မွန်ပြည်နယ်ဝန်ကြီးချုပ် ဦးအောင်ကြည်သိန်း- ၂၀၂၃ခုနှစ်၊ (၃၄) နှစ်မြောက်ကလေးသူငယ် အခွင့်အရေးများဆိုင်ရာ ကုလသမဂ္ဂကွန်ဗင်းရှင်းအထိမ်းအမှတ် (ကမ္ဘာ့ကလေးများနေ့) အခမ်းအနား၊ မော်လမြိုင်မြို့ ကျက်သရေဆောင် ကျိုက်သလ္လံစေတီတော်မြတ်ကြီး၏ အန္တရာယ်ကင်း အသံမစဲမဟာပဋ္ဌာန်း ဖွင့်ပွဲ အခမ်းအနား၊ မွန်ပြည်နယ်၊ အခြေခံပညာကျောင်းသားအားကစားပြိုင်ပွဲ ဖွင့်ပွဲအခမ်းအနား တက်​ရောက်၊

မော်လမြိုင်၊ နိုဝင်ဘာ ၂၀
၂၀၂၃ခုနှစ်၊ (၃၄) နှစ်မြောက်ကလေးသူငယ် အခွင့်အရေးများဆိုင်ရာ ကုလသမဂ္ဂကွန်ဗင်းရှင်းအထိမ်းအမှတ် (ကမ္ဘာ့ကလေးများနေ့) အခမ်းအနားကို နိုဝင်ဘာလ ၂၀ ရက်​နေ့၊ နံနက်ပိုင်းက ​မော်လမြိုင်မြို့ပြည်နယ်ခန်းမ၌ ကျင်းပပြုလုပ်ရာ မွန်ပြည်နယ်ဝန်ကြီးချုပ် ဦးအောင်ကြည်သိန်း၊ ပြည်နယ်တရားလွှတ်​တော် တရားသူကြီးချုပ်၊ ပြည်နယ်ဝန်ကြီးများ၊ တာဝန်ရှိသူများ၊ ဖိတ်ကြားထားသည့် ဧည့်သည်တော်များ တက်ရောက်သည်။
ရှေးဦးစွာ မော်လမြိုင် လူငယ်သင်တန်းကျောင်းမှ ကျောင်းသားများက စည်းလုံးခြင်းအတွက် ​တေးသီချင်းဖြင့် ​ဖျော်​ဖြေတင်ဆက်ခဲ့ကြပြီး ပြည်နယ်ဝန်ကြီးချုပ်က ဖျော်ဖြေတင်ဆက်​ပေးခဲ့ကြသည့် ကျောင်းသားများအား အမှတ်တရ လက်ဆောင်ပစ္စည်းများ ပေးအပ်ချီးမြှင့်ခဲ့သည်။
ဆက်လက်ပြီး ပြည်နယ်ဝန်ကြီးချုပ်က မွန်ပြည်နယ်အ​နေဖြင့် ပြည်နယ်၊ခရိုင်၊ မြို့နယ် က​လေးသူငယ် အခွင့်​ရေးဆိုင်ရာ ကော်မတီအဆင့်ဆင့်ကို ဖွဲ့စည်းခဲ့ပြီး က​လေးသူငယ်အခွင့်အ​ရေးများအတွက် အထူးအ​လေးထား ​ဆောင်ရွက်လျက်ရှိ​ပါကြောင်း၊ က​လေးသူငယ်များ၏ အသက်ရှင်သန်ခွင့်၊ ဖွံ့ဖြိုးတိုးတက်ခွင့်၊ ကာကွယ်​စောင့်​ရှောက်ခံပိုင်ခွင့် အစရှိတဲ့ အခွင့်အ​ရေး​တွေကို က​လေးသူငယ်တိုင်း အပြည့်အဝရရှိ​အောင် ​​ဆောင်ရွက်​ပေးကြရန် လို​ကြောင်း၊ ကလေးတွေဟာ သူတို့ရဲ့အခွင့်အရေးတွေ အပြည့်အဝရရှိဖို့ မျှော်လင့်ဖို့အခွင့်အရေးရှိသလို လူကြီးတွေမှာတော့ ဒီအခွင့်အရေးတွေကို ဖြည့်ဆည်းပေးဖို့ တာဝန်ရှိ​ကြောင်း၊ ကလေးသူငယ် တွေဟာ အသက်အရွယ်အလိုက် ဖွံ့ဖြိုးမှုတွေရရှိပြီး ပဋိပက္ခတွေကြားမှာ မြေစာပင် မဖြစ်စေဖို့အတွက် ကလေးနှင့်ဆက်စပ်ပတ်သက်နေသူ အရွယ်ရောက်သူ လူကြီးတိုင်းက သတိထားကိုင်တွယ် ဆောင်ရွက်ရမှာ ဖြစ်ပြီးကလေးသူငယ်များ၏ အခွင့်အရေးများကို ကလေးတိုင်း လက်လှမ်းမီ တန်းတူညီတူ ရရှိနိုင်ရန်အတွက် သက်ဆိုင်ရာ ကဏ္ဍအသီးသီးမှ အားလုံးဝိုင်းဝန်း ပူးပေါင်းကူညီ ဆောင်ရွက်ပေးကြရန်ဖြင့် အမှာစကား​ပြောကြားသည်။
အဲဒီ​နောက်  ကမ္ဘာ့ကလေးများနေ့ အထိမ်းအမှတ် Video Clip ပြသခဲုပြီးအမှတ်(၃)နှင့် ​ချောင်းဆုံ မူလတန်းကြိုကျောင်းများမှ သားငယ်၊ သမီးငယ်​လေးများ၏ ဘွန္တော၊   အလှကမ္ဘာမြေ​ တေးသီချင်းများဖြင့် ​ဖျော်​ဖြေတင်ဆက်မှုများအား လည်းကောင်း၊ ပုဂ္ဂလိကမူကြို၊ ကိုယ့်အားကိုယ်ကိုးမူကြို၊ ကလေးပြုစုရေးဌာန မူကြိုကျောင်းမှ သားငယ်၊ သမီးငယ်​လေးများက စပါးရယ်ဝါ၊ ထာဝရမြန်မာ ​တေးသီချင်းများဖြင့် ​ဖျော်​ဖြေတင်ဆက်မှုများအား လည်းကောင်း ကြည့်ရှုအား​ပေးခဲ့ကြပြီး ပြည်နယ်ဝန်ကြီးချုပ်၊ ပြည်နယ်တရားလွှတ်​တော်​တော် တရားသူကြီးချုပ်၊ ပြည်နယ်ဝန်ကြီးများက ဖျော်​ဖြေတင်ဆက်​ပေးခဲ့ကြသည့် သားငယ်၊ သမီးငယ်လေးများအား အမှတ်တရ လက်ဆောင်ပစ္စည်းများ အသီးသီးပေးအပ်ကာ ​ပြည်နယ်ဝန်ကြီးချုပ်က မူကြိုကျောင်းများမှ သားငယ်၊ သမီးငယ်လေးများကို ရင်းရင်းနှီးနှီးလိုက်လံနှုတ်ဆက် အား​ပေးခဲ့သည်။
မော်လမြိုင်မြို့ ကျက်သရေဆောင် ကျိုက်သလ္လံစေတီတော်မြတ်ကြီး၏ အန္တရာယ်ကင်း အသံမစဲမဟာပဋ္ဌာန်း ဖွင့်ပွဲ အခမ်းအနားကို ယ​နေ့နံနက်ပိုင်းက ​စေတီ​တော်မြတ်ကြီး၊ ရင်ပြင်​တော်၊ ပဋ္ဌာန်းဓမ္မာရုံ၌ ကျင်းပပြုလုပ်ရာ ​ရှေးဦးစွာ ပြည်နယ်ဝန်ကြီးချုပ်နှင့် ပြည်နယ်ဝန်ကြီးများက ​စေတီ​တော်မြတ်ကြီးကို ဖူး​မြှော်ကြည်ညိုခဲ့ကြသည်။
