မော်လမြိုင် ဧပြီ ၈
မွန်ပြည်နယ်အစိုးရအဖွဲ့မှ ကြီးမှူးကျင်းပသော စုပေါင်းငါးလွှတ်ပွဲ အခမ်းအနားကို ယနေ့နံနက်ပိုင်းတွင် မော်လမြိုင်မြို့ ဆိပ်ကမ်းသာတံတား၌ ကျင်းပရာ မွန်ပြည်နယ် ဝန်ကြီးချုပ် ဦးအောင်ကြည်သိန်း၊ အရှေ့တောင်တိုင်းစစ်ဌာနချုပ် တိုင်းမှူး ဗိုလ်ချုပ် ကျော်လင်းမောင်၊ ပြည်နယ်တရားလွှတ်တော် တရားသူကြီးချုပ်၊ ပြည်နယ်အစိုးရအဖွဲ့ဝင် ဝန်ကြီးများ၊ ဌာနဆိုင်ရာ တာဝန်ရှိသူများ တက်ရာက်ကြသည်။
အခမ်းအနားတွင် ပြည်နယ်ဝန်ကြီးချုပ် ၊ တိုင်းမှူး၊ ပြည်နယ်တရားလွှတ်တော်တရားသူကြီးချုပ်၊ ပြည်နယ်အစိုးရအဖွဲ့ဝင် ဝန်ကြီးများနှင့် ဌာနဆိုင်ရာတာဝန်ရှိသူများက သံလွင်မြစ်အတွင်း ရွှေဝါငါးကြင်း(၂ )လက်မအထက် အကောင်ရေ (၅၀၀၀ ) ကို ကုသိုလ်ပြုလွှတ်ပေးခဲ့ကြကြောင်း သိရသည်။
နိုင်ငံတော်အေးချမ်း သာယာစေရန်၊ နိုင်ငံအဝန်း ဘေးအန္တရာယ်ကင်းရှင်းစေရန် နှင့် ပြည်သူများ စိတ်ကြည်နူးအေးချမ်းစေရန် ရည်ရွယ်၍ ဌာနဆိုင်ရာ အသီးသီးမှ ဝတ်ရွတ်အသင်းများက သက်ဆိုင်ရာ မြို့နယ်အသီးသီးရှိ ဓမ္မာရုံများ၊ စေတီပုထိုးများနှင့် ဌာနဆိုင်ရာရုံးများ၌ မြတ်စွာ ဘုရားရှင်အား ရည်မှန်းကာ ည(၇)နာရီမှစ၍ ရတနာသုတ် (၉) ခေါက် (၉)ရက်တိုင် ရွတ်ဖတ်ပူဇော်သွားမည်ဖြစ်ကြောင်း သိရသည်။
