မော်လမြိုင်၊ ဧပြီ ၁၄
မြန်မာ့ရိုးရာမဟာသင်္ကြန်ပွဲတော်ကို ရှေးမြန်မာမင်းများလက်ထက် ခေတ် အဆက်ဆက်မှစပြီး ယနေ့အချိန်အထိ မပျက်မကွက် ထိန်းသိမ်းစောင့်ရှောက်လာခဲ့ကြသည်မှာ နှစ်ပရိစ္ဆေဒ ကြာညောင်းလာပြီးဖြစ်၍
မွန်ပြည်နယ်အတွင်း မြန်မာရိုးရာမဟာသင်္ကြန်ပွဲတော်ကြီးကို အနှစ်သာရရှိရှိဖြင့် ပျော်ရွှင်စွာနှင့် စည်ကားသိုက်မြိုက်စွာ ဆင်ယင်ကျင်းပလျက်ရှိရာ
မြန်မာသက္ကရာဇ် ၁၃၈၄ ခုနှစ် မွန်ပြည်နယ် မြန်မာရိုးရာမဟာသင်္ကြန် ပွဲတော်ဖွင့်ပွဲကို ဧပြီလ ၁၃ ရက်နေ့ အတာသင်္ကြန်အကြိုနေ့ ညနေ ၆ နာရီ ခန့် က မော်လမြိုင်မြို့၊ ကမ်းနားလမ်း၊ ဗဟိုမဏ္ဍပ်၌ ကျင်းပခဲ့သည်။
ဦးစွာ မြန်မာသက္ကရာဇ် ၁၃၈၄ ခုနှစ် မွန်ပြည်နယ် မြန်မာရိုးရာမဟာသင်္ကြန် ပွဲတော်ဖွင့်ပွဲကို မွန်ပြည်နယ်ဝန်ကြီးချုပ် ဦးအောင်ကြည်သိန်း၊ အရှေ့တောင် တိုင်း စစ်ဌာနချုပ် တိုင်းမှူး ဗိုလ်မှူးချုပ် စိုးမင်း နှင့်ပြည်နယ် ၀န်ကြီးများက ဖဲကြိုးဖြတ် ဖွင့်လှစ် ပေးခဲ့ပြီး ဇီဝိတဒါနငှက်လွှတ်ပေးခဲ့ကြသည်။
ထို့နောက် ပြည်နယ်ဝန်ကြီးချုပ်က နှစ်သစ်အမှာစကားပြောကြားရာတွင် တန်ခူးလဟူသည် နှစ်ဟောင်းကုန်ဆုံး၍ နှစ်သစ်သို့ ကူးပြောင်း သောကာလပဲဖြစ်ပြီး မွန်ပြည်နယ်၏ ဒေသခံလူမျိုးများသည်လည်း နှစ်ကုန်၍ နှစ်သစ်ကူးသည့် တန်ခူးလတွင် အလှူဒါန ပွဲများ ခြိမ့်ခြိမ့်သဲသဲ ဆင်နွှဲကြခြင်း၊ စတုဒီသာများ ကျွေးမွေးခြင်း၊ ရဟန်းသံဃာတော်များအား ဆွမ်းဘောဇဉ်များ ကပ်လှူခြင်း၊ ဗုဒ္ဓ ရုပ်ပွားတော်များအား ရေသပ္ပာယ်ခြင်းအပြင် အခြား ကုသိုလ်ကောင်းမှုများဆောင်ရွက်ကြခြင်းသည် မြတ်နိုးလေးစား ဖွယ်ကောင်းသော ယဉ်ကျေးမှုအစဉ်အလာ များနှင့်အညီ တစ်မျိုးသားလုံး နှစ်စဉ်ပျော်ရွှင်စွာ ဆင်နွှဲခဲ့ကြတဲ့ သင်္ကြန်ပွဲတော်က ထူးခြားသော အမျိုးသားရေးပွဲတော်များအဖြစ် မြန်မာတို့အနေဖြင့် ဂုဏ်ယူကြရဖွယ်ဖြစ်ပါကြောင်း၊ သင်္ကြန်ထမင်းသည် မိမိတို့ပြည်နယ် အတွင်း အထင်ရှားဆုံး စတုဒီသာတစ်မျိုးဖြစ်ပြီး သင်္ကြန်ကာလ အတွင်း တည်ခင်းဧည့်ခံကျွေးမွေးသော အစားအစာဖြစ်သဖြင့် “သင်္ကြန်ထမင်း” ဟု