မော်လမြိုင်၊ မေ ၆
မွန်ပြည်နယ်အတွင်း အခြေခံပညာ စာသင်ကျောင်းများမှာ သန့်ရှင်း၍ စိမ်းလန်းစိုပြေပြီး ဥပဓိရုပ် ကောင်းမွန်စေရေး၊ ကျောင်းသူ၊ ကျောင်းသားများ စိတ်အေးချမ်းမြေ့စွာ ပညာသင်ကြားနိုင်ရေး အလေးထား ဆောင်ရွက်လျက်ရှိရာ မွန်ပြည်နယ် ဝန်ကြီးချုပ် ဦးအောင်ကြည်သိန်း၊ အရှေ့တောင်တိုင်း စစ်ဌာနချုပ်တိုင်းမှူး ဗိုလ်မှူးချုပ်စိုးမင်း၊ ပြည်နယ်ဝန်ကြီးများနှင့်တာဝန်ရှိသူများသည် မေလ ၆ ရက်နေ့၊ နံနက်ပိုင်းက မော်လမြိုင်မြို့၊ အမှတ်(၅) အခြေခံပညာ အလယ်တန်းကျောင်းဝင်းအတွင်း ခြုံနွယ်များ၊ မြက်များနှင့် အမှိုက်များအား ဌာနဆိုင်ရာများ၊ တပ်မတော်သားများ၊ မြန်မာနိုင်ငံရဲတပ်ဖွဲ့၊ မီးသတ်တပ်ဖွဲ့ဝင်များ၊ လူမှုရေးအသင်းအဖွဲ့များ၊ ရပ်ကွက်နေပြည်သူများက စာသင်ကျောင်း စိမ်းလန်းစိုပြေစေရေးနှင့် သန့်ရှင်း သာယာလှပစေရေးအတွက် ကျောင်းအကျိုးပြု စုပေါင်းသန့်ရှင်းရေး ဝိုင်းဝန်း ဆောင်ရွက်နေကြမှုအပေါ် ကြည့်ရှုအားပေးခဲ့သည်။
ထို့နောက် ပြည်နယ်ဝန်ကြီးချုပ်က စာသင်ကျောင်းများ ကျောင်းအင်္ဂါရပ်နှင့် ကိုက်ညီမှုရှိပြီး စိမ်းလန်းစိုပြေ၍ သန့်ရှင်းသာယာလှပမှုရှိစေရန်၊ ကျောင်းအကျိုးပြုလုပ်ငန်းများနှင့် ပတ်သက်၍ ဝိုင်းဝန်းဆောင်ရွက်ပေးကြရန် လမ်းညွှန်မှာကြားခဲ့ပြီး ကျောင်းတာဝန်ရှိသူများနှင့် တွေ့ဆုံ၍ ကျောင်း၏ လိုအပ်ချက်များအား ဖြည့်ဆည်းဆောင်ရွက်ပေးခဲ့သည်။
မော်လမြိုင်မြို့ ကျက်သရေဆောင် ကျိုက်သလ္လံစေတီတော်မြတ်ကြီး၏ အန္တရာယ်ကင်း အသံမစဲမဟာပဋ္ဌာန်း ဖွင့်ပွဲ အခမ်းအနားကို ယနေ့နံနက်ပိုင်းက စေတီတော်မြတ်ကြီး၊ ရင်ပြင်တော်၊ ပဋ္ဌာန်းဓမ္မာရုံ၌ ကျင်းပပြုလုပ်ရာ ရှေးဦးစွာ ပြည်နယ်ဝန်ကြီးချုပ်၊ တိုင်းမှူးတို့က စေတီတော်မြတ်ကြီးကို ဖူးမြှော်ကြည်ညို၍ ပန်း၊ ဆီမီး၊ ရေချမ်းများ ကပ်လှူပူဇော်ခဲ့ကြသည်။
