မော်လမြိုင်၊ ဩဂုတ် ၁၉
မွန်ပြည်နယ်အတွင်း အခြေခံပညာ စာသင်ကျောင်းများမှာ သန့်ရှင်း၍ စိမ်းလန်းစိုပြေပြီး ဥပဓိရုပ် ကောင်းမွန်စေရေး၊ ကျောင်းသူ၊ ကျောင်းသားများ စိတ်အေးချမ်းမြေ့စွာ ပညာသင်ကြားနိုင်ရေးအတွက်မွန်ပြည်နယ် ဝန်ကြီးချုပ် ဦးအောင်ကြည်သိန်း၊ ပြည်နယ်ဝန်ကြီးများနှင့် တာဝန်ရှိသူများသည် ဩဂုတ်လ ၁၉ ရက်နေ့၊ နံနက်ပိုင်းက မော်လမြိုင်မြို့၊ အမှတ်(၃) အခြေခံပညာ အထက်တန်းကျောင်းဝင်းအတွင်း ခြုံနွယ်များ၊ မြက်များနှင့် အမှိုက်များအား ဌာနဆိုင်ရာများ၊ မြန်မာနိုင်ငံရဲတပ်ဖွဲ့၊ အထွေထွေအုပ်ချုပ်ရေး ဦးစီးဌာန ဝန်ထမ်းများ၊ မီးသတ်တပ်ဖွဲ့ဝင်များ၊ လူမှုရေးအသင်းအဖွဲ့များ၊ ရပ်ကွက်နေပြည်သူများက စာသင်ကျောင်း စိမ်းလန်းစိုပြေစေရေးနှင့် သန့်ရှင်း သာယာလှပစေရေးအတွက် ကျောင်းအကျိုးပြု စုပေါင်းသန့်ရှင်းရေး ဝိုင်းဝန်း ဆောင်ရွက်နေကြမှုအပေါ် ကြည့်ရှုအားပေးသည်။
ထို့နောက် ပြည်နယ်ဝန်ကြီးချုပ်က စာသင်ကျောင်းများ ကျောင်းအင်္ဂါရပ်နှင့် ကိုက်ညီမှုရှိပြီး သန့်ရှင်းသာယာလှပမှုရှိစေရန်၊ သန့်ရှင်း၍ စိမ်းလန်းစိုပြေသော စာသင်ကျောင်းများ ဖြစ်ပေါ်လာစေရေး အလေးထားဆောင်ရွက်ပေးကြရန် ဝိုင်းဝန်းကူညီဆောင်ရွက်ပေးကြပါရန် လမ်းညွှန်မှာကြားခဲ့သည်။
အဲဒီနောက် ပြည်နယ်ဝန်ကြီးချုပ်က စာသင်ကျောင်းဆောင်များအား လှည့်လည်ကြည့်ရှုစစ်ဆေးခဲ့ပြီး ကျောင်းတာဝန်ရှိသူများနှင့် တွေ့ဆုံ၍ လိုအပ်သည်များကို ဖြည့်ဆည်း ဆောင်ရွက်ပေးခဲ့သည်။
မွန်ပြည်နယ်အတွင်း မြို့နယ်အသီးသီးရှိ အခြေပညာစာသင်ကျောင်းများတွင်လည်း စိမ်းလန်းစိုပြေစေရေးနှင့် ကျောင်းသန့်ရှင်းသာယာလှပစေရေးအတွက် ကျောင်းအကျိုးပြု စုပေါင်းသန့်ရှင်းရေးကို အပတ်စဉ် ဆောင်ရွက်ပေးလျက်ရှိကြောင်း သိရှိရသည်။
အဲဒီကမှတစ်ဆင့် ပြည်နယ်ဝန်ကြီးချုပ်သည် မော်လမြိုင်မြို့၊ ကမ်းနားလမ်းရှိ ရတနာထွန်းဈေးသို့ရောက်ရှိ၍ ဈေးအတွင်းသို့လိုက်လံ ကြည့်ရှုစစ်ဆေးခဲ့ပြီး ဈေးတာဝန်ရှိသူများအား တွေ့ဆုံကာ ဈေးအတွင်း၊ အပြင် သန့်ရှင်းသာယာရေး၊ စနစ်တစ်ကျရောင်းဝယ်ဖောက်ကားနိုင်ရေး ဆောင်ရွက်ကြရန်၊ ယာဉ်ကြောပိတ်ဆို့မှုများ မဖြစ်ပွားစေရေး၊ အမှိုက်များကို စနစ်တကျ စွန့်ပစ်စေရေးအပြင် အမှိုက်သိမ်းစနစ်ကောင်းမွန်စေရေးကိုလည်း တာဝန်ရှိသူများမှလည်း ဝိုင်းဝန်းဆောင်ရွက်ပေးကြရန်ဖြင့် လမ်းညွှန်မှာကြားခဲ့ပြီး အများပြည်သူများ ငါး၊ ပုစွန်နှင့် ရေထွက်ပစ္စည်းများအား ရောင်းချပေးနေမှုအခြေအနေကို ကြည့်ရှုအားပေးသည်။
