မုဒုံမြို့နယ်တွင် တန် (၆၀) ကျ ဆန်ကြိတ်ခွဲစက် တည်ဆောက်နိုင်ရေး တွေ့ဆုံဆွေးနွေး၊ စုပေါင်းမဟာဘုံကထိန်မြတ်သင်္ကန်း ဆက်ကပ်လှူဒါန်းပွဲသို့ တက်ရောက်

မော်လမြိုင်၊ အောက်တိုဘာ ၂၄
မွန်ပြည်နယ်အတွင်း စိုက်ပျိုးရေး ထွက်ကုန်များကို အခြေခံသည့် ပြည်တွင်းထုတ်ကုန်များအား ပိုမိုအားကောင်းစွာ ထုတ်လုပ်နိုင်ရေးနှင့် ဒေသတွင်း တောင်သူများ စီးပွားရေးအခွင့်အလမ်းများ ကောင်းမွန်လာစေရေး ရည်ရွယ်၍ မုဒုံမြို့နယ်တွင် တန် (၆၀) ကျ ဆန်ကြိတ်ခွဲစက် တည်ဆောက်နိုင်ရေး အတွက် မွန်ပြည်နယ် ဝန်ကြီးချုပ် ဦးဇော်လင်းထွန်း၊ ပြည်နယ်ဝန်ကြီးများသည်၂၀၂၂ ခုနှစ်၊ အောက်တိုဘာလ ၂၄ ရက်နေ့၊ နံနက်ပိုင်းက မော်လမြိုင်မြို့၊ ငွေမိုးဟိုတယ်၌ အောင်သဇင်စိုက်ပျိုးရေးနှင့် အထွေထွေစီးပွားရေး သမဝါယမအသင်းမှ တာဝန်ရှိသူများ၊ ဆန််စက်လုပ်ငန်းရှင်များနှင့် တွေ့ဆုံဆွေးနွေးသည်။
ဦးစွာ ပြည်နယ်ဝန်ကြီးချုပ်က မွန်ပြည်နယ်သည် စီးပွားရေးအရ အချက်အချာကျသော ပြည်နယ်တစ်ခုဖြစ်ပြီး ကုန်းလမ်းတွင်သာမက ရေလမ်းဖြင့်လည်း ကုန်စည်စီးဆင်းမှု လွယ်ကူလျှင်မြန်စွာ သယ်ယူပို့ဆောင်နိုင်ကြောင်း၊ မိုးစပါးရာနှုန်းပြည့် ကျော်လွန်စိုက်ပျိုးပြီး နွေစပါးအပါအဝင် အခြားဆီထွက်သီးနှံများ ပိုမိုတိုးချဲ့စိုက်ပျိုးကြရမှာ ဖြစ်ကြောင်း၊ ဆန်စပါးကို ဒေသတွင်းစားသုံးမှု ဖူလုံမှုရှိသည့်အပြင် အခြားဒေသများနှင့် ပြည်ပသို့ တင်ပို့နိုင်ရေး ဆောင်ရွက်ကြရန်လိုကြောင်း၊ မိရိုးဖလာ စိုက်ပျိုးခြင်းထက် ခေတ်မီနည်းပညာများကို အသုံးပြု၍ စိုက်ပျိုးထုတ်လုပ်ခြင်း၊ ဆန်ကြိတ်စက်ကြီးများ တည်ထောင်ခြင်းဖြင့် ဆန်နှင့် စိုက်ပျိုးရေးထုတ်ကုန်များကို အရည်အသွေးမီ ထုတ်လုပ်ကြစေလိုကြောင်း၊ တောင်သူများဝင်ငွေတိုးတက်လာစေရေး ကာလတို၊ ကာလရှည် စီမံကိန်းများ အကောင်အထည်ဖော် ဆောင်ရွက်ပေးခြင်းတို့ကို အားလုံး ဝိုင်းဝန်းပူပေါင်း ဆောင်ရွက်ပေးကြရန် ပြောကြားသည်။
ထို့နောက် အောင်သဇင်စိုက်ပျိုးရေးနှင့် အထွေထွေစီးပွားရေး သမဝါယမအသင်း၊ ဥက္ကဌ ဦးအောင်ဇော်ဦးမှ တန် (၆၀) ကျ ဆန်ကြိတ်ခွဲစက် တည်ဆောက်နိုင်ရေး ဆောင်ရွက်ရမည့် လုပ်ငန်းစဉ်များ၊ ဒေသတွင်း စပါးစိုက်တောင်သူများနှင့် ဆန်စက်လုပ်ငန်းရှင်များ ပူးပေါင်း၍ စိုက်ပျိုးရေးထုတ်ကုန်များ တိုးတက်ကောင်းမွန်စွာ ထုတ်လုပ်နိုင်ရေး ဆောင်ရွက်မည့် အစီအစဉ်များ၊ လယ်ယာသုံးစက်ကရိယာများ အငှားစနစ်ဖြင့် ကူညီထောက်ပံ့ပေးနိုင်ရေး အခြေအနေများအား ရှင်းလင်းတင်ပြသည်။
အဲဒီနောက် တက်ရောက်လာသူများမှ တောင်သူများ၏ လိုအပ်သော သွင်းအားစုများ ဖြည့်ဆည်းပေးလိုမှု၊ ကန်ထရိုက်လယ်ယာစနစ်ဖြင့် ဆောင်ရွက်ရမည့် လုပ်ငန်းများ၊ စိုက်ပျိုးစရိတ် ထုတ်ချေးပေးနိုင်ရေးနှင့် ပတ်သက်၍ မေးမြန်းဆွေးနွေးခဲ့ကြပြီး ပြည်နယ်ဝန်ကြီးချုပ်က လိုအပ်သည်များကို ပေါင်းစပ်ညှိနှိုင်းဆောင်ရွက်ပေးကာ တန် (၆၀) ကျ ဆန်ကြိတ်ခွဲစက် တည်ဆောက်နိုင်ရေးအတွက် မုဒုံမြို့နယ်၊ တာပတွန်ကျေးရွာရှိ လျာထားမြေနေရာအား ကြည့်ရှုစစ်ဆေးသည်။
အဲဒီကမှ တဆင့် ပြည်နယ်ဝန်ကြီးချုပ်နှင့် အဖွဲ့သည် မုဒုံမြို့နယ်၊ ကမာဝက်မြို့၊ အောင်တော်မူကျောင်းတိုက်၌ ကျင်းပပြုလုပ်သည့် (၂၄) ကြိမ်မြောက်၊ စုပေါင်းမဟာဘုံကထိန်မြတ်သင်္ကန်း ဆက်ကပ်လှူဒါန်းပွဲသို့ တက်ရောက်၍ ဆရာတော်အရှင်သူမြတ်များထံ ကထိန်လျာမြတ်သင်္ကန်းများနှင့် လှူဖွယ်ဝတ္ထုများ ဆက်ကပ်လှူဒါန်းခဲ့သည်။

You may also like