မော်လမြိုင်၊ နိုဝင်ဘာ ၂၄ မော်လမြိုင်မြို့ ကျက်သရေဆောင် ကျိုက်သလ္လံစေတီတော်မြတ်ကြီး၏ အန္တရာယ်ကင်း အသံမစဲမဟာပဋ္ဌာန်းရွတ်ဖတ်ပူဇော် (၅)ရက်တိုင်တိုင် အသံမစဲ ရွတ်ဖတ်ပူဇော်ခဲ့ရာ အန္တရာယ်ကင်း အသံမစဲမဟာပဋ္ဌာန်းရွတ်ဖတ်ပူဇော်ပွဲ ပဋ္ဌာန်းသိမ်းပွဲ အခမ်းအနားကို နိုဝင်ဘာလ ၂၄ ရက်နေ့၊ နံနက်ပိုင်းက မော်လမြိုင်မြို့ ကျက်သရေဆောင် ကျိုက်သလ္လံစေတီတော်မြတ်ကြီး၏ ပဌာန်းဓမ္မာရုံတော်၌ ကျင်းပပြုလုပ်ရာ ဆရာတော် သံဃာတော်အရှင်သူမြတ်များ၊ မွန်ပြည်နယ်ဝန်ကြီးချုပ် ဦးအောင်ကြည်သိန်း၊ ပြည်နယ်ဝန်ကြီးများ၊ ဧည့်ပရိတ်သတ်များ တက်ရောက်၍ ရှေးဦးစွာအခမ်းအနားကို နမောတဿ သုံးကြိမ်ရွတ်ဆို ဖွင့်လှစ်၍ မော်လမြိုင်မြို့၊ ဖက်တန်းရပ်ကွက်၊ ပိဋကတ်ကျောင်းစာသင်တိုက်၏ ဦးစီးပဓါနနာယက၊ မြို့ နယ်သံဃနာယကအဖွဲ့၊ အဖွဲ့ဝင်၊ ပရိယတ္တိပထမကျော် နှင့် ဓမ္မာစရိယငါးဘွဲ့ရဆရာတော် ဘဒ္ဒန္တပညာဝံသ ထံမှ ငါးပါးသီလ ခံယူဆောက်တည်ခဲ့ကြပြီး သံဃာတော်အရှင်သူမြတ်များ ရွတ်ပွားသရဇ္ဈာယ်မူသော ပရိတ် တရားတော်များ နာယူကြည်ညိုခဲ့ကြသည်။ ဆက်လက်ပြီး ပြည်နယ်ဝန်ကြီးချုပ်၊ ပြည်နယ်ဝန်ကြီးများနှင့် တာဝန်ရှိသူများက ဆရာတော်၊ သံဃာတော်အရှင်သူမြတ်များထံ လှူဖွယ်ဝတ္ထုပစ္စည်းများ ဆက်ကပ်လှူဒါန်းခဲ့ကြပြီး လှူဒါန်းမှုအစုစုတို့အတွက် အနုမောဒနာ တရားနာယူ ကြည်ညို၍ ရေစက်သွန်းချအမျှပေးဝေခဲ့ကြကာ အခမ်းအနားကို ဗုဒ္ဓသာသနံ စိရံတိဋ္ဌတု သုံးကြိမ်ရွတ်ဆို ဆုတောင်းခဲ့ကြပြီး ရုပ်သိိမ်းခဲ့ကြသည်။ အဲဒီနောက်် ပြည်နယ်ဝန်ကြီးချုပ်က ကျိုက်သလ္လံစေတီတော်မြတ်ကြီးကို လှည့်လည် ဖူးမြော်ကြည်ညို၍ စေတီတော်မြတ်ကြီး ရင်ပြင်တော်ရှိ တန်းဆောင်၊ ပြသာဒ်အချို့အား ပြန်လည် ပြုပြင်မွမ်းမံနိုင်ရေး ကြည့်ရှု၍ တာဝန်ရှိသူများနှင့် တွေ့ဆုံကာ လိုအပ်သည်များကို ပေါင်းစပ်ညှိနှိုင်းဆောင်ရွက်ပေးခဲ့သည်။
