မော်လမြိုင်၊ မေ ၁
(၇၇)နှစ်မြောက် မြန်မာနိုင်ငံမီးသတ်တပ်ဖွဲ့နေ့ကို ကြိုဆိုဂုဏ်ပြုသောအားဖြင့် မေလ ၁ ရက်နေ့၊ နံနက်ပိုင်းက၊ မွန်ပြည်နယ် ဝန်ကြီးချုပ် ဦးအောင်ကြည်သိန်း၊ အရှေ့တောင်တိုင်း စစ်ဌာနချုပ် တိုင်းမှူး၊ ဗိုလ်မှူးချုပ် စိုးမင်း၊ ပြည်နယ်ဝန်ကြီးများသည် မော်လမြိုင်မြို့၊ အမှတ်(၅) တပ်မတော် စစ်ဆေးရုံ၊ ကုတင်(၃၀၀)၊ ဓါတ်မှန်ဌာန၌ တပ်မတော် စစ်ဆေးရုံမှ တာဝန်ရှိသူများမှ ကိုယ်အလေးချိန်နှင့် သွေးပေါင်ချိန် တိုင်းတာခြင်း၊ သွေးအမျိုးအစား ခွဲခြားခြင်းနှင့် လိုအပ်သည့် ကျန်းမာရေးစစ်ဆေးခြင်းများ ဆောင်ရွက်ပေးခြင်းဖြင့် မီးသတ်တပ်ဖွဲ့ဝင်များ၏ စုပေါင်းသွေးလှူဒါန်းခြင်းအပေါ်ကြည့်ရှုအားပေးခဲ့ကြသည်။
ဆက်လက်ပြီး ပြည်နယ်ဝန်ကြီးချုပ်၊ တိုင်းမှူးနှင့် ပြည်နယ်ဝန်ကြီးများက စုပေါင်းသွေးလှူဒါန်းခဲ့ကြသည့် မီးသတ်တပ်ဖွဲ့ဝင်များအတွက် အားဆေးများ၊ ကြက်ဥနှင့် အဟာရဖြည့်စွက်စာများ၊ ထောက်ပံ့ငွေများ အသီးသီး ထောက်ပံ့ပေးအပ်ခဲ့ကြကာ ပြည်နယ်ဝန်ကြီးချုပ်က ရင်းရင်းနှီးနှီး အားပေးစကားပြောကြားခဲ့သည်။
အဲဒီနောက် ပြည်နယ်ဝန်ကြီးချုပ်နှင့် တိုင်းမှူးတို့က အမှတ်(၅) တပ်မတော် စစ်ဆေးရုံ၊ ကုတင်(၃၀၀)တွင် ကျန်းမာရေး ကုသစောင့်ရှောက်မှုလုပ်ငန်းများ ဆောင်ရွက်ပေးနေခြင်းအပေါ် ကြည့်ရှုအားပေးခဲ့ကြပြီး ပြည်နယ်ဝန်ကြီးချုပ်က ဆေးရုံတွင် တက်ရောက် ဆေးကုသမှု ခံယူလျက်ရှိသည့် ရောဂါဝေဒနာရှင်များအား လိုက်လံ အားပေးစကားပြောကြားကာ ထောက်ပံ့ငွေများ ပေးအပ်၍ ဆေးရုံအတွက် လိုအပ်သည်များအား ဖြည့်ဆည်းဆောင်ရွက်ပေးခဲ့သည်။
မွန်ပြည်နယ်အတွင်း မြို့နယ်အသီးသီးတွင် မြို့ပြနှင့် ကျေးလက်နေပြည်သူများအားလုံး ကျန်းမာရေးစောင့်ရှောက်မှုများ အရည်အသွေး ပြည့်မီစွာ ရရှိနိုင်ရေး၊ ကျန်းမာရေးအဆင့်မြှင့်တင်ရေး၊ ကြိုတင်ကာကွယ်ရေး၊ ရောဂါကုသရေး လုပ်ငန်းများအား စဉ်ဆက်မပြတ် ဆောင်ရွက်ပေးလျက်ရှိကြောင်း သိရှိရသည်။