နာမည်ကြီးခဲ့ခြင်းဖြစ်ကြောင်း၊ ပုဂံခေတ်များမှစ၍ အင်းဝခေတ်၊ ကုန်းဘောင်ခေတ်၊ ရတနာပုံခေတ် ကာလများသည့်တိုင်အောင် အတာကူးသော တန်ခူးလဖြင့် ရေပွဲတော်၊ သင်္ကြန်ပွဲတော်ကို ခြိမ့်ခြိမ့်သဲ ကျင်းပခဲ့ကြသည်မှာ မြင်တွေ့ နေရတာ ဖြစ်ကြောင်း၊ မဟာသင်္ကြန်ပွဲတော်သည် မြန်မာနိုင်ငံ၏ ရိုးရာယဉ်ကျေးမှုအမွေအနှစ်ဖြစ်ကြောင်း ကမ္ဘာမှ သိရှိ စေရေး အမျိုးသားရေးတာဝန်တစ်ရပ်အဖြစ် ဖော်ထုတ်ဆောင်ရွက် သွားရမှာဖြစ်တဲ့အတွက် ယခုမြန်မာ့ရိုးရာမဟာသင်္ကြန်ပွဲတော်ကို စည်းကမ်း ရှိသော သင်္ကြန်ပွဲတော်အဖြစ် ပျော်ရွှင်စွာ ရေကစားနေကြသည့် ပုံရိပ် များကို ဖော်ထုတ်ကြရန်အပ်ကြောင်း၊ မင်္ဂလာရှိသော နှစ်သစ်အချိန်အခါသမယမှာ ကိုယ်စိတ်နှစ်ဖြာ ကျန်းမာလန်းဖြာ၍ နှစ်ဟောင်းမှ အညစ်အကြေးများ၊ အခက်အခဲများကို ကျော်လွှားပြီး စိတ်သစ်၊ လူသစ်၊ အားမာန်သစ်များဖြင့် အများအကျိုး၊ ဒေသအကျိုး၊ အမျိုးဘာသာ သာသနာအကျိုး၊ နိုင်ငံ့အကျိုးတို့ကို ဆထက် ထမ်းပိုး ပိုမိုသယ်ပိုးနိုင်ကြပါစေလို့ မင်္ဂလာတရားများနှင့်ပြည့်စုံကြ ပါစေကြောင်း နှစ်သစ်ကူးဆု တောင်းမေတ္တာပို့သအပ်ပါကြောင်းဖြင့် အမှာစကားပြောကြားခဲ့သည်။
အဲဒီနောက် ပြည်နယ်ဝန်ကြီးချုပ်၊ တိုင်းမှူးမှင့် ပြည်နယ်ဝန်ကြီးများက လှပျိုဖြူလေးများ၏ ယိမ်းအကအလှများဖြင့် ဖျော်ဖြေတင်ဆက်နေမှုများ ကိုကြည့်ရှုအားပေးခဲ့ကြပြီး လှပျိူဖြူလေးများနှင့် တက်ရောက်လာကြသော ဧည့်ပရိတ်သတ်များအား အတာရေစင် အမွှေးနံသာရေများကို သပြေခတ်ဖြင့် ပတ်ဖြန်းခဲ့ကြသည်။
အလားတူ အရှေ့တောင်တိုင်းစစ်ဌာနချုပ် မြန်မာ့ရိုးရာယဉ်ကျေးမှု မဟာအတာသင်္ကြန်ပွဲတော် ရေကစားမဏ္ဍပ် ဖွင့်ပွဲအခမ်းအနားနှင့် မော်လမြိုင်မြို့၊ ကမ်းနားလမ်းရှိ မွန်မင်းလမ်းအပန်းဖြေနာနေစခန်း သင်္ကြန်မဏ္ဍပ်အား ပြည်နယ် ဝန်ကြီးချုပ်၊ တိုင်းမှူး၊ ၀န်ကြီးများနှင့် တာဝန်ရှိသူများမှ တက်ရောက်ကြ၍ ဖွင့်ပွဲအခမ်းအနားအား ဖဲကြိုးဖြတ် ဖွင့်လှစ် ပေးခဲ့ပြီး လှပျိဖြူလေးများ၏ ယိမ်းအကဖျော်ဖြေနေမှုများကို ကြည့်ရှူ၍ အတာရေစင််အမွှေးနံသာရေးများဖြင့် ပတ်ဖျန်းခဲ့ကြောင်းသိရှိရသည်။
