မော်လမြိုင် ဇွန် ၁၀
မွန်ပြည်နယ်လယ်ယာမြေစီမံခန့်ခွဲမှုအဖွဲ့ အစည်းအဝေးအမှတ်စဉ် (၃/၂၀၂၅) ကို ဇွန်လ ၁၀ ရက်နေ့ မွန်းလွဲပိုင်းက ပြည်နယ်အစိုးရအဖွဲ့ရုံး၊ အောင်ဆန်းခန်းမ၌ ကျင်းပပြုလုပ်ရာ မွန်ပြည်နယ် လယ်ယာမြေစီမံခန့်ခွဲမှုအဖွဲ့ဥက္ကဋ္ဌ ပြည်နယ်ဝန်ကြီးချုပ် ဦးအောင်ကြည်သိန်းက မွန်ပြည်နယ်အတွင်းလယ်ယာမြေပြဿနာများကို ဥပဒေ၊ နည်းဥပဒေ၊ လုပ်ထုံးလုပ်နည်းများနှင့်အညီ စိစစ်ဆောင်ရွက်ရန်လိုအပ်ကြောင်း၊ လယ်ယာမြေပေါ်တွင် ခွင့်ပြုချက်မရရှိဘဲ အခြားနည်းအသုံးပြုမှုများနှင့်ပတ်သက်၍ သတ်မှတ်ထားရှိသော SOPနှင့်အညီ စိစစ်ဆောင်ရွက်နိုင်ရေးအတွက် ခရိုင်/မြို့နယ်အဖွဲ့များမှစနစ်တကျ ကွင်းဆင်းဆောင်ရွက်ကြစေလိုကြောင်း၊လယ်ယာမြေကို စိုက်ပျိုးခြင်းမပြုဘဲ အကြောင်းမဲ့ လှပ်ထားခြင်းမရှိရေး ကြပ်မတ်ဆောင်ရွက်ရန် အရေးကြီးကြောင်း၊ တင်ပြသည့် အမှုတွဲများနှင့်စပ်လျဉ်း၍ သက်ဆိုင်ရာအဖွဲ့ဝင်များက လယ်ယာမြေ ဥပဒေ၊ နည်းဥပဒေများနှင့်အညီ ဝိုင်းဝန်းဆွေးနွေးကြရန် ပြောကြားသည်။
ထို့နောက် မွန်ပြည်နယ် လယ်ယာမြေစီမံခန့်ခွဲမှုအဖွဲ့ အတွင်းရေးမှူးမှ လယ်ယာမြေဥပဒေ၊ နည်းဥပဒေ၊ လုပ်ထုံးလုပ်နည်းများနှင့် ဆောင်ရွက်ထားရှိမှုများနှင့် လမ်းဦးစီးအမည်ပေါက်ရရှိရေး ဆောင်ရွက်ရန်၊ ပုံစံ (၇) ပျောက်ဆုံးသဖြင့် ဒုတိယမူရင်း (သို့) မိတ္တူမှန် ပြန်လည်ထုတ်ပေးရန်၊ လယ်ယာမြေဥပဒေပုဒ်မ ၃၀(ခ)အရ အခြားနည်းအသုံးပြုရန် ကိစ္စရပ်များနှင့်ပက်သတ်၍ဆောင်ရွက်ထားရှိမှု အခြေအနေတို့အား ရှင်းလင်းတင်ပြခဲ့သည်။
ဆက်လက်၍ မွန်ပြည်နယ်လယ်ယာမြေစီမံခန့်ခွဲမှုအဖွဲ့ဝင်များမှ လယ်ယာမြေစီမံခန့်ခွဲမှုများနှင့် ပတ်သက်၍ သက်ဆိုင်ရာကဏ္ဍအလိုက် ရှင်းလင်းတင်ပြခဲ့ကြမှုအပေါ် ပြည်နယ်ဝန်ကြီးချုပ်က လိုအပ်သည်များကို ပေါင်းစပ်ညှိနှိုင်း ဆောင်ရွက်ပေးကာ နိဂုံးချုပ်အမှာစကားပြောကြားခဲ့ကြောင်း သိရှိရသည်။
