မော်လမြိုင်၊ ဧပြီ ၂၆
မွန်ပြည်နယ်၊ မုဒုံမြို့နယ်၊ ကွမ်တာကျေးရွာ၊ ဇိနရံသီပရိယတ္တိစာသင်တိုက်၊ လေးထပ်ကျောင်းဆောင်သစ် ဖွင့်ပွဲ မင်္ဂလာအခမ်းအနားကို ဧပြီလ ၂၆ ရက်နေ့၊ နံနက်ပိုင်းက မုဒုံမြို့နယ်၊ ကွမ်တာကျေးရွာ၊ ဇိနရံသီပရိယတ္တိစာသင်တိုက်၊ လေးထပ်ကျောင်းဆောင်ဓမ္မာရုံတော်၌ ကျင်းပပြုလုပ်ရာ ဆရာတော်၊ သံဃာတော် အရှင်သူမြတ်များ၊ မွန်ပြည်နယ် ဝန်ကြီးချုပ် ဦးအောင်ကြည်သိန်း၊ ပြည်နယ်ဝန်ကြီးများ၊ တာဝန်ရှိသူများ၊ အလှူရှင်များ၊ ဖိတ်ကြားထားသူများ တက်ရောက်သည်။
ရှေးဦးစွာ အခမ်းအနားကို နမောတဿ သုံးကြိမ်ရွတ်ဆို ဖွင့်လှစ်၍ မုဒုံမြို့နယ်၊ ကွမ်တာကျေးရွာ၊ ဇိနရံသီပရိယတ္တိစာသင်တိုက် ဦးစီးပဓါန နာယက ဆရာတော် ဘန္ဒန္တ နန္ဒန ထံမှ ငါးပါးသီလခံယူခဲ့ဆောက်တည်ခဲ့ကြပြီး သံဃာတော်အရှင်သူမြတ်များ ရွတ်ပွားသရဇ္ဈာယ်မူသော ပရိတ်တရားတော်များ နာယူကြည်ညိုခဲ့ကြသည်။
ဆက်လက်ပြီး ပြည်နယ်ဝန်ကြီးချုပ်က သာသရေးဆိုင်ရာများ လျှောက်ထားခဲ့ပြီး ဆရာတော်အရှင်သူမြတ်များထံ လှူဖွယ်ဝတ္ထုပစ္စည်းများ ဆက်ကပ်လှူဒါန်းခဲ့သည်။
အဲဒီနောက် ပြည်နယ်ဝန်ကြီးချုပ်နှင့် ပြည်နယ်ဝန်ကြီးများသည် ဇိနရံသီပရိယတ္တိစာသင်တိုက်တွင် ကိန်းဝပ်စံပယ်တော်မူသော ကျွန်းနက် ဗုဒ္ဓရုပ်ပွားတော်မြတ်များအား ဖူးမျှော်ကြည်ညိုကြခဲ့ကြပြီး ပင့်သံဃာ၊ ဆရာတော်ကြီးများဖြစ်ကြသည့် ရန်ကုန်တိုင်းဒေသကြီး၊ ကျိုက်သီမွန်ကျောင်းဆရာတော် နိုင်ငံတော် သံဃာ့ဗဟိုဝန်ဆောင် ဘဒ္ဒန္တ ဝေပုလ္လ ဆရာတော်ကြီးနှင့် မွန်ပြည်နယ်၊ သံဖြူဇရပ်မြို့ မဟာရင်ကျောင်းတိုက် ဦးစီးပဓါန နာယက ဆရာတော် ဘဒ္ဒန္တ သီလတေဇ ဆရာတော်ကြီးတို့အား ဖူးမျှော်ကြည်ညိုခဲ့ကြပြီး လှူဖွယ်ဝတ္ထုပစ္စည်းများ ဆက်ကပ်လှူဒါန်းခဲ့ကြသည်။
ယင်းနောက် ဆရာတော်၊ သံဃာတော်အရှင်သူမြတ်များက ဦးစီးအမှူးပြု၍ အလှူရှင်များမှ ဇိနရံသီပရိယတ္တိစာသင်တိုက်၊ လေးထပ်ကျောင်းဆောင်သစ်၏ လှူဒါန်းမှု အစုစုတို့အတွက် အနုမောဒနာ တရားနာယူ ကြည်ညိုခဲ့ကြပြီး ရေစက်သွန်းချ အမျှ ပေးဝေခဲ့ကြကြောင်း သိရှိရသည်။
