မော်လမြိုင်၊ နိုဝင်ဘာ ၉
မွန်ပြည်နယ်၊ အသေးစားစက်မှုလက်မှုလုပ်ငန်းဦးစီးဌာနမှ ကျိုက်မရောမြို့နယ်၌ ဖွင့်လှစ်ခဲ့သည့် တန်ဖိုးမြှင့် စားသောက်ကုန်ထုတ်လုပ်မှုနည်းပညာ သင်တန်းဖွင့်လှစ်ပို့ချခဲ့ရာ မွန်ပြည်နယ်အတွင်း အသေးစားကုန်ထုတ်လုပ်ငန်းများဖန်တီးပေးနိုင်ရေးနှင့် မိသားစုဝင်ငွေတိုးရေး စီမံကိန်းလုပ်ငန်းအတွက် ဒေသဖွံ့ဖြိုးရေးလုပ်ငန်းသုံးပစ္စည်းများ ပေးအပ်ပွဲအခမ်းအနားကို နိုဝင်ဘာလ ၉ ရက်နေ့၊ နံနက်ပိုင်းက မော်လမြိုင်မြို့ မွန်ပြည်နယ်ကုန်သည်များနှင့် စက်မှုလက်မှုလုပ်ငန်းရှင်များအသင်း (ကုန်စည်ဒိုင်ခန်းမ)၌ ကျင်းပပြုလုပ်ရာ မွန်ပြည်နယ်ဝန်ကြီးချုပ် ဦးအောင်ကြည်သိန်း၊ ပြည်နယ်ဝန်ကြီးများ၊ ဌာနဆိုင်ရာ တာဝန်ရှိသူများ၊ သင်တန်းသား၊သူများ၊ ဖိတ်ကြားထားသူများ တက်ရောက်သည်။အခမ်းအနားတွင် ပြည်နယ်ဝန်ကြီးချုပ်က မွန်ပြည်နယ်အတွင်း မြို့ပြနှင့် ကျေးလက် ဟန်ချက်ညီညီ ဖွံ့ဖြိုးတိုးတက်စေရေးအတွက် အသေးစားကုန်ထုတ်လုပ်ငန်းများ ဖန်တီးပေးနိုင်ရေးနှင့် ကျေးလက်နေမိသားစုဝင်ငွေတိုးရေးနှင့် တန်ဖိုးမြှင့် ထုတ်ကုန်များ တစ်စိုက်မတ်မတ် အလေးထား အကောင်အထည်ဖော်ဆောင်ရွက်လျက်ရှိပါကြောင်း၊ အသေးစားစက်မှုလက်မှုလုပ်ငန်းများပေါ်ထွန်းလာစေရန် အသက်မွေးဝမ်းကျောင်းပညာများ လေ့ကျင့်သင်ကြား ပေးခြင်း၊ အားပေးကူညီခြင်းနဲ့ ထွက်ရှိလာတဲ့ ထုတ်ကုန်ပစ္စည်းများကို ဓာတ်ခွဲစမ်းသပ်ပေးခြင်း၊ စနစ်တကျမှတ်ပုံတင်ပေးခြင်းတို့အပြင် အသေးစားကုန်ထုတ်လုပ်ငန်းများဖန်တီးပေးနိုင်ရေးနှင့် ကျေးလက်နေ မိသားစုဝင်ငွေတိုးရေး စီမံကိန်းသင်တန်းများကိုပါ တိုးချဲ့ဖွင့်လှစ် ပေးလျက်ရှိကြောင်း၊ အသေးစား၊ အငယ်စားနှင့် အလတ်စား စီးပွားရေးလုပ်ငန်းများဟာ နိုင်ငံစီးပွားရေးအတွက် အဓိက မောင်းနှင်အား ဖြစ်တဲ့အတွက် MSME လုပ်ငန်းများကို အားပေးကူညီခြင်းက နိုင်ငံရဲ့ စီးပွားရေးလုပ်ငန်းများကို အားပေးမြှင့်တင်ရာ ရောက်သလို ပြည်တွင်းထုတ်ကုန် ပမာဏကို တိုးမြှင့်ရန်၊ ထွက်ရှိလာတဲ့ ကုန်ချောပစ္စည်းများကို အရည်အသွေးကောင်းမွန်စွာနဲ့ ဒေသတွင်း ဈေးကွက်မှာလည်း ဈေးသက်သက်သာသာနဲ့ ဖြန့်ဖြူးရောင်းချနိုင်ရုံသာမက ပြည်တွင်း၊ ပြည်ပဈေးကွက်အထိ ထိုးဖောက်နိုင်ရန် ကြိုးစားကြရမည်ဖြစ်ကြောင်း၊ အသေးစား၊ အငယ်စား၊ အလတ်စား စီးပွားရေးလုပ်ငန်းများ ထွန်းကားလာစေခြင်းဖြင့် နိုင်ငံ့ စီးပွားရေးဖွံ့ဖြိုးတိုးတက်မှုကို အထောက်အကူဖြစ်စေရေး ဝိုင်းဝန်း ဆောင်ရွက်ပေးကြရန်ဖြင့် အမှာစကား ပြောကြားသည်။
ဆင်လက်ပြီး မွန်ပြည်နယ်အသေးစားစက်မှု လက်မှုလုပ်ငန်းဦးစီးဌာန၊ပြည်နယ်ဦးစီးမှူးက စီမံကိန်းလုပ်ငန်းအတွက် ဒေသဖွံ့ဖြိုးရေး လုပ်ငန်းသုံးပစ္စည်းများ ပေးအပ်ခြင်းနှင့်ပတ်သက်၍ ရှင်းလင်း ပြောကြားခဲ့သည်။
အဲဒီနောက် ပြည်နယ်ဝန်ကြီးချုပ်နှင့် ပြည်နယ်ဝန်ကြီးများက အသေးစား ကုန်ထုတ် လုပ်ငန်းများဖန်တီးပေးနိုင်ရေးနှင့်မိသားစု ဝင်ငွေတိုးရေး စီမံကိန်း လုပ်ငန်းအတွက် ဒေသဖွံ့ဖြိုးရေး လုပ်ငန်းသုံးပစ္စည်းများအား သင်တန်းသား၊သင်တန်းသူများထံ ပေးအပ်ခဲ့ကြသည်။
ယင်းနောက် ကျိုက်မရောမြို့နယ်၌ ဖွင့်လှစ်ခဲ့သည့် တန်ဖိုးမြှင့် စားသောက်ကုန်ထုတ်လုပ်မှုလုပ်ငန်း ထူထောင်မည့် အသေးစားကုန်ထုတ်လုပ်ငန်းများသင်တန်းမှ ကိုယ်စားလှယ်တစ်ဦးမှကျေးဇူးတင်စကား ပြန်လည်ပြောကြားသည်။
ယင်းနောက် ပြည်နယ်ဝန်ကြီးချုပ်က ခန်းမအတွင်းခင်းကျင်းပြထားသော တန်ဖိုးမြှင့် စားသောက်ကုန် ထုတ်လုပ်ထားရှိမှု ထုတ်ကုန်များနှင့် စားသောက်ကုန် ထုတ်လုပ်သည့် လုပ်ငန်းသုံးပစ္စည်းများအား လှည့်လည်ကြည့်ရှုအားပေးခဲ့ကြကာ စားသောက်ကုန် ထုတ်လုပ်မည့် သင်တန်းသူ၊သင်တန်းသားများအား ရင်းရင်းနှီးနှီးလိုက်လံ နှုတ်ဆက်ခဲ့သည်။
ဆက်လက်၍ မွန်ပြည်နယ်အတွင်း စိုက်ပျိုးရေး ထွက်ကုန်များကို အခြေခံသည့် ပြည်တွင်းထုတ်ကုန်များပိုမိုအားကောင်းစွာ ထုတ်လုပ်နိုင်ရေးနှင့် ဒေသတွင်း တောင်သူများ စီးပွားရေး အခွင့်အလမ်းများကောင်းမွန်စေရေးအတွက် ပြည်နယ်ဝန်ကြီးချုပ်နှင့် တာဝန်ရှိသူများသည် ယနေ့နံနက်ပိုင်းတွင် မော်လမြိုင်မြို့၊ ဇေယျာသီရိရပ်ကွက်၌ တည်ဆောက်နေသည့် ရွှေမြိုင်စိုက်ပျိုးရေးနှင့် အထွေထွေရောင်းဝယ်ရေး သမဝါယမအသင်း၊ တန် (၉၀) ကျ စပါးကြိတ်ခွဲစက်နှင့် တန်(၁၂၀)စပါးအခြောက်ခံစက် တည်ဆောက်ရေးစီမံကိန်းသို့ရောက်ရှိခဲ့ကြပြီ စက်ရုံတည်ဆောက်ရေး တာဝန်ခံမှ စပါးကြိတ်ခွဲစက်နှင့် စပါးအခြောက်ခံစက် အပိုင်းလိုက် တည်ဆောက်ပြီးစီးနေမှုအခြေအနေများနှင့် စိုက်ပျိုးရေးထုတ်ကုန်များ ဆောင်ရွက်မည့် အစီအစဉ်များအား ရှင်းလင်းတင်ပြခဲ့မှုအပေါ် ပြည်နယ်ဝန်ကြီးချုပ်က ပြည်နယ်အတွင်း