မော်လမြိုင်၊ မေ ၃
မြန်မာသက္ကရာဇ် ၁၃၈၅ ခုနှစ်၊ ကဆုန်လပြည့်နေ့ (ဗုဒ္ဓနေ့) ၊ မွန်ပြည်နယ်၊ မော်လမြိုင်မြို့၊ တောင်ရိုးတန်းရှိ မဟာမြတ်မုနိရုပ်ပွားတော်မြတ်ကြီးအား မျက်နှာတော်သစ် ရောင်တော်ဖွင့် အခမ်းအနားကို မေလ ၃ ရက်နေ့၊ နံနက်ပိုင်းက မဟာမြတ်မုနိရုပ်ပွားတော်မြတ်ကြီးကိန်းဝပ်စံပါယ်တော်မူရာ ဂန္ဓကုဋီတိုက်အတွင်း၌ ကျင်းပပြုလုပ်ရာ မွန်ပြည်နယ်ဝန်ကြီးချုပ် ဦးအောင်ကြည်သိန်း၊ အရှေ့တောင်တိုင်း စစ်ဌာနချုပ် တိုင်းမှူး ဗိုလ်မှူးချုပ် စိုးမင်း၊ ပြည်နယ်၀န်ကြီးများ၊ တာဝန်ရှိသူများတက်ရောက်သည်။
ရှေးဦးစွာ ပြည်နယ်ဝန်ကြီးချုပ်၊ တိုင်းမှူးနှင့် ပြည်နယ်ဝန်ကြီးများက မဟာမြတ်မုနိရုပ်ပွားတော်မြတ်ကြီးအား ဖူးမြှော်ကြည်ညို၍ ပန်း၊ ဆီမီး၊ ရေချမ်းများကပ်လှူပူဇော်ခဲ့ကြသည်။
ဆက်လက်ပြီး ပြည်နယ်ဝန်ကြီးချုပ်နှင့် တိုင်းမှူးတို့က မဟာမြတ်မုနိရုပ်ပွားတော်မြတ်ကြီးအား မျက်နှာတော်သစ် ရောင်တော်ဖွင့်ပူဇော်ခဲ့ကြသည်။
အဲဒီနောက် မဟာဗောဓိညောင်ပင်၌ ၁၃၈၅ ခုနှစ်၊ ကဆုန်လပြည့်(ဗုဒ္ဓနေ့)၊ ညောင်ရေသွန်းပွဲ အခမ်းအနားကို မဟာမြတ်မုနိရုပ်ပွားတော်မြတ်ကြီး၊ အနောက်ဘက်မုဒ်ရှိ မဟာဗောဓိညောင်ပင်၌ ကျင်းပပြုလုပ်ရာ ပြည်နယ်ဝန်ကြီးချုပ်၊ တိုင်းမှူးနှင့် ပြည်နယ်ဝန်ကြီးများက ကဆုန်ညောင်ရေ သွန်းလောင်းပူဇော်ရန် မဟာဗောဓိပင် အရပ်လေးမျက်နှာတွင် နေရာယူခဲ့ကြပြီး နမောတဿ သုံးကြိမ်ဘုရား ကန်တော့ဖွင့်လှစ်ပြီး ဝတ်အသင်းအဖွဲ့များက နဂါး၊ ဂဠုန်၊နတ်၊ ဗြဟ္မာ၊အပေါင်း တို့အား ညောင်ရေသွန်းလောင်း ကြွေးကြော်သံ ဂါထာတော်များ ရွတ်ဖတ်ပူဇော်၍ မဟာဗောဓိ ညောင်ပင်အား အမွှေးနံ့သာရေများ ပက်ဖြန်းပူဇော် ညောင်ရေသွန်းလောင်းခဲ့ကြကာ ဆုတောင်းပတ္တနာပြု ကဗျာများ ရွတ်ဆို ပူဇော်ခြင်း၊ ဇယန္တော ဗောဓိယာ အောင်ဂါထာကို ရွတ်ဆိုပူဇော်ခြင်းတို့ ဆောင်ရွက်ခဲ့ကြကာ အခမ်းအနားကို “ဗုဒ္ဓသာသနံ စိရံ တိဋ္ဌတု” သုံးကြိမ် ရွတ်ဆိုဆုတောင်း ရုပ်သိမ်းခဲ့ကြသည်။
အဲဒီကမှတစ်ဆင့် ပြည်နယ်ဝန်ကြီးချုပ်နှင့် တိုင်းမှူးတို့သည် မော်လမြိုင်မြို့၊ သမိုင်းဝင် (လေးကျွန်းသစ္စာရှင်) နဂါးမောက် စေတီတော်မြတ်ကြီးသို့ရောက်ရှိခဲ့ကြပြီး စေတီတော်မြတ်ကြီးကို ဖူးမြှော်ကြည်ညို၍ ပန်း၊ ဆီမီး၊ ရေချမ်းများကပ်လှူပူဇော်ခဲ့ကြသည်။
အဲဒီနောက် ဆရာတော်ကြီးများက ဦးစီးအမှူးပြု၍ ပြည်နယ်ဝန်ကြီးချုပ်၊ တိုင်းမှူးနှင့် ပြည်နယ်ဝန်ကြီးများမှ စေတီတော်မြတ်ကြီး၊ ရင်ပြင်တော်ပေါ်ရှိ မဟာဗောဓိ ညောင်ပင်အား အမွှေးနံ့သာရေများ ပက်ဖြန်းပူဇော် ညောင်ရေသွန်းလောင်းခဲ့ကြပြီး ဇယန္တော ဗောဓိယာ အောင်ဂါထာကို ရွတ်ဆိုပူဇော်ခဲ့ကာ ပြည်နယ်ဝန်ကြီးချုပ်နှင့် တိုင်းမှူးတို့က နဂါးမောက် စေတီတော်မြတ်ကြီးရင်ပြင်တော်တွင် နေ့စဉ် ပုံမှန် စတုဒီသာကျွေးမွေးခြင်းဖြင့် ဘုရားဖူးလာ အများပြည်သူများ စည်ကားသိုက်မြိုက်နေမှုအပေါ် ကြည်နူးဝမ်းမြောက် သဒ္ဓါကုသိုလ်ယူခဲ့ကြသည်။
မွန်ပြည်နယ် ၁၃၈၅ ခုနှစ်၊ ကဆုန်လပြည့်(ဗုဒ္ဓနေ့)၊ ဆွမ်းဆန်စိမ်းလောင်းလှူပွဲ အခမ်းအနားကို ယနေ့နံနက်ပိုင်းက မော်လမြိုင်မြို့၊ မဟာမြတ်မုနိရုပ်ပွားတော်မြတ်ကြီး ပရိဝုဏ်၌ ကျင်းပြုလုပ်ရာ ပြည်နယ်ဝန်ကြီးချုပ်၊ တိုင်းမှူး၊ ပြည်နယ်ဝန်ကြီးများ၊ ဌာနဆိုင်ရာများ၊ အလှူရှင်များက သံဃာတော်(၃၁၅)ပါးအား ဆွမ်းဆန်စိမ်းလောင်းလှူခဲ့ကြသည်။
