မော်လမြိုင်ကက္ကသိုလ် ၂၀၂-၂၀၂၃ ပညာသင်နှစ်၊ အနုပညာအသင်းမှ ကြီးမှူး ကျင်းပသော လှယဉ်ကျေးမယ်နှင့် တိုင်းရင်းသားရိုးရာဝတ်စားဆင်ယင်မှုနှင့် ဖက်ရှင်ပြိုင်ပွဲ အခမ်းအနားကို ဖေဖော်ဝါရီလ ၂၁ ရက်နေ့၊ နံနက်ပိုင်းက မော်လမြိုင်ကက္ကသိုလ်၊ ဘက်စုံသုံးခန်းမ၌ ကျင်းပပြုလုပ်ရာ မွန်ပြည်နယ်ဝန်ကြီးချုပ် ဦးအောင်ကြည်သိန်းနှင့်ဇနီး၊ အရှေ့တောင်တိုင်းစစ်ဌာနချုပ်တိုင်းမှူးဗိုလ်ချုပ်မြတ်သက်ဦးနှင့် ဇနီး၊ ပြည်နယ်ဝန်ကြီးများ၊ ဌာနဆိုင်ရာအကြီးအကဲများ၊ ဆရာ၊ ဆရာမများ၊ ကျောင်းသား၊ ကျောင်းသူများ၊တိုင်းရင်းသားစာပေနှင့် ယဉ်ကျေးမှုဆပ်ကော်မတီဝင်များ၊ အနုပညာအသင်းများ၊ ဖိတ်ကြားထားသော ဧည့်သည်တော်များ တက်ရောက်ခဲ့ကြသည်။
ဦးစွာ ပြည်နယ်ဝန်ကြီးချုပ်၊ တိုင်းမှူးနှင့်ပြည်နယ်ဝန်ကြီးများက ပြိုင်ပွဲကို ဖဲကြိုးဖြတ် ဖွင့်လှစ်ပေးခဲ့ကြပြီး ပြည်နယ်ဝန်ကြီးချုပ်က အဆင့်မြင့်ပညာသင်ယူနေကြတဲ့ တက္ကသိုလ်ကျောင်းသူများ ဟာ ပညာရေး မှာထူးချွန်ရုံသာမကပဲ၊ အနုပညာဖက်မှာလည်း ထူးချွန်တဲ့ နိုင်ငံ့ဂုဏ်ဆောင်တက္ကသိုလ်အလှမယ်များပေါ်ထွန်းလာစေရန်၊တိုင်းရင်းသား လူမျိုးတွေရဲ့ဝတ်စားဆင်ယင်မှုနဲ့ ခေတ်အဆက်ဆက်ဝတ်စားဆင်ယင်မှု တွေကို ပြန်လည်ဖော်ထုတ်ရန် ရည်ရွယ်၍ ယခု့ကဲ့သို့ ပြိုင်ပွဲများ ကျင်းပဆောင်ရွက်ရခြင်း ဖြစ်ပါကြောင်း၊ ပညာရေးဘက်မှာလည်း ထူးချွန်အောင်ကြိုးပမ်းဆောင်ရွက်ကြရန်၊ ကျောင်းသား မောင်၊ မယ်လေးများအနေဖြင့် အနုပညာနဲ့စာပေဖက်မှာသာမကပဲ ဘက်စုံထူးချွန်တဲ့ အနာဂတ်သားကောင်း ရတနာ၊ သမီးကောင်း ရတနာလေးများဖြစ်စေရန် စွမ်းဆောင်ပေးကြရန် တိုက်တွန်းလိုကြောင်း၊ မြန်မာ့ယဉ်ကျေးမှု အစဉ်အလာများ ထိန်းသိမ်းစောင့်ရှောက်ရန်၊ ခေတ်နှင့်လျော်ညီပြီး ဖက်ရှင်ကျတဲ့ ဝတ်စား ဆင်ယင်မှုကို ဝတ်ဆင်တတ်ဖို့နဲ့ အနုပညာအရည်အသွေး တိုးတက်ဖို့ ကြိုးပမ်းယှဉ်ပြိုင်ကြစေလိုကြောင်းဖြင့် အမှာစကားပြောကြားခဲ့သည်။
ဆက်လက်ပြီး ပြည်နယ်ဝန်ကြီးချုပ်နှင့် တိုင်းမှူးတို့မှ ပြိုင်ပွဲအတွက် ဂုဏ်ပြုထောက်ပံ့ငွေများ ထောက်ပံ့ပေးအပ်ခဲ့သည်။
ထို့နောက် မော်လမြိုင်တက္ကသိုလ်၊ ပါမောက္ခချုပ် ဒေါက်တာအောင်မြတ်ကျော်စိန်မှ ကျေးဇူးတင်စကားပြောကြားခဲ့ပြီး လှယဉ်ကျေးမယ်ပြိုင်ပွဲဝင်ကျောင်းသူ ပြိုင်ပွဲဝင်ရောက်ယှဉ်ပြိုင်မှုများအား လည်းကောင်း၊ တိုင်းရင်းသားရိုးရာဝတ်စားဆင်ယင်မှုနှင့် ဖက်ရှင် ပြိုင်ပွဲဝင်ရောက်ယှဉ်ပြိုင်မှုများအား လည်းကောင်း ကြည့်ရှုအားပေးခဲ့ကြသည်။
