မော်လမြိုင်၊ မတ် ၂၉
မော်လမြိုင်တက္ကသိုလ်၊ မဲခေါင်ကိုရီးယား သုတေသနရန်ပုံငွေဖြင့်ဆောင်ရွက်သော “Impact of migration on rural development with special emphasis on agriculture of Mon State, Myanmar” အလုပ်ရုံဆွေးနွေးပွဲကို မတ်လ ၂၉ ရက်နေ့၊ နံနက်ပိုင်းက မော်လမြိုင်တက္ကသိုလ်၊ ဘက်စုံသုံးခန်းမ၌ ကျင်းပပြုလုပ်ရာ မွန်ပြည်နယ်ဝန်ကြီးချုပ် ဦးအောင်ကြည်သိန်း၊ ပြည်နယ်ဝန်ကြီးများ၊ တာဝန်ရှိသူများ၊ ခေတ္တပါမောက္ခချုပ်၊ ဒုတိယပါမောက္ခချုပ်၊ ပါမောက္ခ (ဌာနမှူးများ) ဖိတ်ကြားထားသည့် ဧည့်သည်တော်များ တက်ရောက်သည်။
အလုပ်ရုံဆွေးနွေးပွဲတွင် ပြည်နယ်ဝန်ကြီးချုပ်က မွန်ပြည်နယ်ဟာ စိုက်ပျိုးရေးကို အဓိကထားတဲ့ပြည်နယ် ဖြစ်ပြီး မိုးစပါးစိုက်ဧက ၊ နွေစပါး၊ နေကြာနှင့် ဆီထွက်သီးနှံများ၊ ဒူးရင်း၊ နာနတ်၊ ကျွဲကော၊ ကြက်မောက်၊ သရက် စတဲ့ အသီးအနှံ များလည်း စိုက်ပျိုးလျှက်ရှိပါကြောင်း၊ ကျေးလက်ဖွံ့ဖြိုးတိုးတက်မှုကို အဓိကအကျိုးသက်ရောက် နေသော စိုက်ပျိုးရေးလုပ်ငန်းအပေါ် အကျိုးသက်ရောက်လျှက်ရှိသည့် ရွှေ့ပြောင်းလုပ်သားများ၏ နေထိုင်မှုကိုလေ့လာတဲ့ အလုပ်ရုံဆွေးနွေးပွဲ တစ်ခုဖြစ်ကြောင်း၊ လက်ရှိ ရှိနေတဲ့ value added လုပ်ငန်းများကို လေ့လာပြီးတော့ လိုအပ်တာများကိုဖြည့်ဆည်းပေးဖို့ ဆောင်ရွက်ခြင်းအားဖြင့် ဒေသရဲ့စီးပွားရေး ပိုမိုတိုးတက်လာပြီးတော့ ကျေးလက်ဖွံ့ဖြိုးမှုကို အထောက်အကူပြု နိုင်မှာဖြစ်သလို အတွေ့အကြုံတွေ၊ နည်းပညာတွေ၊ ကျွမ်းကျင်မှုတွေ ပူးပေါင်း လုပ်ဆောင်မယ်ဆိုရင် မိမိဒေသကို ပိုပြီးအထောက်အကူပြုနိုင်မယ့် လုပ်ငန်းတွေ ဖန်တီးနိုင်မှာ ဖြစ်ကြောင်း၊ ယနေ့ အလုပ်ရုံဆွေးနွေးပွဲမှသည် ကျေးလက်ဖွံ့ဖြိုးရေးကို တစ်ခန်းတစ်ကဏ္ဍမှ ပါဝင်လုပ်ဆောင် ပေးနိုင်လိမ့်မယ်လို့ မျှော်လင့်ပါကြောင်းဖြင့် အမှာစကားပြောကြားခဲ့သည်။
ထို့နောက် မော်လမြိုင်တက္ကသိုလ်၊ ခေတ္တပါမောက္ခချုပ်က အလုပ်ရုံဆွေးနွေးပွဲ ကျင်းပရခြင်းနှင့် ပတ်သက်၍ ရှင်းလင်းတင်ပြခဲ့သည်။
အဲဒီနောက် အလုပ်ရုံဆွေးနွေးပွဲသို့ တက်ရောက်လာသူများက ပြည်နယ်အတွင်းရှိ စပါးစိုက်ပျိုးထားမှု အခြေအနေ၊ ရော်ဘာစိုက်ပျိုးထားရှိမှု အခြေအနေနှင့် ရွှေ့ပြောင်းလုပ်သားများ၏ အခြေအနေများနှင့် ပတ်သက်၍ ရှင်းလင်းဆွေးနွေးခဲ့ကြပါသည်။
