မော်လမြိုင်၊ စက်တင်ဘာ (၂၅)
မွန်ပြည်နယ်တွင် အနုသုခုမ ယဉ်ကျေးမှု အမွေအနှစ်များ မပျောက်မပျက်စေရေန် ဖော်ထုတ်၊ ထိန်းသိမ်း၊ မြှင့်တင်နိုင်ရန် ရည်ရွယ်၍ ရွက်ပုန်းသီး ဝါသနာရှင်၊ ပညာရှင်များ ရှာဖွေရွေးချယ် မွေးထုတ်ပြီး၊ မြန်မာ့ရိုးရာယဉ်ကျေးမှု အဆို၊ အက၊ အရေး၊ အတီး ပညာရပ်များ လက်ဆင့်ကမ်းအမွေပေး နိုင်ရေးဆောင်ရွက်လျက်ရှိရာ၊ မွန်ပြည်နယ်ဝန်ကြီးချုပ် ဦးအောင်ကြည်သိန်း၊ ပြည်နယ်ဝန်ကြီးများနှင့် တာဝန်ရှိသူများသည် စက်တင်ဘာ ၂၅ ရက် မွန်းလွဲပိုင်းက မော်လမြိုင်မြို့၊ အမှတ် (၁) အခြေခံပညာအထက်တန်းကျောင်းတွင် (၂၄)ကြိမ်မြောက် မြန်မာ့ရိုးရာယဉ်ကျေးမှု အဆို၊ အက၊ အရေး၊ အတီးပြိုင်ပွဲ ဗဟိုအဆင့် ဝင်ရောက်ယှဉ်ပြိုင်မည့် ပြိုင်ပွဲဝင်များစခန်းသွင်းလေ့ကျင့်ရေးစခန်းသို့သွားရောက်၍ ရင်းရင်းနှီးနှီးတွေ့ဆုံ နှုတ်ဆက် အားပေးသည်။
ဆက်လက်၍ ပြိုင်ပွဲဝင်များ၏ အဆိုဘာသာရပ် ၊အတီးဘာသာရပ်၊ အကဘာသာရပ် လေ့ကျင့်မှုများကို လည်းကောင်း၊ ဒေါက်တာလှဘေ ပညာပါရမီစာကြည့်တိုက်တွင် အဆိုဘာသာရပ်လေ့ကျင့်မှုများကိုလည်းကောင်း၊ ပြည်နယ်ခန်းမ၌ မဟော်သဓာဇာတ်တော်ကြီး လေ့ကျင့်နေမှု များကိုလည်းကောင်းကြည့်ရှုအားပေးကာ၊ ပြည်နယ်ဝန်ကြီးချုပ်က ပြိုင်ပွဲဝင်များ အနေဖြင့် ထူးချွန်ထက်မြက်သည့် ဝါသနာရှင်၊ ပညာရှင်များ ပေါ်ထွက်လာရေးနှင့် ပြည်နယ်ဂုဏ်ဆောင်နိုင်ရေး အတွက် ကြိုးပမ်းယှဉ်ပြိုင်ကြရန်၊ယခုနှစ်တွင်မွန်ပြည်နယ်မှမဟော်သဓာဇာတ်တော်ကြီးကို ပါဝင်ယှဉ်ပြိုင်မှာဖြစ်သည့်အတွက် ပြိုင်ပွဲသို့ အဆင်ပြေချောမွေ့စွာ ဝင်ရောက်ယှဉ်ပြိုင်နိုင်ရေး အားလုံးဝိုင်းဝန်းပူးပေါင်းကူညီဆောင်ရွက်ရန် တာဝန်ရှိသူများအား မှာကြားပြီး၊ မဟော်သဓာဇာတ်တော်ကြီးပြိုင်ပွဲဝင်များအား ရင်းရင်းနှီးနှီးလိုက်လံနှုတ်ဆက်ကာ လိုအပ်ချက်များကို ပေါင်းစပ်ဖြည့်ဆည်းဆောင်ရွက်ပေးခဲ့ကြောင်းသိရသည်။