ထို့နောက် အခမ်းအနားကို နမောတဿ သုံးကြိမ်ရွတ်ဆို ဖွင့်လှစ်၍ မော်လမြိုင်မြို့၊ ရွှေတောင်ကျောင်း တိုက်ဆရာတော် အဂ္ဂမဟာ သဒ္ဓမ္မ ဇောတိကဓဇ၊ ဓမ္မကထိက ဗဟုဇန ဟိတဓရ ဘဒ္ဒန္တ ဝိမလ ထံမှ ငါးပါးသီလခံယူဆောက်တည်ခဲ့ကြပြီး မော်လမြိုင်မြို့၊ ပိဋကတ်တိုက်ကျောင်းစာသင်တိုက်၏ ဦးစီးပဓါနနာယက၊ မြို့နယ်သံဃနာယကအဖွဲ့၊ အဖွဲ့ဝင်၊ ပရိယတ္တိပထမကျော်နှင့် ဓမ္မာစရိယ ငါးဘွဲ့ရ ဆရာတော် ဘဒ္ဒန္တပညာဝံသက ပဋ္ဌာန်းရောင်ခြည်တော်ဖွင့် ဂါထာကို ရွတ်ဖတ်ပူဇော်၍ ပြည်နယ်ဝန်ကြီးချုပ်က ဆရာတော်ကြီးများထံ ပဋ္ဌာန်းကျမ်းစာအုပ်၊ ပဋ္ဌာန်းရေအိုးများ ဆက်ကပ်လှူဒါန်းခဲ့သည်။
ဆက်လက်ပြီး ပြည်နယ်ဝန်ကြီးချုပ်၊ တိုင်းမှူးနှင့် ပြည်နယ်ဝန်ကြီးများက သံဃာတော်အရှင်သူမြတ်များ ရွတ်ပွားသရဇ္ဈာယ်မူသော ပရိတ် တရားတော်များ နာယူကြည်ညိုခြင်း၊ လှူဖွယ်ဝတ္ထုပစ္စည်းများ ဆက်ကပ်လှူဒါန်းခြင်းတို့ ဆောင်ရွက်ခဲ့ကြကာ လှူဒါန်းမှုအစုစုတို့အတွက် အနုမောဒနာ တရားနာယူ ကြည်ညိုပြီး ရေစက်သွန်းချ အမျှ ပေးဝေခဲ့ကြသည်။
အဲဒီနောက် ဆရာတော် သံဃာတော်အရှင်သူမြတတ်များမှ ဦးဆောင်၍ ပရိတ်သတ်အားလုံးမှ ပဋ္ဌာန်း ပစ္စယုဒ္ဒေသ ပါဠိတော်ကို သုံးကြိမ် သံပြိုင် ရွတ်ဖတ်ပူဇော်ခြင်း၊ ပဋ္ဌာန်းဒေသနာတော် ရွတ်ဖတ်ရန် တိုက်တွန်းလွှာ ဂါထာကို ရွတ်ဖတ်ပူဇော်ခြင်းနှင့် ဗုဒ္ဓသာသနံ စိရံတိဋ္ဌတု သုံးကြိမ်ရွတ်ဆို ဆုတောင်းခြင်းတို့ဖြင့် အခမ်းအနားကို ရုပ်သိိမ်းခဲ့ကြသည်။
မွန်ပြည်နယ် ဗုဒ္ဓဘာသာကလျာဏယုဝအသင်း (YMBA) တတိယအကြိမ် (၃၈)ဖြာ မင်္ဂလာယဉ်ကျေးလိမ္မာသင်တန်း(အငယ်တန်း) (၁၀)မြို့နယ် စုပေါင်းသင်တန်းဖွင့်ပွဲ အခမ်းအနားကို ယနေ့နံနက်ပိုင်းက မော်လမြိုင်မြို့၊ ပြည်နယ်ခန်းမ၌ ကျင်းပပြုလုပ်ရာ ပြည်နယ်ဝန်ကြီးချုပ်၊ အရှေ့တောင်တိုင်းစစ်ဌာနချုပ် တိုင်းမှူး၊ ပြည်နယ်ဝန်ကြီးများ၊ တာဝန်ရှိသူများ တက်ရောက်၍ အခမ်းအနားတွင် တေးသံရှင်များမှ ဂုဏ်ပြုတေးသီချင်းများ၊ အကအလှများဖြင့် ဖျော်ဖြေတင်ဆက်ခဲ့ကြပြီး ပြည်နယ်ဝန်ကြီးချုပ်က မွန်ပြည်နယ်အတွင်း