မော်လမြိုင်၊ ဧပြီ ၂၈
မွန်ပြည်နယ်ရင်းနှီးမြှုပ်နှံမှုကော်မတီ၏ (၁/၂၀၂၃) ကြိမ်မြောက်အစည်းအဝေးကို ဧပြီလ ၂၈ ရက်နေ့ ၊ မွန်းလွဲပိုင်းက ပြည်နယ်အစိုးရအဖွဲ့ရုံး၊ အောင်ဆန်းခန်းမ၌ ကျင်းပပြုလုပ်ခဲ့ရာ ပြည်နယ်ဝန်ကြီးချုပ် ဦးအောင်ကြည်သိန်း၊ ပြည်နယ်ဝန်ကြီးများ၊ ပြည်နယ်ရင်းနှီးမြှုပ်နှံမှုကော်မတီဝင်များ၊ တာဝန်ရှိသူများ တက်ရောက်သည်။
အစည်းအဝေးတွင် မွန်ပြည်နယ်ရင်းနှီးမြှုပ်နှံမှုကော်မတီ ဥက္ကဋ္ဌ၊ ပြည်နယ်ဝန်ကြီးချုပ်က မွန်ပြည်နယ်သည် စီးပွားရေးအရ အချက်အခြာကျသည့် နေရာတစ်ခုဖြစ်ပြီး ပြည်တွင်း၊ ပြည်ပရင်းနှီးမြှုပ်နှံမှု ဖိတ်ခေါ်၍ ရေရှည်ရင်းနှီးမြှုပ်နှံမှု လုပ်ငန်းများ ဆောင်ရွက်နိုင်ရေးကို အထူးအလေးထားဆောင်ရွက်လျက်ရှိပါကြောင်း၊ ပြည်နယ်တွင်း ကုန်ထုတ်လုပ်မှု လုပ်ငန်းတွင် MSME လုပ်ငန်းများသည် အရေးပါဆုံး အခန်းကဏ္ဍတွင် ပါဝင်သဖြင့် အားပေးဆောင်ရွက်ကြရန် လိုအပ်သလို ပြည်နယ်အတွင်း ရင်းနှီးမြုပ်နှံသူများ ပါဝင်သည့် စီးပွားရေးအခြေခံကောင်းများ တည်ဆောက်နိုင်ရေး ဆောင်ရွက်ကြရမည် ဖြစ်ကြောင်း၊ မွန်ပြည်နယ်အတွင်း ရင်းနှီးမြှုပ်နှံမှုလုပ်ငန်းများ ဆောင်ရွက်နေသည့် မြန်မာနိုင်ငံသားရင်းနှီးမြှုပ်နှံမှုလုပ်ငန်း (၅၄) ခု၊ နိုင်ငံခြားရင်းနှီး မြှုပ်နှံမှုလုပ်ငန်း (၃၇) ခုရှိသည့်အတွက် ဒေသနေပြည်သူများအား အလုပ်အကိုင်အခွင့်အလမ်းကောင်းများ များစွာဖန်တီးပေးနိုင်ခဲ့ကြောင်း၊ လျှပ်စစ်သုံး ယာဉ်နှင့် ဆက်စပ်လုပ်ငန်းများကို နိုင်ငံတော်၏ ဦးစားပေး မြှင့်တင်မည့် ရင်းနှီးမြှုပ်နှံမှုကဏ္ဍအဖြစ် သတ်မှတ်ခဲ့သည့်အတွက် အဆိုပါလုပ်ငန်းတွေမှာ ဝင်ငွေခွန် ကင်းလွတ်ခွင့် ခံစားရရှိနိုင်မည်ဖြစ်ပြီး ရင်းနှီးမြှုပ်နှံသူများ ပိုမိုစိတ်ပါဝင်စား၍ ရင်းနှီးမြှုပ်နှံမှု လုပ်ငန်းများ တိုးမြှင့်လုပ်ကိုင်ကြစေရေး ဆောင်ရွက်ကြပေးရန် လိုကြောင်း၊ ကော်မတီအနေဖြင့် ပြည်နယ်အတွင်း ရင်းနှီးမြှုပ်နှံမှုလုပ်ငန်းများအား အကြောင်းအမျိုးမျိုးကြောင့် ရပ်တန့်နေခြင်း၊ နှေင့်နှေးကြန့်ကြာနေခြင်း၊ ပြန်လည်ထွက်ခွါခြင်းများ မဖြစ်ပေါ်စေရန်၊ ရင်းနှီးမြှုပ်နှံသူ လုပ်ငန်းရှင်များ လုပ်သာကိုင်သာရှိစေရန်နှင့် ရင်းနှီးမြုပ်နှံမှုကဏ္ဍ ဖွံ့ဖြိုးတိုးတက်စေရေးအတွက် အလားလာကောင်းများရှိလာစေရေး ကူညီ ဆောင်ရွက်ပေးကြရန်ဖြင့် အမှာစကားပြောကြားသည်၊၊
အဲဒီနောက် ပြည်နယ်ရင်းနှီးမြှုပ်နှံမှုနှင့် ကုမ္ပဏီများညွှန်ကြားမှု ဦးစီးဌာန၊ ပြည်နယ်ဦးစီးမှူး ဦးတင်ထွန်းအောင်မှ မွန်ပြည်နယ်အတွင်း ဆောင်ရွက်မည့် ရင်းနှီးမြှုပ်နှံမှုလုပ်ငန်းများကို စိစစ်ရာတွင် လိုက်နာဆောင်ရွက်ရမည့် လုပ်ထုံးလုပ်နည်းများအား လည်းကောင်း၊ ရင်းနှီးမြုပ်နှံမှုကိစ္စရပ်များဆိုင်ရာ ခွင့်ပြုချက်တောင်းခံထားသည့်သည့် ကိစ္စရပ်များအား လည်းကောင်း ရှင်းလင်းတင်ပြခဲ့ပြီး ပြည်နယ်ဝန်ကြီးများနှင့် ကော်မတီဝင်များမှ ဖြည့်စွက်ဆွေးနွေး တင်ပြခဲ့ကြမှုအပေါ် ပြည်နယ်ဝန်ကြီးချုပ်က လိုအပ်သည်များကို ပေါင်းစပ်ညှိနှိုင်း ဆောင်ရွက်ပေးခဲ့ကာ နိဂုံးချုပ်အမှာစကားပြောကြားခဲ့သည်။
