မွန်ပြည်နယ်အတွင်း စိုက်ပျိုးမွေးမြူရေးလုပ်ငန်း၊ ဆားလုပ်ငန်းနှင့် အခြားကုန်ထုပ်လုပ်ငန်းများဆောင်ရွက်ရာတွင် လိုအပ်သည့် စိုက်ပျိုးရေ၊ လုပ်ငန်းသုံးရေများ ရရှိနိုင်ရန်အတွက် နည်းလမ်းပေါင်းစုံဖြင့် ဆောင်ရွက်ပေးလျက်ရှိရာ တောင်သူပညာပေး ဆိုလာစနစ်သုံး ရေတင်စနစ် သရုပ်ပြသခြင်းကို ဇန်နဝါရီလ ၂၆ ရက်နေ့၊ မွန်းလွဲပိုင်းက မော်လမြိုင်မြို့၊ ကမ်းနားလမ်းရှိ ထားဝယ်တံတား၌ ကျင်းပဆောင်ရွက်ခဲ့ရာ မွန်ပြည်နယ်ဝန်ကြီးချုပ် ဦးဇော်လင်းထွန်း၊ ပြည်နယ်ဝန်ကြီးများမှ တက်ရောက်ကြည့်ရှုအားပေး၍ မွန်ပြည်နယ် ဆားလုပ်ငန်းရုံး၊ မွန်ပြည်နယ် ဆားလုပ်ငန်းရှင်များ အသင်းနှင့် ဆိုလာစနစ်သုံး ရေတင်စနစ်ဖြင့် ရရှိလာမည့် အကျိုးဖြစ်ထွန်းမှုအခြေအနေများနှင့် ပတ်သက်၍ ဒေသခံ တောင်သူများ၊ ဆားလုပ်ငန်းနှင့် စိုက်ပျိုးမွေးမြူရေး ထုတ်ကုန်လုပ်ငန်းများ လုပ်ကိုင်သူများအား ရှင်းလင်းဆွေးနွေးခဲ့ကြသည်။
ထို့နောက် စက်သုံးဆီ အစားထိုး ဆိုလာစနစ်ဖြင့် ရေတင် နိုင်သည့် အာလိန်ပန့်ဖြင့် ရေတင်နိုင်သည့် နည်းစနစ်အား လက်တွေ့သရုပ်ပြသခဲ့ကြမှုအပေါ် ပြည်နယ်ဝန်ကြီးက လိုအပ်သသည်များကို လမ်းညွှန်မှာကြားကာ လိုအပ်သည်များကို ပေါင်းစပ်ညှိနှိုင်းဆောင်ရွက်ပေးခဲ့သည်။
၂၀၂၂-၂၀၂၃ ပညာ သင်နှစ်၊ အစိုးရစက်မှု လက်မှုသိပ္ပံ(မော်လမြိုင်) မောင်မယ်သစ်လွင်ကြိုဆိုပွဲ အခမ်းအနားကို ဇန်နာဝါရီလ ၂၇ ရက်နေ့၊ နံနက်ပိုင်းက အစိုးရစက်မှု လက်မှုသိပ္ပံ(မော်လမြိုင်) ၊ ကျောင်းခန်းမဆောင်၌ ကျင်းပပြုလုပ်ရာ ပြည်နယ်ဝန်ကြီးချုပ်က မွန်ပြည်နယ်အတွင်း နည်းပညာနှင့် သက်မွေးပညာဆိုင်ရာ လူ့စွမ်းအားအရင်းအမြစ်များအား စဉ်ဆက်မပြတ် လေ့ကျင့် သင်ကြားမွေးထုတ် ပေးနိုင်ရေး အလေးထား ဆောင်ရွက်ပေးလျက်ရှိရာ ပြည်နယ်အတွက် တစ်ခုတည်းသော စက်မှုလက်မှုသိပ္ပံကျောင်းမှာ တက်ရောက် ပညာဆည်းပူးခွင့်ရရှိကြမည့် မောင်၊ မယ်တို့အတွက် အင်ဂျင်နီယာပညာသင်ယူမှု အခွင့်အလမ်းအပြင် အလုပ်အကိုင်အခွင့်အလမ်းကိုပါ ရရှိနိုင်မည်ဖြစ်တဲ့အတွက် အထူးဝမ်းမြောက် ဂုဏ်ယူမိပါကြောင်း၊ အသိပညာရပ်များကိုသာမက အတတ်ပညာရပ်များကို တတ်သိနားလည်ထားလောက်သာ မလုံလောက်ဘဲ အမှားအမှန်ကို ဝေဖန်ပိုင်းခြား ဆုံးဖြတ်နိုင်တဲ့သူများ ဖြစ်လာကြဖို့လည်း လိုအပ်ကောင်း၊ သင်ယူလေ့လာမှုတွေဟာ ကုန်းခန်းနိုင်ခြင်းမရှိဘဲ တိုးတက်ပြောင်းလဲလာတဲ့ ခေတ်စနစ်နှင့်အညီ ဟန်ချက်ညီ မျှတစွာ ပြုမူနေထိုင် ဆောင်ရွက်ကြဖို့လိုသလို ရုပ်ပိုင်းဆိုင်ရာနဲ့ စိတ်ပိုင်း ဆိုင်ရာတို့ ပြည့်ဝပြီး ထူးချွန်ထက်မြက်သူတွေ ဖြစ်လာဖို့လည်း စွမ်းဆောင်ကြရမည်ဖြစ်ကြောင်း၊ အနာဂတ်မှာ နိုင်ငံ့တာဝန်များကို ပုခုံးပြောင်း တာဝန်ထမ်းဆောင်ကြရမည့် မောင်၊ မယ်တို့အနေဖြင့် နည်းပညာနှင့် စက်မှုလက်မှုသိပ္ပံဘာသာရပ်များကို အပတ်တကုတ် ကြိုးစားလေ့လာသင်ယူကြပြီး ပညာရပ်ပိုင်းဆိုင်ရာများကို လုပ်ငန်းနယ်ပယ်တွင် ထိရောက်မှန်ကန်စွာ အသုံးခြခြင်းင်းဖြင့် အကျိုးရှိစွာ သယ်ပိုးထမ်းဆောင်သူများဖြစ်အောင် ဆောင်ရွက်ပေးကြရန်တိုက်တွန်းလိုကြောင်းဖြင့် အမှာစကားပြောကြားခဲ့သည်။
ထို့နောက် အစိုးရစက်မှု လက်မှုသိပ္ပံ(မော်လမြိုင်) ကျောင်းအုပ်ကြီးမှ ၂၀၂၂-၂၀၂၃ ပညာ သင်နှစ်သို့ တက်ရောက်ကြမည့် ကျောင်းသား မောင်၊ မယ် လေးများအား ကြိုဆိုနှုတ်ခွန်းဆက်စကားပြောကြားခဲ့ပြီး ကျောင်းသူ၊ ကျောင်းသားလေးများ၏ တေးသရုပ်ဖော်အကအလှများဖြင့် ဖျော်ဖြေတင်ဆက်မှုအပေါ် ကြည့်ရှုအားပေးခဲ့ကြသည်။
အဲဒီနောက် ပြည်နယ်ဝန်ကြီးချုပ်က အစိုးရစက်မှု လက်မှုသိပ္ပံ(မော်လမြိုင်) အတွက် ထောက်ပံ့ငွေကျပ်သိန်း (၂၀) နှင့် အားကစားပစ္စည်းများ ထောက်ပံ့ပေးအပ်ခဲ့ပြီး ကျောင်းသူ၊ ကျောင်းသားလေးများအား ရင်းရင်းနှီးနှီး လိုက်လံအားပေးနှုတ်ဆက်ခဲ့သည်။