမှုအဖွဲ့ဝင်များနှင့် ကြိုတင်ညှိနှိုင်း အစည်းအဝေးကို ယနေ့မွန်းလွဲပိုင်းက ပြည်နယ်အစိုးရဖွဲ့ရုံး၊ အောင်ဆန်းခန်းမ၌ ဆက်လက် ကျင်းပပြုလုပ်ရာ ပြည်နယ်ဝန်ကြီးချုပ်က မွန်ပြည်နယ်အတွင်း ဘက်စုံ၊ ကဏ္ဍစုံဖွံ့ဖြိုးတိုးတက်စေရေး ဦးတည်ဆောင်ရွက်လျက်ရှိရာ တိုင်းရင်းသားလူမျိုးများ၏ ဘာသာစကား၊ စာပေ၊ ယဉ်ကျေးမှု ဓလေ့ထုံးတမ်းများကို ဖော်ထုတ်မြှင့်တင်ပေးနိုင်ရေး အလေးထား ဆောင်ရွက်ပေးလျက်ရှိပါကြောင်း၊ (၄၉)နှစ်မြောက် မွန်ပြည်နယ်နေ့ အထိမ်းအမှတ် အခမ်းအနားကို အသွင်သဏ္ဍန်နှင့် အနှစ်သာရရှိရှိဖြင့် ထူးခြားခမ်းနားပြီး စည်ကားသိုက်မြိုက်စွာ ကျင်းပ ပြုလုပ်နိုင်ရေး ဆောင်ရွက်သွားမည်ဖြစ်ကြောင်း၊ မွန်ပြည်နယ်၏ ဂုဏ်ယူစရာ နေ့ထူးနေ့မြတ်ဖြစ်သည့်အားလျော်စွာ ဒေသဆိုင်ရာ ဓလေ့ထုံးစံနှင့် ယဉ်ကျေးမှု စသည့် အခြေခံအကြောင်းအရင်းများကိုပါ ထည့်သွင်းဖော်ထုတ်ပေးကြရန်၊ မွန်တိုင်းရင်းသား လူမျိုးများ၏ အနုသုခုမ ယဉ်ကျေးမှု အမွေအနှစ်များ၊ ယဉ်ကျေးမှု ဓလေ့ထုံးတမ်းများကို မြှင့်တင်ဖော်ဆောင်ပေးကြရန်နှင့် နှစ်စဉ်ကျင်းပမြဲ ဖြစ်သော်လည်း ယခုနှစ်သည် ယခင်နှစ်များနှင့်မတူ တမူထူးခြားစွာ ခမ်းနား ထည်ဝါစွာဖြင့် ကျင်းပပြုလုပ်နိုင်ရေး ဝိုင်းဝန်း ဆောင်ရွက်ပေးကြရန်ဖြင့် အမှာစကားပြောကြားခဲ့သည်။
ထို့နောက် ပြည်နယ်ရှေးဟောင်းသုတေသနနှင့် အမျိုးသားပြတိုက်ဦးစီးဌာန၊ ဒုတိယညွှန်ကြားရေးမှူးမှ (၄၉)နှစ်မြောက် မွန်ပြည်နယ်နေ့ အထိမ်းအမှတ် အခမ်းအနား အောင်မြင်စွာ ကျင်းပနိုင်ရေး ဆောင်ရွက်ထားရှိမှုအခြေအနေများနှင့် ပတ်သက်၍ ရှင်းလင်းတင်ပြခဲ့ပြီး တက်ရောက်လာကြသည့် ယဉ်ကျေးမှုအဖွဲ့ဝင်များမှ လိုအပ်သည်များကို တင်ပြဆွေးနွေးခဲ့ကြသည်။
အဲဒီနောက် တာဝန်ရှိသူများက သက်ဆိုင်ရာကဏ္ဍအလိုက် ရှင်းလင်းတင်ပြခဲ့ကြပြီး ပြည်နယ်ဝန်ကြီးများက ရှင်းလင်းဆွေးနွေးခဲ့ကြမှုအပေါ် ပြည်နယ်ဝန်ကြီးချုပ်က လိုအပ်သည်များကို ပေါင်းစပ်ညှိနှိုင်း ဆောင်ရွက်ပေးခဲ့သည်။