| မော်လမြိုင်၊ ဒီဇင်ဘာ ၂၅ မွန်ပြည်နယ်၊ မော်လမြိုင်မြို့၊ တောင်ရိုးတန်းတွင် တည်ထားကိုးကွယ်ထားသည့် သမိုင်းဝင် လေးကျွန်းသစ္စာရှင်နဂါးမောက် စေတီတော်မြတ်ကြီး၊ ပထမအကြိမ် ဗုဒ္ဓပူဇနိယပွဲနှင့် ဆွမ်းဆန်စိမ်းလောင်လှူပူဇော်ပွဲတို့၏ လှူဒါန်းမှုအစုစုတို့အတွက် ရေစက်ချ မင်္ဂလာအခမ်းအနားကို ဒီဇင်ဘာလ ၂၅ ရက်နေ့၊ နံနက်ပိုင်းက စေတီတော်မြတ်ကြီး၏ ဓမ္မာရုံတော်၌ ကျင်းပပြုလုပ်ရာ ဆရာတော်၊ သံဃာတော် အရှင်သူမြတ်များ မွန်ပြည်နယ် ဝန်ကြီးချုပ် ဦးဇော်လင်းထွန်း၊ အရှေ့တောင်တိုင်းစစ်ဌာနချုပ်တိုင်းမှူး ဗိုလ်ချုပ်မြတ်သက်ဦး၊ ပြည်နယ်ဝန်ကြီးများ၊ တာဝန်ရှိသူများ အလှူရှင်များတက်ရောက်သည်။ ဦးစွာ အခမ်းအနားကို နမောတဿ သုံးကြိမ်ရွတ်ဆို ဖွင့်လှစ်၍ မော်လမြိုင်မြို့၊ မြစေတီစာသင်တိုက်ကြီး၏ ဦးစီးပဓါန နာယကဆရာတော် (အဂ္ဂမဟာပဏ္ဍိတ) ဘဒ္ဒန္တဝိမလဗုဒ္ဓိ အရှင်သူမြတ်ထံမှ ရှစ်ပါးသီလခံယူဆောက်တည်ကာ သံဃာတော်အရှင်သူမြတ်များ ရွတ်ပွားသရဇ္ဈာယ်မူသော ပရိတ် တရားတော်များ နာယူကြည်ညိုခဲ့ကြသည်။ ထို့နောက် ပြည်နယ်ဝန်ကြီးချုပ်၊ တိုင်းမှူးနှင့် တာဝန်ရှိသူများက လှူဖွယ်ဝတ္ထုများ ဆက်ကပ်လှူဒါန်းခဲ့ကြပြီး အလှူရှင် အဂ္ဂမဟာသီရိသုဓမ္မ မဏိဇောတဓရ ဦးလှထွန်း (ငရုတ်သီးမှုန့်လုပ်ငန်း) မိသားစုနှင့် အလှူရှင်များ၏ ပထမအကြိမ် ဗုဒ္ဓပူဇနိယပွဲနှင့် ဆွမ်းဆန်စိမ်းလောင်လှူပူဇော်ပွဲတို့၏ လှူဒါန်းမှုအစုစုတို့အတွက် အနုမောဒနာ တရားနာယူ ကြည်ညိုပြီး ရေစက်သွန်းချ အမျှ ပေးဝေခဲ့ကြသည်။ မွန်ပြည်နယ်၊ ပေါင်မြို့နယ်၊ မုတ္တမ တောင်ရိုးတန်းတွင် တည်ထားကိုးကွယ်တော်မူသော ရှေးဟောင်းဘုရား (၁၆) ဌာန သမိုင်းဝင် စေတီတော်များအနက်မှ သမိုင်းဝင် ကျိုက်ဖျဉ်ကူ စေတီတော်မြတ်ကြီး စိန်ဖူးတော်၊ ငှတ်မြတ်နားတော်၊ ထီးတော် ပြန်လည်တင်လှူ ပူဇော်နိုင်ရန်အတွက် ဌာပနာတော်များ ထည့်သွင်းပူဇော်ပွဲအခမ်းအနားကို ယနေ့နံနက်ပိုင်းက စေတီတော်မြတ်ကြီး၏ ဓမ္မာရုံတော်၌ ကျင်းပပြုလုပ်ခဲ့ရာ ဦးစွာ စေတီတော်မြတ်ကြီးကို လက်ယာရစ်တစ်ပတ် လှည့်လည်ပူဇော်၍ ဆရာတော်ကြီးများထံ ဩဝါဒခံယူခဲ့ပြီး ပြည်နယ်ဝန်ကြီးချုပ်၊ တာဝန်ရှိသူများနှင့် အလှူရှင်များက စိန်ဖူးတော်တွင်ကပ်လှူပူဇော်မည့် ရတနာများအား ဌာပနာတော်အတွင်း ထည့်သွင်းပူဇော်ခဲ့ကြကာ စေတီတော်ရင်ပြင်တော် တို့ချဲ့ဆောက်လုပ်နေမှု အခြေအနေအား ကြည့်ရှုခဲ့သည်။ |
