မော်လမြိုင်၊ ဖေဖော်ဝါရီ ၈
မွန်ပြည်နယ်၊ မော်လမြိုင်မြို့ရှိ သံလွင်မြစ် ကမ်းနားလမ်းတစ်လျှောက် သန့်ရှင်းသာယာလှပရေးနှင့် အများပြည်သူများ စိတ်အေးချမ်းမြေ့စွာ အပန်းဖြေ အနားယူနိုင်ရေး ဆောင်ရွက်လျက်ရှိရာ ဖေဖော်ဝါရီလ ၇ ရက်နေ့၊ ညနေပိုင်းက မွန်ပြည်နယ်ဝန်ကြီးချုပ်၊ ဦးအောင်ကြည်သိန်း၊ ပြည်နယ်ဝန်ကြီးများနှင့် တာဝန်ရှိသူများသည် မော်လမြိုင်မြို့၊ တိုးချဲ့ကမ်းနားလမ်း၊ ရာမညသဲကွင်းနေရာ၌ လူထုလှုပ်ရှားအားကစားကွင်း ဆောင်ရွက်နိုင်သည့် နေရာနှင့် မြစ်ကမ်းသာ လျှောက်လမ်းနေရာများ တည်ဆောက်ခြင်း၊ ကမ်းထိန်းနံရံ တည်ဆောက်ခြင်း၊ မြေယာရှုခင်း၊ ကလေးကစားကွင်း၊ နားနေခုံများ ဆောင်ရွက်ခြင်း၊ မြတ်ခင်းပြင်နှင့် အရိပ်ရပင်များ၊ ပန်းပင်များ စိုက်ပျိုးခြင်း၊ အလှမီးတိုင်များ ထွန်းညှိခြင်းများဖြင့် ရာမညသဲကွင်း အဆင့်မြှင့်တင်ခြင်းလုပ်ငန်းများ ဆောင်ရွက်နေပြီးစီးမှု အခြေအနေများအား ကြည့်ရှုစစ်ဆေးခဲ့ကြသည်။
ထို့နောက် လုပ်ငန်း တာဝန်ရှိသူမှ သဲသောင်ပြင် အလျား (၅၀၀) ပေ၊ အကျယ် ( ၁၁၀) ပေ တိုးချဲ့ကမ်းနားလမ်း၊ ရာမညသဲကွင်းနေရာအား အဆင့်မြှင့်တင်ခြင်း လုပ်ငန်းများ ဆောင်ရွက်ပြီးစီးနေမှုအခြေအနေအား ရှင်းလင်းတင်ပြပြီး ပြည်နယ်ဝန်ကြီးချုပ်က အပန်းဖြေအနားယူရာ နေရာများကို သန့်ရှင်းသာယာလှပစေရေး အလေးထားဆောင်ရွက်ကြရန်၊ လုပ်ငန်းများဆောင်ရွက်ရာတွင် သတ်မှတ်ကာလအတွင်း အချိန်မီပြီးစီးစေရေးနှင့် စံညီစံညွှန်းပြည့်မီစေရေး ဆောင်ရွက်ကြရန် လမ်းညွှန်မှာကြားသည်။
အဲဒီကမှတစ်ဆင့် ပြည်နယ်ဝန်ကြီးချုပ်နှင့် အဖွဲ့သည် မိုးရာသီကာလများတွင် မော်လမြိုင်မြို့အတွင်း ရပ်ကွက်များ၌ ရေကြီးရေလျှံမှုများအား ကာကွယ်နိုင်စေရန် ဇေယျာမြိုင်ရပ်ကွက်အတွင်းရှိ ဇေယျာမြိုင်- မြေနီကုန်း- ငန်းတေးရပ်ကွက် ချောင်းမကြီးတူးဖော်ခြင်းလုပ်ငန်း ဆောင်ရွက်ထားရှိမှု အခြေအနေများအား ကြည့်ရှုစစ်ဆေးခဲ့ကြသည်။
အဲဒီနောက် တာဝန်ရှိသူမှ ချောင်းမကြီး အပိုင်းလိုက် တူးဖော်ပြီးစီးနေမှု အခြေအနေများနှင့် ပတ်သက်၍ ရှင်းလင်းတင်ပြခဲ့မှုအေပါ် ပြည်နယ်ဝန်ကြီးချုပ်က ရေစီး၊ ရေလာ ကောင်းမွန်စေရေးနှင့် အမှိုက်များ စနစ်တကျစွန့်ပစ်ကြစေရေး ဆောင်ရွက်ကြရန် လမ်းညွှန်မှာကြားခဲ့ပြီး လိုအပ်သည်များကို ပေါင်းစပ်ညှိနှိုင်း ဆောင်ရွက်ပေးခဲ့သည်။
https://t.me/mrtvnews/92717