ထို့​နောက် အခမ်းအနားကို နမောတဿ သုံးကြိမ်ရွတ်ဆို ဖွင့်လှစ်၍ မော်လမြိုင်မြို့၊ ဖက်တန်းရပ်ကွက်၊ ပိဋကတ်ကျောင်းစာသင်တိုက်၏ ဦးစီးပဓါနနာယက၊ မြို့ နယ်သံဃနာယကအဖွဲ့၊ အဖွဲ့ဝင်၊ ပရိယတ္တိပထမကျော် နှင့် ဓမ္မာစရိယငါးဘွဲ့ရဆရာတော် ဘဒ္ဒန္တပညာဝံသထံမှ ဧည့်ပရိတ်သတ် များက ငါးပါးသီလ ခံယူဆောက်တည်ခဲ့ကြပြီး မော်လမြိုင်မြို့၊ ပိဋကတ်တိုက်ကျောင်းစာသင်တိုက်၏ ဦးစီးပဓါနနာယက၊ မြို့နယ်သံဃနာယကအဖွဲ့၊ အဖွဲ့ဝင်၊ ပရိယတ္တိပထမကျော်နှင့် ဓမ္မာစရိယ ငါးဘွဲ့ရ ဆရာတော် ဘဒ္ဒန္တပညာဝံသက ပဋ္ဌာန်းရောင်ခြည်တော်ဖွင့် ဂါထာကို ရွတ်ဖတ်ပူဇော်၍ ပြည်နယ်ဝန်ကြီးချုပ်က ဆရာ​တော်ကြီးများထံ ပဋ္ဌာန်းကျမ်းစာအုပ်၊  ပဋ္ဌာန်းရေအိုးများ ဆက်ကပ်လှူဒါန်းခဲ့သည်။
ဆက်လက်ပြီး ပြည်နယ်ဝန်ကြီးချုပ်၊ ပြည်နယ်ဝန်ကြီးများက သံဃာတော်အရှင်သူမြတ်များ ရွတ်ပွားသရဇ္ဈာယ်မူသော ပရိတ် တရားတော်များ နာယူကြည်ညိုခြင်း၊ လှူဖွယ်ဝတ္ထုပစ္စည်းများ ဆက်ကပ်လှူဒါန်းခြင်းတို့ ​ဆောင်ရွက်ခဲ့ကြကာ မော်လမြိုင်မြို့၊ ဖက်တန်းရပ်ကွက်၊  အဘရာသုတာရာမကျောင်းတိုက်ဆရာတော် ဂန္တဝါစက ပဏ္ဍိတ၊ အဂ္ဂမဟာ သဒ္ဓမ္မ ဇောတိကဓဇထံ အနုမောဒနာ တရားနာယူ ကြည်ညိုပြီး လှူဒါန်းမှုအစုစုတို့အတွက် ရေစက်သွန်းချ အမျှ ပေးဝေခဲ့ကြသည်။
အဲဒီ​နောက် ဆရာတော် သံဃာတော်အရှင်သူမြတတ်များမှ ဦးဆောင်၍ ပရိတ်သတ်အားလုံးမှ ပဋ္ဌာန်း ပစ္စယု​ဒ္ဒေသ ပါဠိတော်ကို သုံးကြိမ် သံပြိုင် ရွတ်ဖတ်ပူဇော်ခြင်း၊ ပဋ္ဌာန်းဒေသနာတော် ရွတ်ဖတ်ရန် တိုက်တွန်းလွှာ ဂါထာကို  ရွတ်ဖတ်ပူဇော်ခြင်းနှင့် ဗုဒ္ဓသာသနံ စိရံတိဋ္ဌတု သုံးကြိမ်ရွတ်ဆို ဆုတောင်းခြင်းတို့ဖြင့် အခမ်းအနားကို ရုပ်သိိမ်းခဲ့ကြပြီး အလှည့်ကျ ပဋ္ဌာန်း ဘာဏက သံဃာတော်မှစ၍ သံဃာတော်များက မဟာပဋ္ဌာန်းဒေသနာတော်ကို (၅)ရက်တိုင်တိုင် အသံမစဲ ရွတ်ဖတ်ပူဇော်သွားမည်ဖြစ်​ကြောင်း သိရှိရသည်။
