မော်လမြိုင်၊ မတ် ၃၁
မွန်ပြည်နယ် လယ်ယာမြေစီမံခန့်ခွဲမှုအဖွဲ့ အစည်းအဝေး အမှတ်စဉ် (၁ / ၂၀၂၃) အစည်းအဝေးကို ၂၀၂၃ ခုနှစ်၊ မတ်လ၃၁ ရက်နေ့ နံနက်ပိုင်းက ပြည်နယ်အစိုးရအဖွဲ့ရုံး၊ အောင်ဆန်းခန်းမ၌ ကျင်းပပြုလုပ်ခဲ့ရာ ပြည်နယ်ဝန်ကြီးချုပ် ဦးအောာင်ကြည်သိန်း၊ ပြည်နယ်ဝန်ကြီးများ၊ မွန်ပြည်နယ် လယ်ယာမြေစီမံခန့်ခွဲမှုအဖွဲ့ ဝင်များ တက်ရောက်သည်။
အစည်းအဝေးတွင် ပြည်နယ်ဝန်ကြီးချုပ်က မွန်ပြည်နယ်သည် စိုက်ပျိုးရေးကို အခြေခံသည့် ပြည်နယ်တစ်ခုဖြစ်သည်နှင့် အညီ စိုက်ပျိုးလယ်ယာမြေများအား စပါးနှင့် ဆီထွက်သီးနှံများ ဆက်လက်စိုက်ပျိုး လုပ်ကိုင်နိုင်ရေး အလေးထားဆောင်ရွက်ကြရမည် ဖြစ်ကြောင်း၊ မြေလွတ်၊ မြေလပ်နှင့် မြေရိုင်းများ လုပ်ပိုင်ခွင့်၊ လယ်ယာမြေများအား အခြားနည်းအသုံးပြုခွင့်များ တင်ပြလျှောက်ထားလာမှုများအပေါ် ဥပဒေ နည်းဥပဒေများနှင့် အညီ ဆောင်ရွက်ကြမည်ဖြစ်ကြောင်း၊ ကျေးရွာများအတွင်းရှိ လယ်ယာမြေများပေါ်တွင် စိုက်ပျိုးထားမှုမရှိဘဲ အကြောင်းမဲ့ လှပ်မြေများ မဖြစ်စေရေး၊ သီးနှံများအား စနစ်တကျ စိုက်ပျိုးကြစေရေး ထိန်းသိမ်းကြပ်မတ်ဆောင်ရွက်ကြရန် အရေးကြီးကြောင်း၊ သက်ဆိုင်ရာ လယ်ယာမြေ စီမံခန့်ခွဲရေးအဖွဲ့ များအနေဖြင့် အောက်ခြေအထိ ကွင်းဆင်းစစ်ဆေး၍ ပြည်သူများ၏ လိုအပ်ချက်များကိုလည်း အလေးထား ဆောင်ရွက်ပေးနိုင်ကြရန်ဖြင့် လမ်းညွှန်မှာကြားခဲ့ပါသည်။
အဲဒီနောက် ပြည်နယ်လယ်ယာမြေစီမံခန့်ခွဲရေးနှင့် စာရင်းအင်းဦးစီးဌာန ပြည်နယ်ဦးစီးမှူး ဦးမင်းသိန်းက ဗဟိုလယ်ယာမြေစီမံခန့်ခွဲမှုအဖွဲ့၏ ဒဏ်ကြေးငွေသတ်မှတ်တင်ပြခြင်း၊ လျော်ကြေးငွေ သတ်မှတ်တင်ပြခြင်း၊ သီးနှံလျော်ကြေးတွက်ချက်တင်ပြလာခြင်း၊ ခရိုင်/မြို့နယ်လယ်ယာမြေ စီမံခန့်ခွဲမှုအဖွဲ့မှ ပြန်လည် တင်ပြလာသည့် ကိစ္စရပ်များနှင့် သက်ဆိုင်ရာကဏ္ဍအလိုက် ရှင်းလင်းတင်ပြပြီး ပြည်နယ်လယ်ယာမြေစီမံခန့်ခွဲမှု အဖွဲ့ဝင်များက ဆွေးနွေးတင်ပြကြပြီးလိုအပ်သည်များကို ပြည်နယ်ဝန်ကြီးချုပ်က ပေါင်းစပ်ညှိနှိုင်း ဖြည့်ဆည်းဆောင်ရွက်ပေးခဲ့သည်။
