မွန်ပြည်နယ်တရားလွှတ်တော် ပင်မအဆောက်အဦ တည်ဆောက်ပြီးစီးနေမှုနှင့် အချောသပ်လုပ်ငန်း ဆောင်ရွက်နေမှု အခြေအနေတို့အား ကြည့်ရှုစစ်ဆေး

မော်လမြိုင်၊ အောက်တိုဘာ ၂၂
တရားလွှတ်တော်အင်္ဂါရပ်နှင့်အညီ မော်လမြိုင်မြို့၊ မန္တလေးရပ်ကွက်ရှိ မွန်ပြည်နယ်တရားလွှတ်တော် ၂၄၀’× ၂၄၀’ RC ၃ ထပ်အဆောက်အဦ ဆောက်လုပ်လုပ်ငန်းကို ၂၀၁၇- ၂၀၁၈ ဘဏ္ဍာရေးနှစ်မှ ၂၀၂၂- ၂၀၂၃ ဘဏ္ဍာရေးနှစ်အထိ စုစုပေါင်းစီမံကိန်းတန်ဘိုး (၁၀၀၉၈.၀၀) ကျပ်သန်းဖြင့် တည်ဆောက်ခဲ့ရာ ယခုအချိန်တွင် ပင်မအဆောက်အဦ တည်ဆောက်ပြီးစီးမှုမှာ ၉၈ ရာခိုင်နှုန်းကျော်နှင့် အထူးအချောသပ်လုပ်ငန်းနှင့် Extra Word လုပ်ငန်းပြီးစီးမှုမှာ ၈၄ ရာခိုင်နှုန်းကျော် ဆောင်ရွက်ပြီးစီးခဲ့သည်။
အဆိုပါ တည်ဆောက်ခြင်းလုပ်ငန်းကို ဆောက်လုပ်ရေးဝန်ကြီးဌာန၊ အဆောက်အဦအထူးအဖွဲ့ (၁၃) မှ ၂၀၁၇ ခုနှစ်၊ အောက်တိုဘာလ ၁၄ ရက်နေ့တွင် စတင်တာဝန်ယူတည်ဆောက်ခဲ့ပြီး ပင်မဆောင်တည်ဆောက်ခြင်း စီမံကိန်းကို နှစ်အလိုက် ခွင့်ပြုရန်ပုံငွေ (၈၂၂၁.၀၀) ကျပ်သန်းဖြင့်လည်းကောင်း၊ အထူးအချောသပ်လုပ်ငန်းနှင့် Extra Word လုပ်ငန်းကို (၁၈၇၇.၀၀) ကျပ်သန်းဖြင့် လည်းကောင်း ဆောင်ရွက်ခဲ့ကာ မွန်ပြည်နယ်တရားလွှတ်တော် အဆောက်အဦသစ်ကို စိန်ရတုလွတ်လပ်ရေးနေ့အကြို၌ ဖွင့်လှစ်ရန် စီစဉ်ဆောင်ရွက်ထားကြောင်း သိရှိရသည်။
မွန်ပြည်နယ်ဝန်ကြီးချုပ် ဦးဇော်လင်းထွန်း၊ ပြည်နယ်တရားလွှတ်တော် တရားသူကြီးချုပ် ဦးညီညီစိုး၊ ပြည်နယ်ဝန်ကြီးများနှင့် ဌာနဆိုင်ရာ အကြီးအကဲများသည် ၂၀၂၂ ခုနှစ်၊ အောက်တိုဘာလ ၂၂ ရက်နေ့၊နေ့လယ်ပိုင်းက ဆောက်လုပ်ရေးဝန်ကြီးဌာန၊ အဆောက်အဦအထူးအဖွဲ့ (၁၃) မှ တာဝန်ယူတည်ဆောက်သည့် မွန်ပြည်နယ်တရားလွှတ်တော် ပင်မအဆောက်အဦ တည်ဆောက်ပြီးစီးနေမှုနှင့် အချောသပ်လုပ်ငန်း ဆောင်ရွက်နေမှု အခြေအနေတို့အား ကြည့်ရှုစစ်ဆေးသည်။
စီမံကိန်းရှင်းလင်းဆောင်တွင် အဆောက်အဦဦးစီးဌာန၊ ညွှန်ကြားရေးမှူးချုပ် ဦးမျိုးမြင့်မှ မွန်ပြည်နယ်တရားလွှတ်တော် (၂၄၀ ပေ) ပတ်လည် RC (၃) ထပ် တည်ဆောက်ခြင်းလုပ်ငန်းနှင့် ပတ်သက်၍ ရှင်းလင်းတင်ပြပြီး တည်ဆောက်ရေးလုပ်ငန်း တာဝန်ရှိသူမှ ဘဏ္ဍာရေးနှစ်အလိုက် ရရှိရန်ပုံငွေနှင့် ရန်ပုံငွေအပေါ် ဆောင်ရွက်ထားရှိမှု၊ အထူးအချောသပ်လုပ်ငန်း ဆောင်ရွက်မှု၊ Extra Word လုပ်ငန်းများဖြစ်သည့် ပရိဘောဂများ ထည့်သွင်းခြင်း၊ ကျွန်းမျက်နှာပြင်များ ပေါ်လစ်တင်ခြင်း၊ ခြံစည်းရိုးကာရံခြင်း၊ ကားပါကင်နှင့် ဆက်စပ်အဆောက်အဦများ ဆောက်လုပ်ခြင်း၊ ရေသန့်လုပ်ငန်းနှင့် လျှပ်စစ်လုပ်ငန်းများ ဆောင်ရွက်ပြီးစီးမှု အခြေအနေတို့အား ရှင်းလင်းတင်ပြကြကာ ပြည်နယ်ဝန်ကြီးချုပ်က လုပ်ငန်းများဆောင်ရွက်ရာတွင် သတ်မှတ်ကာလအတွင်း အချိန်မီပြီးစီးစေရေးနှင့် စံညီစံညွှန်းနှင့် ပြည့်မီစေရေး အထူးအလေးထား ဆောင်ရွက်ကြရန် လမ်းညွှန်မှာကြားသည်။

You may also like