မော်လမြိုင်၊ ဧပြီ ၂၅
မွန်ပြည်နယ်အနေဖြင့် ဒေသနေပြည်သူများ စာနပ်ရိက္ခာဖူလုံမှုရှိစေရေး ဆန်စပါးစိုက်ပျိုးခြင်းအပြင် နေကြာနှင့် ဆီထွက်သီးနှံများ ပိုမိုတိုးချဲ့စိုက်ပျိုးနိုင်ရေး ဦးစားပေးကဏ္ဍအနေဖြင့် အထူးအလေးပေး ဆောင်ရွက်လျက်ရှိရာ မွန်ပြည်နယ်အတွင်း မိုးစပါးနှင့် နေကြာ အောင်မြင်စွာ စိုက်ပျိုးနိုင်ရေးအတွက် အကောင်အထည်ဖော်ဆောင်ရွက်မည့် လုပ်ငန်းညှိနှိုင်း အစည်းအဝေးကို ဧပြီလ ၂၅ ရက်နေ့၊ နံနက်ပိုင်းက မွန်ပြည်နယ် အစိုးရအဖွဲ့ရုံး၊ အောင်ဆန်းခန်းမ၌ ကျင်းပပြုလုပ်ခဲ့ရာ မွန်ပြည်နယ်ဝန်ကြီးချုပ် ဦးအောင်ကြည်သိန်း၊ ပြည်နယ်ဝန်ကြီးများ၊ ဌာနဆိုင်ရာတာဝန်ရှိသူများ တက်ရောက်သည်။
အစည်းအဝေးတွင် ပြည်နယ်ဝန်ကြီးချုပ်က မွန်ပြည်နယ်သည် စိုက်ပျိုးရေးကို အခြေခံသည့် ပြည်နယ်တစ်ခုဖြစ်သည်နှင့် အညီ စိုက်ပျိုးလယ်ယာမြေများတွင် စပါးနှင့် နေကြာဆီထွက်သီးနှံများ အောင်မြင်စွာ စိုက်ပျိုးဖြစ်ထွန်းစေရေး အလေးထား ဆောင်ရွက်လျက်ရှိပါကြောင်း၊ ဘက်စုံနည်းပညာသုံး စံပြစိုက်ကွက်များ ဖော်ဆောင်၍ စိုက်ပျိုးသည့် နည်းစနစ်များ၊ သွင်းအားစုများကိုလည်း အဖက်ဖက်မှ ထောက်ပံ့ဆောင်ရွက်လျက်ရှိပြီး တောင်သူများအတွက် ရေ၊ မြေ၊ ဒေသနှင့်ကိုက်ညီသည့် မျိုးကောင်း မျိုးသန့်နှင့် မြေဩဇာများရရှိရေး၊ သီးနှံအထွက်နှုန်းကောင်းမွန်စေရေးတို့ကိုလည်း ဆောင်ရွက်ပေးလျက်ရှိကြောင်း၊ မိုးစပါးနှင့် နွေစပါးကို ပန်းတိုင်အထွက်နှုန်းရရှိရေး စိုက်ပျိုးကြရန်လိုအပ်သလို နေကြာနှင့် ဆီထွက်သီးနှံစိုက်ပျိုးမှုကို ယခုနှစ်ထက် နောင်နှစ်များတွင်လည်း ပိုမိုတိုးချဲ့စိုက်ပျိုးသွားရန်လိုကြောင်း၊ တောင်သူများအနေဖြင့် စိုက်ပျိုးရေး နည်းစနစ်မှန်ကန်မှုရှိစေရေး၊ သီးနှံအထွက်နှုန်းလျှော့ကြမှုမရှိစေရေးအတွက် ပျိုးကြဲခင်း စိုက်ပျိုးနည်းဖြင့် စိုက်ပျိုးမည့်အစား စနစ်တကျ မျိုးစေ့ချစိုက်ပျိုးနည်းဖြင့် စိုက်ပျိုးခြင်းအား ကြပ်မတ် ဆောင်ရွက်ကြရမည် ဖြစ်သည့်အပြင် အဆင့်မြင့်လယ်ယာနည်းစနစ်ကို ဖော်ဆောင်နိုင်ရေး ဆောင်ရွက်ကြမည်ဖြစ်ကြောင်း၊ အမှန်တကယ်စိုက်ပျိုးဧကများကို မြေပြင်ကွင်းဆင်း စာရင်းကောက်ယူခြင်း၊ ရေမြေဒေသနှင့်ကိုက်ညီသည့် မျိုးကောင်း၊ မျိုးသန့်ရရှိနိုင်ရေးနှင့် နည်းပညာနှင့် လယ်ယာသုံးစက်ကရိယာများ ကူညီထောက်ပံ့ပေးကြခြင်း၊ စိုက်ပျိုးရေအား နည်းလမ်းပေါင်းစုံမှ ရရှိနိုင်ရေးဆောင်ရွက်ခြင်းပေးတို့အပြင် တောင်သူများအား မြေမှန်၊ မျိုးမှန်၊ စိုက်နည်းမှန်၊ ရာသီမှန်စွာ စနစ်တကျစိုက်ပျိုးကြစေရေး ဆောင်ရွက်ပေးကြရန် လိုအပ်ကြောင်း၊ ပြည်နယ်အတွင်း မိုးစပါးနှင့် နေကြာဆီထွက်သီးနှံ အောင်မြင်စွာ စိုက်ပျိုးနိုင်ရေးအတွက် ဝိုင်းဝန်းအကြံပြုဆွေးနွေးပေးကြစေလိုကြောင်းဖြင့် အမှာစကား ပြောကြားခဲ့သည်။
ထို့နောက် မွန်ပြည်နယ်စိုက်ပျိုးရေးဦးစီးဌာန၊ ပြည်နယ်ဦးစီးမှူး ဦးလှမိုးအောင်မှ မွန်ပြည်နယ်အတွင်း မိုးစပါးနှင့် နေကြာသီးနှံစိုက်ပျိုးထုတ်လုပ်မှုအခြေအနေနှင့် ဆက်လက်် စိုက်ပျိုးဆောင်ရွက်မည့် အစီအစဉ်များနှင့်ပတ်သက်၍ ရှင်းလင်းတင်ပြခဲ့ပြီး တက်ရောက်လာကြသူများမှ သက်ဆိုင်ရာ ကဏ္ဍများအလိုက် ရှင်းလင်းတင်ပြခဲ့ကြပြီး ပြည်နယ်ဝန်ကြီးများမှ ဖြည့်စွက်ဆွေးနွေးခဲ့ကြမှုအပေါ် ပြည်နယ်ဝန်ကြီးချုပ်က လိုအပ်သည်များကို ပေါင်းစပ်ညှိနှိုင်းဆောင်ရွက်ပေးခဲ့ကာ နိဂုံးချုပ်အမှာစကားပြောကြားခဲ့သည်။
