မော်လမြိုင်၊ ဧပြီ ၂၇
မွန်ပြည်နယ်အတွင်း တန်ခိုးကြီး ဘုရားစေတီပုထိုးများစွာ တည်ရှိသည့်အနက်မှ ပေါင်မြို့နယ်၊ မုတ္တမ၊ မြင်းတပ်ရပ်တွင် တည်ထားကိုးကွယ်တော်မူသော ရှေးဟောင်းဘုရား (၁၆) ဌာန သမိုင်းဝင် မြသိန်းတန်စေတီတော်မြတ်ကြီး၏ စိန်ဖူးတော်၊ ငှက်မြတ်နားတော် တင်လှူပူဇာ်ပွဲ၊ ရေစက်ချအလှူတော်မင်္ဂလာပွဲနှင့် သံဃာတော် (၁၈၀) ပါးတို့အား ဆွမ်းဆန်စိမ်း လောင်းလှူပွဲ အလှူတော်မင်္ဂလာအခမ်းအနားကို ဧပြီလ ၂၇ ရက်နေ့၊ နံနက်ပိုင်းက စေတီတော်မြတ်ကြီး၏ ရင်ပြင်တော်ပေါ်၌ ကျင်းပပြုလုပ်ရာ ဆရာတော်၊ သံဃာတော် အရှင်သူမြတ်များ၊ မွန်ပြည်နယ် ဝန်ကြီးချုပ် ဦးအောင်ကြည်သိန်း၊ အရှေ့တောင်တိုင်း စစ်ဌာနချုပ် တိုင်းမှူး၊ ဗိုလ်မှူးချုပ် စိုးမင်း၊ ပြည်နယ်ဝန်ကြီးများ၊ အလှူရှင်များ၊ ဧည့်ပရိတ်သတ်များ တက်ရောက်သည်။
ရှေးဦးစွာ ပြည်နယ်ဝန်ကြီးချုပ်၊ တိုင်းမှူးတို့က စေတီတော်ပေါ်သို့ တင်လှူပူဇော်မည့် စိန်ဖူးတော်၊ ငှက်မြတ်နားတော်တို့အား ဆရာတော်ကြီးများထံ ဆက်ကပ်လှူဒါန်းခဲ့ကြပြီး စိန်ဖူးတော်၊ ငှက်မြတ်နားတော်တို့အား စေတီတော် လက်ယာရစ် သုံးပတ်လှည့်လည် ပင့်ဆောင်ပူဇော်ခဲ့ကြသည်။
ဆက်လက်ပြီး မင်္ဂလာအချိန်တွင် စိန်ဖူးတော်၊ ငှက်မြတ်နားတော်တို့အား စေတီတော်မြတ်ကြီးပေါ်သို့ ပင့်ဆောင်၍ ဆရာတော်ကြီးများမှ ဦးစီးအမှူးပြုကာ ပြည်နယ်ဝန်ကြီးချုပ်၊ တိုင်းမှူးနှင့် ပြည်နယ်ဝန်ကြီးများက စိန်ဖူးတော်၊ ငှက်မြတ်နားတော်တို့အား တင်လှူပူဇော်ခဲ့ကြသည်။
ထို့နောက် သမိုင်းဝင် မြသိန်းတန်စေတီတော်မြတ်ကြီး၏ စိန်ဖူးတော်၊ ငှက်မြတ်နားတော် တင်လှူပူဇာ်ခြင်း ရေစက်ချအလှူတော်မင်္ဂလာပွဲ အခမ်းအနားကို စေတီတော်မြတ်ကြီး၏ ဓမ္မာရုံတော်၌ ဆက်လက်ကျင်းပပြုလုပ်ရာ အခမ်းအနားကို နမောတဿ သုံးကြိမ်ရွတ်ဆို ဖွင့်လှစ်ခဲ့ပြီး ကရင်ပြည်နယ်၊ လှိုင်းဘွဲ့မြို့နယ်၊ မြိုင်ကြီးငူ၊ နန်းဦးကျောင်းတိုက်၏ ဦးစီးပဓာနနာယက မြိုင်ကြီးငူဆရာတော် ဘဒ္ဒန္တဉာဏိက အရှင်သူမြတ်ထံမှ ဧည့်ပရိတ်သတ်များက ငါးပါးသီလ ခံယူဆောက်တည်ခဲ့ကြပြီး ဆရာတော်သံဃာတော် အရှင်သူမြတ်များ ရွတ်ပွားသရဇ္ဈာယ် ချီးမြှင့်တော်မူသော မေတ္တသုတ် အစရှိသော ပရိတ်တရားတော်များ နာယူကြည်ညိုခဲ့ကြကာ ပြည်နယ်ဝန်ကြီးချုပ်၊ တိုင်းမှူးနှင့် ပြည်နယ်ဝန်ကြီးများက ဆရာတော်၊ သံဃာတော် အရှင်သူမြတ်များထံ လှူဖွယ် ဝတ္ထုပစ္စည်းများ ဆက်ကပ်လှူဒါန်း၍ လှူဒါန်းမှုအစုစုတို့အတွက် အနုမောဒနာ တရားနာယူ ကြည်ညိုပြီး ရေစက်သွန်းချ အမျှ ပေးဝေခဲ့ကြသည်။
အဲဒီနောက် ပြည်နယ်ဝန်ကြီးချုပ်၊ တိုင်းမှူးနှင့် ပြည်နယ်ဝန်ကြီးများ၊ အလှူရှင်များက သံဃာတော် (၁၈၀) ပါးတို့အား ဆွမ်း ဆန်စိမ်းများ လောင်းလှူခဲ့ကြသည်။
