မော်လမြိုင်၊ ဧပြီ ၂၉
မွန်ပြည်နယ်အတွင်း ဘုရား၊ စေတီပုထိုးများတွင် ဘုရားဖူးလာ အများပြည်သူများ သပ္ပါယ်ကြည်ညိုစွာနှင့် စိတ်အေးချမ်းမြေ့စွာ ဖူးမြော်နိုင်ရေးအတွက် စုပေါင်းသန့်ရှင်းရေး ကုသိုလ်ယူ ဆောင်ရွက်လျက်ရှိရာ မွန်ပြည်နယ်ဝန်ကြီးချုပ် ဦးအောင်ကြည်သိန်း၊ ပြည်နယ်ဝန်ကြီးများ၊ တာဝန်ရှိသူများသည် ဧပြီလ ၂၉ ရက်နေ့၊ နံနက်ပိုင်းက မော်လမြိုင်မြို့၊ ကျက်သရေဆောင် ကျိုက်သလ္လံစေတီတော်မြတ်ကြီး အရှေ့ဘက်မုဒ်တွင် ဌာနဆိုင်ရာဝန်ထမ်းများ၊ မီးသတ်တပ်ဖွဲ့ဝင်များ၊ လူမှုရေးအသင်းအဖွဲ့များ၊ အများပြည်သူများက စုပေါင်းသန့်ရှင်းရေး ကုသိုလ်ယူ ဆောင်ရွက်နေကြမှုအပေါ် ကြည့်ရှုအားပေးခဲ့ကြသည်။
အဲဒီနောက် ပြည်နယ်ဝန်ကြီးချုပ်က ဘုရား၊ စေတီ၊ ပုထိုးများ၏ ပရိဝုဏ် အတွင်း၊ အပြင် သန့်ရှင်းသာယာလှပစေရေး၊ စိမ်းလန်းစိုပြေစေရေး ဆောင်ရွက်ပေးကြရန်နှင့် အနယ်နယ်အရပ်ရပ်မှ ဘုရားဖူးလာပြည်သူများ အဆင်ပြေချောမွေ့စွာနှင့် စိတ်အေးချမ်းသာစွာ ဘုရားဖူးမြော်နိုင်ရေး ဝိုင်းဝန်း ဆောင်ရွက်ပေးကြရန် လမ်းညွှန်မှာကြားခဲ့သည်။
မွန်ပြည်နယ်အတွင်း မြို့နယ်အသီးသီးရှိ ဘုရား၊ စေတီပုထိုးများတွင် စုပေါင်းသန့်ရှင်းရေး ကုသိုလ်ယူ ဆောင်ရွက်ခြင်း၊ ရပ်ကွက်၊ ကျေးရွာများတွင် ပြည်သူ့အကျိုးပြု စုပေါင်းသန့်ရှင်းရေး ဆောင်ရွက်ခြင်းနှင့်
အခြေခံပညာ စာသင်ကျောင်းများတွင် ကျောင်းအကျိုးပြု စုပေါင်းသန့်ရှင်းရေး ဆောင်ရွက်ခြင်းတို့ကို အပတ်စဉ်ပုံမှန် ဆောင်ရွက်လျက်ရှိကြောင်း သိရှိရသည်။
မွန်ပြည်နယ် သံဖြူဇရပ်မြို့၊ ရာမညနိကာယ ဟံသာထောကျောင်းတိုက် သာသနာ့အဆောက်အအုံ ကျောင်းရေစက်ချ အလှူတော်မင်္ဂလာပွဲ နှင့် ဆရာတော် ဘဒ္ဒန္တသီလဝန္တ မဟာထေရ်မြတ်၏ ဝိဇာတမွေးနေ့ မင်္ဂလာပွဲ အခမ်းအနားကို ယနေ့နံနက်ပိုင်းက သံဖြူဇရပ်မြို့၊ ရာမညနိကာယ ဟံသာထောကျောင်းတိုက် ဓမ္မာရုံတော်၌ ကျင်းပပြုလုပ်ရာ ပြည်နယ်ဝန်ကြီးချုပ်၊ ပြည်နယ်ဝန်ကြီးများ၊ အလှူရှင် ဧည့်ပရိသတ်များက အခမ်းအနားကို နမောတဿ သုံးကြိမ်ရွတ်ဆို ဖွင့်လှစ်၍ သံဖြူဇရပ်မြို့၊ ရာမညနိကာယ ဟံသာထောကျောင်းတိုက်ကြီး၏ ဦးစီးပဓါန နာယက ဆရာတော် ဘဒ္ဒန္တသီလဝန္တ မဟာထေရ်မြတ်ထံမှ ငါးပါးသီလခံယူခဲ့ဆောက်တည်ခဲ့ကြပြီး သံဃာတော်အရှင်သူမြတ်များ ရွတ်ပွားသရဇ္ဈာယ်တော်မူသော ပရိတ်တရားတော်များ နာယူကြည်ညိုခဲ့ကြကာ ပြည်နယ်ဝန်ကြီးချုပ်က ဆရာတော်အရှင်သူမြတ်များထံ လှူဖွယ်ဝတ္ထုပစ္စည်းများ ဆက်ကပ်လှူဒါန်းခဲ့သည်။
ဆက်လက်ပြီး ပြည်နယ်ဝန်ကြီးချုပ်သည် သံဖြူဇရပ်မြို့၊ သန္တိသုခကျောင်းတိုက်ကြီး၏ ဦးစီးပဓါန နာယက ဆရာတော် ဘဒ္ဒန္တ သုနန္ဒ အရှင်သူမြတ်ကို ဖူးမျော်ကြည်ညို၍ သာသနာရေးဆိုင်ရာများ လျှောက်ထားခဲ့ပြီး လှူဖွယ်ဝတ္ထုပစ္စည်းများ ဆက်ကပ်လှူဒါန်းခဲ့ကာ ကျောင်းတိုက်ကြီး၏ လိုအပ်ချက်များကို ဖြည့်ဆည်းဆောင်ရွက်ပေးခဲ့သည်။
အဲဒီကမှတစ်ဆင့် ပြည်နယ်ဝန်ကြီးချုပ်နှင့် ပြည်နယ်ဝန်ကြီးများသည် ယနေ့နံနက််ပိုင်းက မုဒုံမြို့၊ အသောကာရာမ ပရိပတ္တိကျောင်းတိုက်သို့ ရောက်ရှိခဲ့ကြပြီး အသောကာရာမ ပရိယတ္တိစာသင်တိုက်ကြီး၏ ဦးစီးပဓါန နာယကဆရာတော် နိုင်ငံတော် ဗဟိုသံဃာ့ဝန်ဆောင် သာသနဓဇဓမ္မာစရိယ ဝိနယပါဠိပါရဂူ အရှင်မင်္ဂလာဘိဝံသကို ဖူးမြော်ကြည်ညိုခဲ့ကြကာ လှူဖွယ်ဝတ္ထုပစ္စည်းများ ဆက်ကပ်လှူဒါန်းခဲ့ကြသည်။
အဲဒီနောက် ပြည်နယ်ဝန်ကြီးချုပ်က သာသနာရေးဆိုင်ရာများ လျှောက်ထားခဲ့ပြီး ဆရာတော်ကြီးမှ နှစ်ရှည်လများ ထိန်းသိမ်းလာခဲ့သော အဖိုးတန်ကျောက်မြတ်ရတနာ ပစ္စည်းများအား ဘာသာရေး၊ သာသနာရေးနှင့် နိုင်ငံတော်အတွက် လိုအပ်သည့်နေရာများတွင် အသုံးပြုနိုင်စေရန် ပေးအပ်လှူဒါန်းခဲ့ပြီး လှူဒါန်းမှုအစုစုတို့အတွက် ရေစက်သွန်းချ အမျှ ပေးဝေခဲ့ကြသည်။