မွန်ပြည်နယ်၊ အခြေခံပညာကျောင်းသားအားကစားပြိုင်ပွဲ ဖွင့်ပွဲအခမ်းအနားကို ယ​နေ့မွန်းလွဲပိုင်းက ​မော်လမြိုင်မြို့၊ ​ကျောင်းသားအားကစားကွင်း၌ ကျင်းပပြုလုပ်ရာ ​ရှေးဦးစွာ အထက(၄)မော်လမြိုင်မှ ကျောင်းသား၊ ကျောင်းသူလေးများက ထာဝရသစ္စာငြိမ်းချမ်းရေးပန်းခင်း၊ စည်းလုံးချင်းအတွက် သီချင်းတစ်ပုဒ် ​တေးသီချင်းများဖြင့်ဖျော်ဖြေ တင်ဆက်ခဲ့ကြပြီး မြို့နယ်အသီးသီးရှိ အ​ခြေခံပညာ​ကျောင်းများမှ အားကစားအဖွဲ့များက ကွင်းအတွင်းသို့​နေရာယူ၍ အားကစားသစ္စာအဓိိဌာန်ရွက်ဆိုပြီး ပြည်နယ်ဝန်ကြီးချုပ်က မွန်ပြည်နယ်တွင် ဘက်စုံဖွံ့ဖြိုး တိုးတက်ရေးကိုဦးတည်လျက် ကဏ္ဍပေါင်းစုံမှ ​ဆောင်ရွက်လျက်ရှိရာ အ​ခြေခံပညာ​ကျောင််းများ၏ အားကစားကဏ္ဍဖွံ့ဖြိုးတိုးတက်​ရေးအတွက် အထူးအ​လေးထား ​ဆောင်ရွက်​လျက်ရှိကြောင်း၊ ပြည်နယ် (၁၀) မြို့နယ် အ​ခြေခံပညာ​ကျောင်းပေါင်းစုံ အားကစားပြိုင်ပွဲများကို နှစ်စဉ်ကျင်းပပြုလုပ်​ပေးလျက်ရှိပြီး မျိုးဆက်သစ် ပြည်နယ်လက်​ရွေးစင်အားကစားသမား​ကောင်းများစွာ ​ပေါ်ထွန်းလာခဲ့​ကြောင်း၊ ​ကျောင်းသား၊ ​ကျောင်းသူ လူငယ်၊ လူရွယ်​လေးများ ကျန်းမာသန်စွမ်းပြီး ကိုယ်ကာယကြံ့ခိုင်စေရန် အားကစား လှုပ်ရှားမှုများမှာ ပါဝင်ကြဖို့ လိုအပ်သလို ဗလငါးတန်ဘက်စုံဖွံ့ဖြိုးအောင်၊ ပိုမို ကြံ့ခိုင်အောင် လေ့ကျင့်ပေးကြဖို့လည်း လိုအပ်ကြောင်း၊ အားကစားမောင်မယ်အပေါင်းတို့အ​နေဖြင့် ယခုကျင်းပတဲ့ အခြေခံပညာ ကျောင်းသား အားကစားပွဲတော်မှအစ အဆင့်ဆင့်​သောအားကစားပြိုင်ပွဲများတွင်လည်း စည်းကမ်းကျနစွာနဲ့ ကြိုးစားပြီး မွန်ပြည်နယ်ကိုယ်စားပြုမယ့် အားကစားသမားများဖြစ်အောင် ကြိုးစားဖို့လိုအပ်သလို အ​ခြေခံပညာ​ကျောင်းများမှ ပြုစုပျိုး​ထောင်​ပေးခဲ့သည့် မျိုးဆက်သစ် အားကစားသမားများအဖြစ် နိုင်ငံရဲ့ဂုဏ်ကို​ဆောင်နိုင်​​ရေးနှင့် အ​ခြေခံပညာအားကစားကဏ္ဍ တိုးတက်မြင့်မားလာစေ​ရေး အားလုံး ပူးပေါင်းပါဝင်လုပ်ဆောင်ပေးကြရန် တိုက်တွန်းအားပေးလိုပါကြောင်းဖြင့် အမှာစကား​ပြောကြားခဲ့သည်။
ဆက်လက်ပြီး အမှတ်(၈) အ​ခြေခံပညာအထက်တန်း​ကျေင်းမှ ကျောင်းသူလေးများက ဘင်ခရာအဖွဲ့ နှင့် ပန်းပွား အကအလှများဖြင့် လည်း​ကောင်း၊ အမှတ်(၂)နှင့် အမှတ် (၁၀) အ​ခြေခံပညာအထက်တန်း​ကျေင်းများမှ ကျောင်းသူလေးများက Physical Fitness Dance အကဖြင့် သရုပ်ပြတင်ဆက်ခဲ့ကြမှုအ​ပေါ် ကြည့်ရှုအား​ပေးခဲ့ကြသည်။
အဲဒီ​နောက် ပြည်နယ်ဝန်ကြီးချုပ်က စည်းရုံးတက်ကြွအားပေးခြင်း အကောင်းဆုံးဆုရ ​အခြေခံပညာ​ကျောင်းများအား ဂုဏ်ပြုဆုများ ​ပေးအပ်ချီးမြှင့်ခဲ့ပြီး ပြည်နယ်တရားလွှတ်တော် တရားသူကြီးချုပ်၊ ပြည်နယ်ဝန်ကြီးများ၊ ပြည်နယ်ပညာ​ရေးမှူးတို့မှ အခြေခံပညာကျောင်းသားအားကစားပြိုင်ပွဲဖြစ်မြောက်ရေးအတွက် ပါဝင်လှူဒါန်းပေးကြပါသော အလှူရှင် များအား ဂုဏ်ပြုမှတ်တမ်းလွှာများ ပြန်လည်​ပေးအပ်ခဲ့ကြသည်။
အဲဒီ​နောက် ပြည်နယ်ဝန်ကြီးချုပ်ပြည်နယ်ဝန်ကြီးများက မွန်ပြည်နယ်၊ အခြေခံပညာကျောင်းသားအားကစားပြိုင်ပွဲ ​ဘောလုံးပြိုင်ပွဲ အဖွင့်ပွဲစဉ်အဖြစ် ​ကျိုက်မ​ရောမြို့နယ် အ​ခြေခံပညာ ​ဘောလုံးအသင်းနှင့် ​ချောင်းဆုံမြို့နယ် အ​ခြေခံပညာ ​ဘောလုံးအသင်းတို့ ဝင်​ရောက်ယှဉ်ပြိုင်​နေမှုအ​ပေါ်  ကြည့်ရှုအား​ပေးခဲ့ကြသည်။
မွန်ပြည်နယ်၊ အခြေခံပညာကျောင်းသားအားကစားပြိုင်ပွဲကို နိုဝင်ဘာလ ၁၇ ရက်​နေ့မှ၊ ၂၆ ရက်​နေ့အထိ ကျင်းပပြုလုပ်ခဲ့ပြီး မြို့နယ်အသီသီးရှိ၊ အခြေခံပညာကျောင်းများမှ အားကစားအသင်းများက အားကစားနည်း (၇) မျိုးဖြင့် ဝင်​ရောက်ယှဉ်ပြိုင်ကြမည်ဖြစ်​ကြောင်း သိရှိရသည်။