ဘာသာ၊ သာသနာရေးဆိုင်ရာများ၊ ရိုးရာယဉ်ကျေးမှုဆိုင်ရာများ၊ ဓလေ့ထုံးစံ ထိန်းသိမ်းရေးဆိုင်ရာများဆောင်ရွက်လျက်ရှိတဲ့အနက် ဗုဒ္ဓဝင်နှင့် (၃၈) ဖြာ မင်္ဂလာယဉ်ကျေးလိမ္မာသင်တန်းများဖွင့်လှစ်ခြင်းလုပ်ငန်းကို အလေးထား၊ ဦးစားပေး ဆောင်ရွက်လျက်ရှိပါကြောင်း၊
မြို့နယ်အသီးသီးတွင် ဗုဒ္ဓဘာသာကလျာဏယုဝအသင်း (YMBA) ကြီးမှူးပြီး သားငယ်၊ သမီးငယ်များအတွက် မြတ်ဗုဒ္ဓမိန့်ဆို ဟောကြားခဲ့တဲ့( ၃၈) ဖြာမင်္ဂလာတရားတော်များကို ယဉ်ကျေးလိမ္မာ သင်တန်းများအဖြစ် တစ်ပြိုင်နက် ဖွင့်လှစ်ပို့ချသင်ကြားပေးသွားမည် ဖြစ်ကြောင်း၊ ဗုဒ္ဓဘာသာကလျာဏယုဝအသင်းမှ နှစ်စဉ်သင်တန်းများ ဖွင့်လှစ်ပေးနိုင်ခဲ့ပြီး စာမေးပွဲများ ကျင်းပပေးခြင်း၊ ထူးချွန်သူများ၊ အထူးအောင်သူများ၊ ရိုးရိုးအောင်သူများကို ဆုများ ချီးမြှင့်ပေးခြင်းဖြင့် အားပေးချီးမြှောက်လျက်ရှိသည့်အတွက် အထူးပင်ဝမ်းမြောက်ဂုဏ်ယူမိပါကြောင်း၊ နှစ်စဉ် မင်္ဂလာသင်တန်းများ ဖွင့်လှစ်နိုင်ရေး၊ အသင်းရဲ့ လုပ်ငန်းများ အဆင်ပြေ စွာဆောင်ရွက်နိုင်ရေး အဖက်ဖက်မှ ကူညီဆောင်ရွက်ပေးသွားမည်ဖြစ်ကြောင်း၊ (၃၈)ဖြာမင်္ဂလာယဉ်ကျေးလိမ္မာသင်တန်းသို့ တက်ရောက်ကြမည့် သားငယ်၊ အမီးငယ်လေးများအနေဖြင့် ယခုလိုငယ်ရွယ်စဉ်ကာလမှာ လိမ္မာ ရေးခြားရှိပြီး အသိပညာကြွယ်ဝရန်၊ အမျိုး ဘာသာ၊ သာသနာကို ကာကွယ်နိုင်တဲ့အသိအမြင်ရှိရန်နှင့် လူ့လောကအလယ်မှာ ကျင်လည်စဉ် လိုက်နာရမယ့်ကျင့်ဝတ်များ နားလည်တတ်မြောက်ထားရန် အထူးလိုအပ်ပြီး တန်ဘိုးရှိသည့် အသိပညာများရရှိရေး အထူးကြိုးစားသင်ယူမှတ်သားကြရန် မှာကြားလိုကြောင်းဖြင့် အမှာစကားပြောကြားခဲ့သည်။
ဆက်လက်ပြီး မွန်ပြည်နယ် ဗုဒ္ဓဘာသာကလျာဏယုဝအသင်း (YM BA) ဥက္ကဋ္ဌ ဦးကြည်သိန်းက ဗုဒ္ဓ ဘာသာကလျာဏယုဝအသင်းမှ သင်တန်းများဖွင့်လှစ်ခြင်းများနှင့် ပတ်သက်၍ ရှင်းလင်းတင်ပြခဲ့ပြီး ပြည်နယ်ဝန်ကြီးချုပ်၊ တိုင်းမှူး၊ ပြည်နယ်ဝန်ကြီးများက ဒုတိယအကြိမ် (၃၈)ဖြာမင်္ဂလာနှင့် ယဉ်ကျေးလိမ္မာစာမေးပွဲ၌ အငယ်တန်း၊အလတ်တန်း၊ အကြီးတန်း ထူးချွန်သည့် ကျောင်းသူ၊ ကျောင်းသားများအား ဂုဏ်ပြုဆုများနှင့် ဂုဏ်ပြုမှတ်တမ်းလွှာများ အသီးသီးပေးအပ်ခဲ့ချီးမြှင့် ခဲ့ကြသည်။