အဲဒီနောက် ပြည်နယ်ဝန်ကြီးချုပ်က ကျောင်းသား၊ ကျောင်းသူလေးများအား ရင်းရင်းနှီးနှီး လိုက်လံနှုတ်ဆက်ခဲ့သည်။
၂၀၂၃ ခုနှစ်၊ (၄၉)နှစ်မြောက် မွန်ပြည်နယ်နေ့အခမ်းအနား အောင်မြင်စွာ ကျင်းပ နိုင်ရေးအတွက် လုပ်ငန်းညှိနှိုင်းအစည်းအဝေးကို ယနေ့မွန်းလွဲပိုင်းက ပြည်နယ်အစိုးရအဖွဲ့ရုံး၊ အောင်ဆန်းခန်းမ၌ ဆက်လက် ကျင်းပပြုလုပ်ရာ ပြည်နယ်ဝန်ကြီးချုပ်က ၂၀၂၃ ခုနှစ်၊ မတ်လ ၁၉ ရက်နေ့တွင် ကျရောက်မည့် (၄၉)နှစ်မြောက် မွန်ပြည်နယ်နေ့ အထိမ်းအမှတ် အခမ်းအနားကို စည်ကားသိုက်မြိုက်စွာ ကျင်းပ ပြုလုပ်နိုင်ရေး ဆောင်ရွက်သွားမည်ဖြစ်ရာ အခမ်းအနားကို အောင်မြင်စွာ ကျင်းပပြုလုပ်နိုင်ရေး ကော်မတီအသီးသီးကိုလည်း ဖွဲ့စည်းတာဝန်ပေးအပ် ထားပြီးဖြစ်ကြောင်း၊ အထိမ်းအမှတ် အခမ်းအနားအပြင်၊ မွန်တိုင်းရင်းသား လူမျိုးတို့၏ ရိုးရာအကအလှများ၊ တိုင်းရင်းသားများ၏ ရိုးရာအကအလှများ ဂုဏ်ပြုဖျော်ဖြေရေးအစီအစဉ်များကိုပါ ထည့်သွင်း ဆောင်ရွက်သွားမည်ဖြစ်သည့်အတွက် ကဏ္ဍအလိုက် ကြိုတင် စီစဉ်ဆောင်ရွက်ထားရှိမည်ဖြစ်ကြောင်း၊ ဌာန ဆိုင်ရာ ပြခန်းများနှင့် အသေးစား / အငယ်စား/အလတ်စား ထုတ်ကုန် အရောင်းပြခန်းထည့်သွင်းပြသသွားမည်ဖြစ်သည့်အတွက် ပြည်နယ်အတွင်းရှိ မြို့နယ်အသီးသီးမှ ထုတ်ကုန်များအပြင် ဒေသတစ်ခု ထုတ်ကုန်တစ်ခု အစီအစဉ်ဖြင့် ပါဝင်ပြသနိုင်ရေး ဆောင်ရွက်ပေးရန်နှင့် အခမ်းအနားကို အောင်မြင်စွာကျင်းပနိုင်ရေးအတွက် ဝိုင်းဝန်းအကြံပြု ဆွေးနွေးပေးကြရန်ဖြင့် အမှာစကားပြောကြားခဲ့သည်။
ထို့နောက် အခမ်းအနားကျင်းပရေး လုပ်ငန်းကော်မတီဝင်များက ၄၉)နှစ်မြောက် မွန်ပြည်နယ်နေ့အခမ်းအနား အောင်မြင်စွာ ကျင်းပ နိုင်ရေး ဆောင်ရွက်ထားရှိမှုအခြေအနေများနှင့် ပတ်သက်၍ ရှင်းလင်းတင်ပြခဲ့ကြသည်။
ဆက်လက်ပြီး တာဝန်ရှိသူများက သက်ဆိုင်ရာကဏ္ဍအလိုက် ရှင်းလင်းတင်ပြခဲ့ကြပြီး ပြည်နယ်ဝန်ကြီးများက ဝိုင်းဝန်းအကြံပြု ဆွေးနွေးတင်ပြခဲ့ကြသည်။
အဲဒီနောက် ပြည်နယ်ဝန်ကြီးချုပ်က ဆွေးနွေးတင်ပြမှုများအပေါ် လိုအပ်သည်များကို ပေါင်းစပ်ညှိနှိုင်းဆောင်ရွက်ပေးခဲ့ကာ နိဂုံးချုပ် အမှာစကား ပြောကြားခဲ့သည်။
