မွန်ပြည်နယ်တွင် အများပြည်သူများ အသက်အရွယ်မရွေး ကိုယ်လက်လှုပ်ရှား အားကစား ဆောင်ရွက်နိုင်ရန် အားကစားနည်းအလိုက်ပြိုင်ပွဲများ ကျင်းပပြုခြင်းများ ဆောင်ရွက်လျက်ရှိရာ (၇၆)နှစ်မြောက် ပြည်ထောင်စုနေ့ အထိမ်းအမှတ် ဂေါက်သီးရိုက်ပြိုင်ပွဲ ဖွင့်ပွဲ အခမ်းအနားကို ဖေဖော်ဝါရီ ၅ ရက်နေ့၊နံနက်ပိုင်းက မော်လမြိုင််မြို့၊ ငန်းတေးဂေါက်ကွင်းတွင် ကျင်းပပြုလုပ်ခဲ့ရာ မွန်ပြည်နယ် ဝန်ကြီးချုပ် ဦးအောင်ကြည်သိန်း၊ အရှေ့တောင်တိုင်း စစ်ဌာနချုပ်တိုင်းမှူး ဗိုလ်ချုပ်မြတ်သက်ဦး၊ ပြည်နယ်ဝန်ကြီးများ၊ တာဝန်ရှိသူများ၊ ပြိုင်ပွဲဝင် ဂေါက်သီးရိုက် အားကစားသမားများ၊ ဖိတ်ကြားထားသည့် ဂေါက်သီးရိုက် အားကစားဝါသနာရှင်များ တက်ရောက်သည်။
ရှေ့ဦးစွာ ပြိုင်ပွဲဝင် ဂေါက်သီးရိုက် အားကစားသမားများက ကွင်းအတွင်းသို့ စနစ်တကျ နေရာယူခဲ့ပြီး ပြည်နယ်ဝန်ကြီးချုပ်က မွန်ပြည်နယ်အတွင်း တစ်မျိုးသားလုံး ကျန်းမာကြံ့ခိုင်ရေးကို ရှေ့ရှု့လျက် အားကစားကဏ္ဍဘက်ပေါင်းစုံ ဖွံ့ဖြိုးတိုးတက်စေဖို့ရေး အလေးထားဆောင်ရွက်လျက်ရှိကြောင်း၊ ဂေါက်သီးရိုက်အားကစားနည်းကို အသက်ငယ်လူငယ်၊ လူရွယ်များထက် သက်လတ်ပိုင်းနှင့် လူကြီးပိုင်းများက စိတ်အပန်းဖြေရန်၊ ကျန်းမာရေးကောင်းမွန်စေရန် ၊ အားကစားသမားများ အချင်းချင်း ချစ်ကြည်ရင်းနှီးမှု ရရှိစေရန် ရည်ရွယ်၍ ပြိုင်ပွဲများ ကျင်းပပြုလုပ်ပေးခြင်း ဖြစ်ပါကြောင်း၊ မိမိ ခန္ဓာကိုယ်အနေအထားနှင့် လိုက်ဖက်တဲ့ အားကစားလေ့ကျင့်ခန်းများကို ဆောင်ရွက်ပေးခြင်းဖြင့် ပျော်ရွှင်မှုများ ရရှိနိုင်စေခြင်း ၊ သက်တူရွယ်တူ အချင်းချင်း အားပေးဖော်များ ကောင်းမွန်စေခြင်း၊ အသင်းအဖွဲ့နှင့်နေတတ်ခြင်း၊ ကောင်းသောယှဉ်ပြိုင် လိုစိတ် အလေ့အထကို ရရှိစေခြင်းစသော အကျိုးကျေးဇူးများကို ရရှိစေမှာဖြစ်ကြောင်း၊ ပြိုင်ပွဲဝင် အားကစားသမားများ အနေဖြင့် ဂေါက်သီးရိုက် အားကစားနည်းရဲ့”တည့်အောင်ချိန် ပြေးအောင်ရိုက် နီးအောင်ပို့ ကပ်အောင်တင် ဝင်အောင်သွင်း” ဆိုတဲ့ဆောင်ပုဒ်အတိုင်း ကြိုးစားယှဉ်ပြိုင်သွားကြရန် မှာကြားလိုကြောင်းဖြင့် ပြောကြားခဲ့သည်။
ထို့နောက် ပြည်နယ်ဝန်ကြီးချုပ်နှင့် တိုင်းမှူးတို့က ပြိုင်ပွဲကို ကာလာဘော်လုံးတို့အား ရိုက်၍ စတင်ဖွင့်လှစ်ပေးခဲ့ပြီး တစ်ဦးချင်း၊ အသင်းလိုက်၊ တန်းအလိုက် ၊ အမျိုးသား၊ အမျိုးသမီး ပြိုင်ပွဲဝင် ဂေါက်သီးရိုက် အားကစားများ တပျော်တပါး ဝင်ရောက် ယှဉ်ပြိုင်နေကြမှုအပေါ် ကြည့်ရှုအားပေးခဲ့သည်။
(၇၆)နှစ်မြောက် ပြည်ထောင်စုနေ့ အထိမ်းအမှတ် ဂေါက်သီးရိုက်ပြိုင်ပွဲကို ယနေ့ နံံနက်ပိုင်းက မော်လမြိုင််မြို့၊ ငန်းတေးဂေါက်ကွင်း၌ စတင်ကျင်းပပြုလုပ်ခဲ့ပြီး ဧည့်သည်တော်များနှင့် မွန်ပြည်နယ်၊ ကရင်ပြည်နယ်တို့မှ ပြိုင်ပွဲဝင် အမျိုးသား၊ အမျိုးသမီး ဂေါက်သီးရိုက် အားကစားသမား (၂၀၀) ဦးတို့မှ ပါဝင်ယှဉ်ပြိုင်ခဲ့ကြကာ ပြိုင်ပွဲဝင် အားကစားသမားများက ပြိုင်ပွဲပုံစံ Handicap ဖြင့်လည်းကောင်း၊ System 36 ဖြင့် ကျင်း(၁၈) ကျင်း ယှဉ်ပြိုင်ကစားမှုပြိုင်ပွဲပုံစံဖြင့် လည်းကောင်း ပါဝင်ယှဉ်ပြိုင် ဆင်နွဲ့ ခဲ့ကြကြောင်း သိရှိရပါသည်။
