မော်လမြိုင်၊ မေ ၇
မွန်ပြည်နယ်၊ မော်လမြိုင်မြို့၊ မောင်ငံရပ်ကွက်၊ နတ်မှော်ကျောင်းတိုက် ဦးစီးပဓာနနာယကဆရာတော် သက်တော်(၈၈) နှစ်၊ သိက္ခါတော်(၆၈) ရှိနိုင်ငံတော်ဩဝါဒါစရိယ အဂ္ဂမဟာပဏ္ဍိတ ကျေးဇူးတော်ရှင် ဘဒ္ဒန္တသုမနာဘိဝံသမဟာထေရ်မြတ်၏ အန္တိမအဂ္ဂိဈာပနပူဇာ အခမ်းအနားကို မေလ ၇ က်နေ့၊ နေ့လယ်ပိုင်းက မော်လမြိုင်မြို့၊ နတ်မှော်ကျောင်းတိုက် ဓမ္မာရုံတော်၌ ကျင်းပပြုလုပ်ရာ ဆရာတော်၊ သံဃာတော် အရှင်သူမြတ်များ၊ မွန်ပြည်နယ် ဝန်ကြီးချုပ် ဦးအောင်ကြည်သိန်း၊ ပြည်နယ်ဝန်ကြီးများ၊ တာဝန်ရှိသူများ၊ ဒါယကာ၊ ဒါယိကာမများ၊ တက်ရောက်သည်။
ရှေးဦးစွာ အခမ်းအနားကို သဗ္ဗေသင်္ခါရာအနိစ္စာ အစရှိသော သုံးဂါထာတို့ကိုရွတ်ဆို၍ ဖွင့်လှစ်ခဲ့ပြီး နိုင်ငံတော် သံဃမဟာနာယက အဖွဲ့ဝင်၊ မော်လမြိုင်မြို့၊ လှိုင်ရပ်ကွက်အတုလရန်အောင် ကျောင်းတိုက်ကြီး၏ ဦးစီးပဓာနနာယက ဆရာတော် အဂ္ဂမဟာဂန္ထဝါစကပဏ္ဍိတ ဘဒ္ဒန္တကောသလ္လ အရှင်သူမြတ်ထံမှ သီလတော်မြတ်များ ခံယူဆောက်တည်ခဲ့ကြသည်။
ဆက်လက်ပြီး ပြည်နယ်ဝန်ကြီးချုပ်က သာသနာရေးဝန်ကြီးဌာနမှ လှူဒါန်းသော ဘွဲ့တော်ပါ စိန်ကုတ္တိပါအား ဆရာတော်ကြီး၏ ရုပ်ကလာပ်တော်အပေါ်သို့ လွှမ်းခြုံပူဇော်ခဲ့ပြီး အလှူငွေများပေးအပ်လှူဒါန်းခဲ့သည်။
အဲဒီနောက် ပြည်နယ်ဝန်ကြီးချုပ်နှင့် ပြည်နယ်ဝန်ကြီးများက ဆရာတော်အရှင်သူမြတ်များထံ လှူဖွယ်ဝတ္ထုများပစ္စည်းများ ဆက်ကပ်လှူဒါန်းခဲ့ကြပြီး ဆရာတော်၊ သံဃာတော်အရှင်မြတ်များမှ ဆရာတော်ကြီး၏ အတုယူဖွယ်ရာ ကြည်ညိုဖွယ်ရာ ဂုဏ်ပြုဖွယ်ရာ ထေရုပ္ပတ္တိအကျဉ်းချုပ် ဖတ်ကြားခြင်း၊ နိုင်ငံတော် သံဃမဟာနာယကအဖွဲ့မှ ပေးပို့သော သံဝေဂဉာဏ်ပွားများကြောင်း သဝဏ်လွှာ ဖတ်ကြားခြင်း၊ ပစ္ဆိမဝန္ဒနာဂါထာကို ဖတ်ကြားခြင်းနှင့် အစ္စယောမံဘန္တေစသော တောင်းပန်ကန်တော့လွှာဖြင့် တောင်းပန်ကန်တော့ခြင်းတို့ ဆောင်ရွက်ခဲ့ကြသည်။
အဲဒီနောက် မော်လမြိုင်မြို့၊ အောင်မေတ္တာကျောင်းတိုက် ဦးစီးပဓါနနာယက ဆရာတော် ဘဒ္ဒန္တ အဂ္ဂဝံသထံမှ ဓမ္မသံဝေဂ တရားတော် နာကြား၍ ရေသွန်းချအမျှပေးဝေခဲ့ကြပြီး ပြည်နယ်ဝန်ကြီးချုပ်နှင့် ပြည်နယ်ဝန်ကြီးများက ဆရာတော်ကြီး၏ ဥတုဇရုပ်ကလာပ်တော်အား နိဗ္ဗာန်ယာဥ်တော်ပေါ်သို့ ပင့်ဆောင်ခဲ့ပူဇော်ခဲ့ကြပြီး အခမ်းအနားကို အနိစ္စာဝတသင်္ခါရာ အစရှိသော သုံးဂါထာတို့ဖြင့် ရုပ်သိမ်းခဲ့သည်။
