မော်လမြိုင်၊ မေ ၁၄
ကျောင်းသား၊ ကျောင်းသူ မျိုးဆက်သစ်လူငယ်မောင်မယ်များကို နွေရာသီ ကျောင်းပိတ်ရက်ကာလအတွင်း အသိပညာများဖွံ့ဖြိုးတိုးတက်စေရန်၊ အားလပ်ရက် များအကျိုးရှိစေရန်၊ မိမိဝါသနာပါသည့် ပညာရပ်များကို လေ့လာဆည်းပူးနိုင်စေရန် နှင့် နိုင်ငံတော်အတွက် ရေကြောင်းပညာ၊ လေကြောင်းပညာကျွမ်းကျင်သော အနာဂတ်မျိုးဆက်သစ်လူငယ်များ ပေါ်ထွန်းလာစေရန်ရည်ရွယ်၍ မွန်ပြည်နယ်နယ်အတွင်းရှိ သင်တန်းစခန်းများတွင် တပ်မတော်(ရေ)မှ ရေကြောင်းလူငယ်အခြေခံနှင့် တန်းမြင့်သင်တန်းများ၊ တပ်မတော်(လေ) မှ အခြေခံလေကြောင်း လူငယ်သင်တန်း (အငယ်တန်းအဆင့်) သင်တန်းများကို ဧပြီ ၂၄ ရက်တွင် တစ်ပြိုင်တည်း စတင်ဖွင့်လှစ်ခဲ့ပြီး လေ့ကျင့် သင်ကြားပေးခဲ့ပါသည်။
တပ်မတော် ကာကွယ်ရေး ဦးစီးချုပ် (ရေ)၊ တပ်မတော် ကာကွယ်ရေး ဦးစီးချုပ် (လေ)၊ မွန်ပြည်နယ်အစိုးရအဖွဲ့နှင့် အရှေ့တောင်တိုင်းစစ်ဌာနချုပ်တို့မှ ပူးပေါင်းစီစဉ်ဖွင့်လှစ်သော မော်လမြိုင်သင်တန်းစခန်း ရေကြောင်းလူငယ်အခြေခံနှင့် တန်းမြင့်သင်တန်းများမှ သင်တန်းသူ၊ သင်တန်းသားများအား ဂုဏ်ပြုထောက်ပံ့ငွေပေးအပ်ခြင်း အခမ်းအနားကို မေလ ၁၄ ရက်နေ့၊ နံနက်ပိုင်းက မော်လမြိုင်မြို့၊ မောရဝတီရေတပ်စခန်းဌာနချုပ်၊ အမှတ် (၄၆) စစ်ရေယာဉ်စု အကူရေယာဉ်အုပ် (မော်လမြိုင်သင်တန်းစခန်း)၌ ကျင်းပပြုလုပ်ရာ မွန်ပြည်နယ်ဝန်ကြီးချုပ် ဦးအောင်ကြည်သိန်း၊ အရှေ့တောင်တိုင်း စစ်ဌာနချုပ် တိုင်းမှူး ဗိုလ်မှူးချုပ် စိုးမင်း၊ ပြည်နယ်၀န်ကြီးများ၊ တပ်မတော်အရာရှိကြီးများ၊ တာဝန်ရှိသူများ တက်ရောက်ခဲ့ကြပြီး ပြည်နယ်ဝန်ကြီးချုပ်က ကျောင်းသူ၊ ကျောင်းသား မောင်မယ်လေးများအနေဖြင့် ရေကြောင်းဆိုင်ရာ ပညာရပ်များ ကျွမ်းကျင်တတ်မြောက်ပြီး နိုင်ငံတော်ရဲ့ ရေကြောင်း စွမ်းအားများအတွက် အနာဂတ်တွင် အင်အားသစ်များဖြင့် နောင်တစ်ချိန်မှာ ပုခုံး ပြောင်းတာဝန် လွှဲယူနိုင်တဲ့သူတွေ ဖြစ်လာစေရန်နှင့် နိုင်ငံတော်အတွက် စွမ်းစွမ်းတမံ တာဝန်ထမ်းရွက်နိုင်မည့် မျိုးဆက်သစ်လူငယ်လူရွယ်များ ပေါ်ထွန်းလာစေရေး ကြိုးစားအားထုတ် ဆောင်ရွက်သွားကြရန်ဖြင့် လမ်းညွှန်အမှာစကားပြောကြားခဲ့သည်။
အဲဒီနောက် ပြည်နယ်ဝန်ကြီးချုပ်နှင့် တိုင်းမှူးတို့မှ ရေကြောင်းလူငယ်အခြေခံနှင့် တန်းမြင့်သင်တန်းများမှ သင်တန်းသူ၊ သင်တန်းသားများအား ဂုဏ်ပြုထောက်ပံ့ငွေများ ပေးအပ်ချီးမြှင့်ခဲ့ကြပြီး သင်တန်းသူ၊ သင်တန်းသားများအား ရင်းရင်းနှီးနှီး လိုက်လံနှုတ်ဆက်အားပေးခဲ့ကြသည်။