မွန်ပြည်နယ်အတွင်း စိုက်ပျိုးရေ၊ သုံးရေ၊ သောက်ရေ တို့အတွက် လိုအပ်သည့် ရေများရရှိရေး နည်းလမ်းများမှရှာဖွေဆောင်ရွက်၍ အကျိုးရှိစွာ အသုံးချနိုင်ရေးနှင့် မြစ်ကြီးများမှ ရေများကိုအသုံးချနိုင်ရေး လုပ်ငန်း ညှိနှိုင်းအစည်းအဝေးကို ယနေ့မွန်းလွဲပိုင်းက ပြည်နယ်အစိုးရအဖွဲ့ရုံး၊ အောင်ဆန်းခန်းမ၌ ကျင်းပပြုလုပ်ရာ ပြည်နယ်ဝန်ကြီးချုပ်က မွန်ပြည်အတွင်း စားနပ်ရိက္ခာဖူလုံရေးနှင့် စိုက်ပျိုးရေ၊ သောက်သုံးရေ လုံလောက်စွာရရှိရေး ဦးစားပေးကဏ္ဍအနေဖြင့် အထူးအလေးပေး ဆောင်ရွက်လျက်ရှိပါကြောင်း၊ ရေသည်အလွန် အဖိုးတန်သည့် အရင်းအမြစ်ဖြစ်ပြီး ရေရှည်သုံးစွဲသွားကြရမည် ဖြစ်သည့်အတွက် ရေအရင်းအမြစ်များကို စနစ်တကျထိန်းသိမ်း အသုံးပြုသွားကြရမည်ဖြစ်ကြောင်း၊ မွန်ပြည်နယ်အနေဖြင့် မိုးရွာသွန်းမှုများသော်လည်း မိုးရေများသည် မြစ်ချောင်းများအတွင်း လျင်မြန်စွာ စီးဆင်းသွားခြင်းကြောင့် နွေရာသီတွင် ရေရှားပါးမှုများကို မြို့နယ်အချို့များမှာ ကြုံတွေ့နေရသည့်အတွက် တွင်းတိမ်၊ တွင်းနက်၊ လက်တူးတွင်း၊ မြေသားကန်၊ စိမ့်စမ်းနှင့် အခြား ရေရရှိရေး လုပ်ငန်းများ ဆောင်ရွက်ခြင်း၊ မြစ်ရေတင်၊ ဆည်ရေတင်၊ စိမ့်စမ်းနှင့် တွင်းရေတင်အမျိုးအစားများဖြင့် စိုက်ပျိုးရေနှင့် သောက်သုံးရေ ဖူလုံစွာရရှိစေရေး ရေအရင်းအမြစ်များ ရှာဖွေဖော်ဆောင်ပေးခဲ့ကြောင်း၊ မိုးစပါး၊ နွေစပါးနှင့် ဆောင်းသီးနှံ နေကြာ ဆီထွက်သီးနှံများအား လျာထားချက်အတိုင်း အောင်မြင်စွာ စိုက်ပျိုးနိုင်ရေးအတွက် ဆည်မြောင်း၊ တာတမံ၊ မြစ်ရေတင်လုပ်ငန်းများမှ စိုက်ပျိုးရေများအား လုံလောက်စွာ ရရှိရေးအတွက် ကြိုတင် ပြင်ဆင်ထားရန် လိုအပ်ကြောင်း၊ သက်ဆိုင်ရာဌာနများ အနေဖြင့် စိုက်ပျိုးရေနှင့် သောက်သုံးရေ ဖူလုံစွာရရှိစေရေး ရေတို၊ ရေရှည်စီမံချက်များ ချမှတ်ပြီး အကောင်အထည်ဖော် ဆောင်ရွက်ကြရန်နှင့် လိုအပ်သည့်ရေများအား နည်းလမ်းပေါင်းစုံမှ ရရှိနိုင်ရေးအတွက် ဝိုင်းဝန်းအကြံပြုဆွေးနွေးပေးကြရန်ဖြင့် အမှာစကား ပြောကြားခဲ့သည်။
အဲဒီနောက် အစည်းအဝေးသို့ တက်ရောက်လာကြသည့် သက်ဆိုင်ရာ ဌာနဆိုင်ရာ တာဝန်ရှိသူများက စိုက်ပျိုးရေ၊ သုံးရေ၊ သောက်ရေ တို့အတွက် လိုအပ်သည့် ရေများရရှိရေး နည်းလမ်းများမှ ရှိနိုင်ရေးနှင့် မြစ်ကြီးများမှ ရေများကို အသုံးချနိုင်ရေး ဆောင်ရွက်ထားရှိမှု အခြေအနေများနှင့်ပတ်သက်၍ ကဏ္ဍများအလိုက် ရှင်းလင်းတင်ပြခဲ့ကြပြီး ပြည်နယ်ဝန်ကြီးများမှ ဖြည့်စွက်ဆွေးနွေးခဲ့ကြမှုအပေါ် ပြည်နယ်ဝန်ကြီးချုပ်က လိုအပ်သည်များကို ပေါင်းစပ်ညှိနှိုင်းဆောင်ရွက်ပေးခဲ့ကာ နိဂုံးချုပ်အမှာစကားပြောကြားခဲ့သည်။