၂၀၂၃ ခုနှစ်၊ (၄၉)နှစ်မြောက် မွန်ပြည်နယ်နေ့ အထိမ်းအမှတ် အခမ်းအနားတွင် အားသွန်ခွန်စိုက် တာဝန်ထမ်းဆောင်ခဲ့သူများကို ဂုဏ်ပြုနေ့လယ်စာဖြင့် တည်ခင်းဧည့်ခံခြင်း အခမ်းအနားကို ယနေ့နေလယ်ပိုင်းက မော်လမြိုင်မြို့၊ ပြည်နယ်ခန်းမ၌ ကျင်းပပြုလုပ်ရာ ပြည်နယ်ဝန်ကြီးချုပ်က (၄၉)နှစ်မြောက် မွန်ပြည်နယ်နေ့ အထိမ်းအမှတ်အခမ်းအနား၌ မွန်ပြည်နယ်နေ့အတွက် အဘက်ဘက်မှ အောင်မြင်စွာ ဆောင်ရွက်နိုင်ရေး ဝိုင်းဝန်းပံ့ပိုးခြင်း၊ ကဏ္ဍအလိုက် တာဝန်ကျေပွန်စွာ ဆောင်ရွက်ပေးခဲ့ကြသည့် ဝန်ထမ်းများ၊ အသိ ပညာရှင်များ၊ အတတ်ပညာရှင်များအားလုံးကို မှတ်တမ်းတင်ဂုဏ်ပြုကြောင်း၊ မွန်ပြည်နယ်နေ့ကို ယခင်နှစ်များထက် ပိုမိုသာလွန် ကောင်းမွန် စည်ကားသိုက်မြိုက်စွာဖြင့် ကျင်းပနိုင်ရေး ဆောင်ရွက်ခဲ့ပြီး မွန်ပြည်နယ်နေ့အထိမ်းအမှတ်ပြခန်းများ၊ MSMEs ပြခန်းများ၊ ဒေသထွက်ကုန်ပြခန်းများ၊ ရိုးရာအစားအစာအရောင်းဆိုင်များ ခင်းကျင်းပြသရခဲ့မှုအပေါ် အဓိကရည်ရွယ်ချက်ကတော့ မွန်တိုင်းရင်းသား လူငယ်၊ လူရွယ်များ၏ အသိပညာတိုးပွားစေရန်၊ မွန်ရိုးရာ ယဉ်ကျေးမှု၊ ဓလေ့ထုံးတမ်းများနှင့် မွန်တို့ရဲ့ ရှေးကျတဲ့ အနုပညာကို သိရှိနားလည် စေရန်နှင့် ပြည်သူများအသိပညာတိုးပွားစေရန် ဆောင်ရွက်ပေးရခြင်းဖြစ်ကြောင်း၊ ထို့အပြင် ဂုဏ်ပြုချီးမြှင့်ထိုက်သော ဂုဏ်ထူးဆောင်ဆုရရှိသူ ရဟန်း၊ လူပုဂ္ဂိုလ် (၁၄၃)ဦးအနက် လူပုဂ္ဂိုလ် (၁၃၁)ဦးကို အခမ်းအနားဖြင့် ဂုဏ်ထူးဆောင်ဆုများ ပေးအပ်ချီးမြှင့်ခဲ့ပြီး ဘာသာ၊ သာသနာထူးချွန်မှု ဂုဏ်ထူးဆောင် ဆုတံဆိပ်ရရှိသည့် ဆရာတော် (၁၂) ပါးကိုလည်း တာဝန်ရှိသူများက လာရောက်ဆက်ကပ်ပူဇော်ခဲ့ပါကြောင်း၊ မွန်ပြည်နယ်နေ့ အထိမ်းအမှတ် ညစာစားပွဲအခမ်းအနားအပြင် မွန်ပြည်နယ်နေ့အထိမ်းအမှတ် အခမ်းအနားများအားလုံးကို စည်ကားသိုက်မြိုက်စွာဖြင့် အောင်မြင်စွာ ကျင်းပဆောင်ရွက်နိုင်ခဲ့သည့် အတွက် အဖက်ဖက်မှ ဝိုင်းဝန်း ဆောင်ရွက်ပေးကြသူများကိုလည်း အထူးပင် ကျေးဇူးတင်ရှိပါကြောင်းဖြင်းဖြင့် အမှာစကားပြောကြားခဲ့သည်။
အဲဒီနောက် ဂုဏ်ပြုနေ့လည်စာတည်ခင်းဧည့်ခံပွဲကို တက်ရောက်လာကြသူများအား ဂုဏ်ပြုနေ့လည်စာဖြင့် တည်ခင်းဧည့်ခံခဲ့ပြီး ပြည်နယ်ဝန်ကြီးချုပ်နှင့် ပြည်နယ်ဝန်ကြီးများက (၄၉)နှစ်မြောက် မွန်ပြည်နယ်နေ့ အထိမ်းအမှတ် အခမ်းအနားတွင် အားသွန်ခွန်စိုက် တာဝန်ထမ်းဆောင်ခဲ့သူများအား ရင်းရင်းနှီးနှီးတွေ့ဆုံနှုတ်ဆက်ခဲ့ကြသည်။
FIFA – MFF U-15 Youth Football League 2023 ဘောလုံးပြိုင်ပွဲသို့ မွန်ပြည်နယ်ကိုယ်စားပြု U-15 ဘောလုံးအသင်း ဝင်ရောက်ယှဉ်ပြိုင်နိုင်ရေး လုပ်ငန်းညှိနှိုင်းအစည်းအဝေးကို ယနေ့ မွန်းလွဲပိုင်းက ပြည်နယ်အစိုးရအဖွဲ့ရုံး၊ အောင်ဆန်းခန်းမ၌ ကျင်းပပြုလုပ်ခဲ့ရာ ပြည်နယ်ဝန်ကြီးချုပ်က မွန်ပြည်နယ်အနေဖြင့် ပြည်နယ်ရဲ့ အားကစားအဆင့် အတန်းတိုးတက်မြင့်မားရေးအတွက် ကဏ္ဍပေါင်းစုံကနေ ပံ့ပိုးဆောင်ရွက်ပေးလျက်ရှိရာ မြန်မာနိုင်ငံဘောလုံး အားကစားအဆင့်အတန်း တိုးတက် မြင့်မား စွာဖြင့် အောင်မြင်မှုများရရှိရေးအတွက် မြန်မာနေရှင်နယ်လိဂ်ပြိုင်ပွဲများ ဝင်ရောက်ယှဉ်ပြိုင်နိုင်ရေး အလေးထား ဆောင်ရွက်ပေးလျက်ရှိကြောင်း၊ FIFA – MFF U-15 Youth Football League 2023 ပြိုင်ပွဲသည် မြန်မာနိုင်ငံမှာ ပထမဆုံးအကြိမ် ကျင်းပပြုလုပ်မယ့် League ပြိုင်ပွဲ ဖြစ်သလို လူငယ်မျိုးဆက်သစ်တို့ ဘောလုံးလှုပ်ရှားမှုများတွင် ပါဝင်လာစေရေး၊ ပြည်တွင်း လူငယ်ပြိုင်ပွဲ စဉ်ဆက်မပြတ်ကျင်းပနိုင်ရေး ၊ မျိုးဆက်သစ် လူငယ် ကစားသမားများ ထွက်ပေါ်လာရေး ၊ FIFA, AFC, လူငယ်ပြိုင်ပွဲများတွင် မြန်မာ့လက်ရွေးစင် လူငယ်အသင်းများ အောင်မြင်မှုရရှိရေးတို့အတွက် ရည်ရွယ်ပြီးကျင်းပတဲ့ ပြိုင်ပွဲတစ်ခုလည်း ဖြစ်ကြောင်း၊ လူငယ်ဘောလုံးပွဲတွေကို စဉ်ဆက်မပြတ် ပြုလုပ်ပေးခြင်းအားဖြင့် ကလေးလူငယ်တွေကြားမှာ ဘောလုံးကို ပိုမိုစိတ်ဝင်စား လိုက်ပါကစားလာနိုင် ကြမှာဖြစ်သလို မျိုးဆက်သစ် အားကစားလူငယ်လေးများအတွက် များစွာအထောက်အကူပြုစေမှာ ဖြစ်သလို အနာဂါတ်မြန်မာ့လက်ရွေးစင် အသင်း အဆင့်ဆင့်အတွက် တစ်ချိန်မှာ အားထားရနိုင်မယ့် မျိုးဆက်သစ် ကစားသမားကောင်များ မွေးထုတ်ပေးနိုင်မှာဖြစ်ကြောင်း၊ ပြိုင်ပွဲဝင် အားကစားသမားများသည် အသက်(၁၅)နှစ်အောက် အားကစား သမားများဖြစ်တာကြောင့် ၎င်းတို့ရဲ့ပညာရေးကိစ္စသည် အလေးထား စဉ်းစား ရကြရန်လိုကြောင်း၊ ထို့အတွက် ပြည်နယ် အနေနဲ့ အဆင့်မှီစွာ ပါဝင်ယှဉ်ပြိုင်နိုင်ရေးအတွက် ဝိုင်းဝန်းအကြံပြု ဆွေးနွေး ပေးကြပါရန်ဖြင့် အမှာစကားပြောကြားခဲ့သည်။
ထို့နောက် မွန်ပြည်နယ်အားကစားနှင့်ကာယပညာဦးစီးဌာန၊ မွန်ပြည်နယ် ဘော်လုံးဆပ်ကော်မတီဝင်များ၏ တာဝန်ရှိသူများမှ မွန်ပြည်နယ်ကိုယ်စားပြု U-15 ဘောလုံးအသင်း ဝင်ရောက်ယှဉ်ပြိုင်နိုင်ရေး ဆောင်ရွက်ထားရှိမှုအခြေအနေများနှင့် ရှင်းလင်းတင်ပြခဲ့ကြမှုအပေါ် ပြည်နယ်ဝန်ကြီးများနှင့် တာဝန်ရှိသူများက ဖြည့်စွက်ဆွေးနွေး အကြံပြုတင်ကြ၍ ပြည်နယ်ဝန်ကြီးချုပ်က ပေါင်းစပ်ညှိနှိုင်း ဖြည့်ဆည်းဆောင်ရွက်ပေးခဲ့သည်။
