မော်လမြိုင်၊ ဧပြီ ၂၀
မွန်ပြည်နယ်၊ ၂၀၂၂- ၂၀၂၃ ပညာသင်နှစ်၊ အပန်းဖြေခရီးထွက်ခွာမည့် လူရည်ချွန် မောင်မယ် ကျောင်းသားကျောင်းသူများအား ပြည်နယ်ဝန်ကြီးချုပ်၏ ဩဝါဒခံယူပွဲ အခမ်းအနားကို ဧပြီလ ၂၀ ရက်နေ့ နံနက်ပိုင်းက မော်လမြိုင်မြို့၊ အမှတ်(၆) အခြေခံပညာအထက်တန်းကျောင်း၊ ရတနာမွန်ခန်းမ၌ ကျင်းပပြုလုပ်ရာ ပြည်နယ်၀န်ကြီးချုပ် ဦးအောင်ကြည်သိန်း၊ ပြည်နယ်ဝန်ကြီးများ၊ တာဝန်ရှိသူများ၊ ဆရာ၊ ဆရာမများ၊ လူရည်ချွန်မောင်မယ် ကျောင်းသား၊ ကျောင်းသူများ တက်ရောက်သည်။
အခမ်းအနားတွင် ပြည်နယ်ဝန်ကြီးချုပ်က မွန်ပြည်နယ်အတွင်း ဘက်စုံလွှမ်းခြုံနိုင်သော ပညာရေးစနစ်ကို အကောင်အထည်ဖော်ဆောင်ရွက်ရာတွင် ပညာရေးကဏ္ဍ အရည်အသွေး တိုးတက်မြင့်မားရေးကို အထူးအလေးပေး ဆောင်ရွက်လျက်ရှိကြောင်း၊ ပြည်နယ်အတွင်းရှိ ထူးချွန်ထက်မြက်ပြီး ပြည်နယ် ဂုဏ်တက်စေမည့် လူရည်ချွန်မောင်မယ်လေးများ ပေါ်ထွန်းလာသည့်အတွက် အထူးပင်ဝမ်းမြောက်ဂုဏ်ယူပါကြောင်း၊ ပညာရေးကဏ္ဍသည် အရေးကြီးသည့် ကဏ္ဍတစ်ရပ်ဖြစ်သည်နှင့်အညီ အရည်အသွေးမြင့်မားပြီး ဘက်စုံပညာထူးချွန်သည့် ကျောင်းသားလူငယ်လေးများကို စိစစ်ရွေးချယ်ပြီး ဂုဏ်ပြုချီးမြှင့်ခြင်းကို အဆက်မပြတ်ဆောင်ရွက်ပေးလျက်ရှိကြောင်း၊ မွန်ပြည်နယ်မှ ယခင်နှစ်များနည်းတူ လူရည်ချွန်များကိုစိစစ်ရွေးချယ်ခဲ့ပြီး လူရည်ချွန်စီမံကိန်း အစဉ်အလာကောင်းကို ဆက်လက်အကောင်အထည်ဖော် ဆောင်ရွက်ခြင်းပင်ဖြစ်ကြောင်း၊ အပန်းဖြေခရီးထွက်ခွာမည့် လူရည်ချွန် မောင်မယ်များအနေဖြင့် ခရီးစဉ်တစ်လျှောက်သတ်မှတ်ထားသော စည်းမျဉ်းစည်းကမ်းများအတိုင်း လိုက်နာဆောင် ရွက်ကြရန်၊ မိမိတို့၏ပြည်နယ်၏ ဂုဏ်ကို ဖော်ဆောင်ကြရန်၊ မိဘဆရာသမားတို့၏ ဂုဏ်ကျေးဇူးကို မမေ့ကြရန်နှင့် နိုင်ငံ့အကျိုး၊ ပြည်နယ်၏ အကျိုးပြုလုပ်ငန်းတွေမှာ ပူးပေါင်းဆောင်ရွက်ပေးကြရန် မှာကြားလိုကြောင်းဖြင့် ဩဝါဒစကားပြောကြားခဲ့သည်။
ထို့နောက် ပြည်နယ်ဝန်ကြီးချုပ်က အပန်းဖြေခရီး ထွက်ခွာမည့် လူရည်ချွန် မောင်မယ် ကျောင်းသား၊ ကျောင်းသူများလေးများအား ထောက်ပံ့ငွေများ ပေးအပ်ခဲ့သည်။
ဆက်လက်ပြီး မွန်ပြည်နယ်ပညာရေးမှူး ဒေါက်တာချိုချိုမြတ်အောင်က လူရည်ချွန် မောင်မယ် ကျောင်းသား၊ ကျောင်းသူများလေးများအား ထောက်ပံ့ငွေများ ပေးအပ်ခဲ့ပြီး လူရည်ချွန်မောင်မယ် ကျောင်းသား၊ ကျောင်းသူများကိုယ်စား လူရည်ချွန်မောင်မယ်လေး တစ်ဦးက ကျေးဇူးတင်စကား ပြန်လည်ပြောကြားခဲ့သည်။
အဲဒီနောက် ပြည်နယ်ဝန်ကြီးချုပ်နှင့် ပြည်နယ်ဝန်ကြီးများက ဆရာ ၊ ဆရာမများ၏ “ခေတ်သုံးခေတ်သင်္ကြန်” အကအလှဖြင့် ကပြဖျော်ဖြေတင်ဆင်ခဲ့ကြမှုအပေါ် ကြည့်ရှုအားပေးခဲ့ကြကာ ပြည်နယ်ဝန်ကြီးချုပ်က ဂုဏ်ပြုဆုငွေများချီးမြှင့်ခဲ့သည်။
ယင်းနောက် လူရည်ချွန် မောင်မယ် ကျောင်းသား၊ ကျောင်းသူလေးများမှ တစ်ဦးချင်းစီ မိတ်ဆက်ဂါရဝပြုခဲ့ကြပြီး ပြည်နယ်ဝန်ကြီးချုပ်နှင့် ပြည်နယ်ဝန်ကြီးများက လူရည်ချွန် မောင်မယ်လေးများနှင့်အတူ နံနက်စာကို အတူတကွ သုံးဆောင်၍ ပြည်နယ်ဝန်ကြီးချုပ်က လူရည်ချွန် မောင်မယ် ကျောင်းသား၊ ကျောင်းသူလေးများကို ရင်းရင်းနှီးနှီး လိုက်လံအားပေးနှုတ်ဆက်ခဲ့သည်။