ထွက်ရှိသည့် ဆန်စပါးများ အလေအလွင့်မရှိရေး၊ ပြည်တွင်းပြည်ပ ဈေးကွက်ရရှိအောင် ဆောင်ရွက်နိုင်ရေး အထူးအလေးထား ဆောင်ရွက်ပေးကြရန်၊ ဒေသထွက်ကုန်များကို အခြေခံသည့် ကုန်ထုတ်လုပ်မှုလုပ်ငန်းများအား အောင်မြင်စွာ ဆောင်ရွက်နိုင်ရေးအတွက် သမဝါယမကဏ္ဍမှ တစ်ဖက် တစ်လမ်း ပါဝင်ဆောင်ရွက်ရန်နှင့် ဆန်ကြိတ်စက်ကြီးများ တည်ထောင်ခြင်းဖြင့် ဆန်နှင့် စိုက်ပျိုးရေးထုတ်ကုန်များကို အရည်အသွေးမီ ထုတ်လုပ်နိုင်ရေးနှင့် တောင်သူများဝင်ငွေတိုးတက်လာစေရေး အကောင်အထည်ဖော် ဆောင်ရွက်ကြရန်ဖြင့် လမ်းညွှန်မှာကြားသည်။
အဲဒီနောက် ပြည်နယ်ဝန်ကြီးချုပ်နှင့် တာဝန်ရှိသူများသည် တန် (၉၀) ကျ စပါးကြိတ်ခွဲစက်နှင့် တန်(၁၂၀)စပါးအခြောက်ခံစက် တည်ဆောက်နေမှုအခြေများအား ကြည့်ရှုစစ်ဆေးပြီး ပြည်နယ်ဝန်ကြီးချုပ်က လိုအပ်သည်များကို ပေါင်းစပ်ညှိနှိုင်းဆောင်ရွက်ပေးခဲ့သည်။
မွန်ပြည်နယ်အစိုးရအဖွဲ့မှကြီးမှူး၍ ၂၀၂၃ ခုနှစ်၊ (၁၃)ကြိမ်မြောက် စုပေါင်းမဟာဘုံကထိန်သင်္ကန်းဆက်ကပ်လှူဒါန်းပွဲအခမ်းအနား အောင်မြင်စွာ ကျင်းပပြုလုပ်နိုင်ရေးအတွက် လုပ်ငန်းညှိနှိုင်းအစည်းအဝေးကို ယနေ့မွန်းလွဲပိုင်းက ပြည်နယ်အစိုးရအဖွဲ့ရုံး၊ အောင်ဆန်းခန်းမ၌ ကျင်းပပြုရာ ပြည်နယ်ဝန်ကြီးချုပ်က နှစ်စဉ်အစဉ်အလာမပျက် ကျင်းပမြဲဖြစ်သည့် စုပေါင်းမဟာဘုံကထိန်သင်္ကန်းဆက်ကပ်လှူဒါန်းပွဲကို ဆရာတော်သံဃာတော်အရှင်သူမြတ်များကို ပင့်ဖိတ်၍ ကထိန်လျာမြတ်သင်္ကန်းနှင့် လှူဖွယ်ပစ္စည်းများ ဆက်ကပ်လှူဒါန်းမည် ဖြစ်ကြောင်း၊ စုပေါင်းမဟာဘုံကထိန် အလှူတော်မင်္ဂလာ ဖြစ်သည့်အတွက် အလှူရှင်များအနေဖြင့် တတ်အားသရွေ့ စုပေါင်းပါဝင်လှူဒါန်းနိုင်ပါကြောင်း၊ လိုအပ်ချက်များကိုလည်း ဖြည့်ဆည်းဆောင်ရွက်ပေးသွားမည်ဖြစ်ကြောင်း လမ်းညွှန်မှာကြားသည်။
အဲဒီနောက် တက်ရောက်လာကြသည့် အခမ်းအနားကျင်းပရေး လုပ်ငန်းကော်မတီအသီးသီးမှ (၁၃) ကြိမ်မြောက် စုပေါင်းမဟာဘုံကထိန်သင်္ကန်းဆက်ကပ်လှူဒါန်းပွဲ ကျင်းပနိုင်ရေး သက်ဆိုင်ရာ ကဏ္ဍအလိုက် ဆောင်ရွက်ထားရှိမှု အခြေအနေများနှင့် ပတ်သက်၍ ရှင်းလင်းတင်ပြခဲ့ကြမှုအပေါ် ပြည်နယ်ဝန်ကြီးများမှ ဖြည့်စွက်ဆွေးနွေးတင်ပြခဲ့ကြပြီး ပြည်နယ်ဝန်ကြီးချုပ်က လိုအပ်သည်များကို ပေါင်းစပ်ညှိနှိုင်းဆောင်ရွက်ပေးကာ နိဂုံးချုပ်အမှာစကားပြောကြားခဲ့သည်။