ထို့နောက် ပြည်နယ်အစိုးရအဖွဲ့ အတွင်းရေးမှူး ဦးတိုးဝင်းမှ (၃၈)ဖြာ မင်္ဂလာယဉ်ကျေးလိမ္မာသင်တန်းအတွက် မွန်ပြည်နယ်အစိုးရအဖွဲ့ မှ လှူဒါန်းငွေ ကျပ်သိန်း(၁၁၀)အား ပေးအပ်လှူဒါန်းခဲ့ပြီး၊ မွန်ပြည်နယ် ဗုဒ္ဓဘာသာကလျာဏယုဝအသင်း (YM BA)မှ ၂ဝ၂၂ခုနှစ်၊ အခြေခံ ပညာ ဒဿမတန်းတွင် မြန်မာစာဂုဏ်ထူးဖြင့် အောင်မြင်သည့် ကျောင်းသား၊ ကျောင်းသူ (၃၃၀) ဦး အတွက် ဂုဏ်ပြုမှတ်တမ်းလွှာများအား လည်းကောင်း၊ မွန်ပြည်နယ် (၁၀)မြို့နယ်၌ ဖွင့်လှစ်မည့် (၃၈)ဖြာမင်္ဂလာယဉ်ကျေးလိမ္မာသင်တန်းများအတွက် သင်တန်းသားကိုင်ပုံနှိပ်စာအုပ်များအား လည်းကောင်း ပေးအပ်ခဲ့ကြကာ ဗုဒ္ဓဘာသာကလျာဏယုဝအသင်း၏ အမျိုး၊ ဘာသာ၊ သာသနာ၊ ပညာလုပ်ငန်းများအတွက် လှူဒါန်းခဲ့ကြသည့် အလှူရှင်များအား ဂုဏ်ပြုမှတ်တမ်းလွှာများ အသီးသီးပေးအပ်ခဲ့ကြသည်။
အဲဒီနောက် ပြည်နယ်ဝန်ကြီးချုပ်၊ တိုင်းမှူးတို့က မော်လမြိုင်မြို့နယ်၊ ဗုဒ္ဓဘာသာကလျာဏယုဝအသင်းမှ သားငယ်သမီးငယ်များမှ (၃၈)ဖြာမင်္ဂလာ တေးကဗျာ သရုပ်ဖေါ်ဖြင့် ဖျော်ဖြေခဲ့ကြမှုအပေါ် ကြည့်ရှုအားပေးခဲ့ကြသည်။
အဲဒီကမှတစ်ဆင့် ပြည်နယ်ဝန်ကြီးချုပ်၊ တိုင်းမှူးနှင့် ပြည်နယ်ဝန်ကြီးများသည် မုဒုံမြို့နယ်၊ ကျောက်တလုံးကျေးရွာ၊ ဆုတောင်းပြည့် ဆရီမဟာစူဠာမဏိ ဘုရားကျောင်း၌ ပြုလုပ်ကျင်းပသည့် (၁၆၀)ကြိမ်မြောက် ဆုတောင်းပြည့် ဆရီမဟာစူဠာမဏိ ဟိန္ဒူဘာသာရေးပွဲတော်သို့ တက်ရောက်ခဲ့ကြပြီး ဟိန္ဒူဘာသာရေးထုံးစံအရ အဓိဌာန်ပြုဆုတောင်းခြင်းများ၊ ဂုဏ်ပြုရွတ်ဖက် ဆုတောင်းပေးခြင်းများ ဆက်လက်ဆောင်ရွက်ခဲ့ကြကာ ပြည်နယ်ဝန်ကြီးချုပ်က ဆရီမဟာစူဠာမဏိ ဘုရားကျောင်းအတွက် အလှူငွေများ ပေးအပ်လှူဒါန်းခဲ့သည်။
