မော်လမြိုင် စက်တင်ဘာ ၃၀
မွန်ပြည်နယ်၊ မော်လမြိုင်မြို့ပေါ်ရှိ ကျောင်းတိုက်အသီးသီးတွင် စာသင်၊ စာချ သီတင်းသုံးနေထိုင်တော်မူသော ဆရာတော်၊ သံဃာတော်၊ သာမဏေနှင့် သီလရှင်များ ဆွမ်းကိစ္စ ခက်ခဲပင်ပန်းမှုမရှိစေရေးနှင့် ပစ္စည်းလေးပါးအဆင်ပြေစေရေး၊ ထေရဝါဒဗုဒ္ဓသာသနာတော်ကို အထောက်အပံ့ဖြစ်စေရေးအတွက် မော်လမြိုင်မြို့လုံးကျွတ်ဆွမ်းဆန်စိမ်းလောင်းလှူပွဲကို နှစ်စဉ်ကျင်းပလာခဲ့သည်မှာ ယခုအခါ(၁၉၀)ကြိမ်မြောက်သို့ ရောက်ရှိလာခဲ့ပြီးဖြစ်သည်။
မော်လမြိုင်မြို့လုံးကျွတ် ဆွမ်းဆန်စိမ်းလောင်းလှူပွဲ၏ (၁၉၀)ကြိမ်မြောက် မြို့လုံးကျွတ်ဆွမ်းဆန်စိမ်းလောင်းလှူပွဲကို တော်သတင်းလဆုတ် ၁၃ ရက် နေ့မှ ၁၄ ရက်နေ့ထိ နှစ်ရက်တိုင်တိုင် နှစ်စဉ်ကျင်းပပြုလုပ်ရာ စက်တင်ဘာ ၃၀ရက်နေ့နံနက်ပိုင်းက မွန်ပြည်နယ်အစိုးရအဖွဲ့ ပြည်နယ်ဝန်ကြီးချုပ်ဦးအောင်ကြည်သိန်း၊ အရှေ့တောင်တိုင်းစစ်ဌာနချုပ်တိုင်းမှူး ဗိုလ်ချုပ် ကျော်လင်းမောင်၊ ပြည်နယ်တရားလွှတ်တော် တရားသူကြီးချုပ်ဦးညီညီစိုး၊ ပြည်နယ်အစိုးရအဖွဲ့ဝင်ဝန်ကြီးများ၊ ပြည်နယ်၊ ခရိုင်၊ မြို့နယ်အဆင့်ဌာနဆိုင်ရာများ၊ ဗုဒ္ဓဘာသာနွယ်ဝင်စေတနာရှင်ပြည်သူများက လောင်းလှူခဲ့ကြသည်။
အဆိုပါ ဆွမ်းဆန်စိမ်းလောင်းလှူပွဲကို မော်လမြိုင်မြို့၊ ဇေယျာသီရိရပ်ကွက် လောကမာရဇိန်(ငွေဘုံသာ) ဘုရားတည်နေရာမှစတင်၍ မြို့ပေါ်ရှိဘုန်းတော်ကြီးကျောင်းနှင့် သီလရှင်ကျောင်း(၃၃၇)ကျောင်းတို့မှ ဆရာတော်၊ သံဃာတော်၊ သာမဏေအပါး(၇၀၀၀)ကျော်၊ သီလရှင်အပါး(၁၀၀၀)ကျော် စုစုပေါင်းသံဃာတော်၊ သီလရှင် အပါး(၈၀၀၀)ကျော်တို့ကို ဆွမ်းဆန်စိမ်းများ လှူဒါန်းလောင်းလှူ ပူဇော်ခဲ့ကြသည်။ မြို့လုံးကျွတ်ဆွမ်းဆန်စိမ်းလောင်းလှူပွဲသို့ ကြွရောက်ချီးမြှင့်တော်မူသော ဆရာတော်၊ သံဃာတော်၊ သာမဏေ၊ သီလရှင်များသည် ဇေယျာသီရိရပ်ကွက်ရှိ လောကမာရဇိန် ငွေဘုံသာဆုတောင်းပြည့် စေတီမှ ဇေယျာ(၂)လမ်းအတိုင်း မြောက်ဘက်မှ အနောက်ဘက် ဒိုင်းဝန်ကွင်းလမ်းမကြီးတစ်လျှောက်၊ အတ္ထရံဟိုတယ်ကွေ့မှ အောက်လမ်းမကြီး အတိုင်း စစ်ကဲကုန်းရပ်ကွက်၊ သာယာကုန်းဝတ်တော်ကြီးအထိ ထိုမှတစ်ဆင့် ဗဟိုလမ်း၊ မောရဝတီပန်းခြံရှေ့အထိလည်းကောင်း (ပထမ)နေ့ ဆွမ်းဆန်စိမ်းအလှူခံ ကြွရောက်ချီးမြှင့်ခဲ့ကြရာ ဌာနဆိုင်ရာများ၊ စေတနာရှင်ပြည်သူများက သဒ္ဒါတရားထက်သန်စွာဖြင့် ဆွမ်းဆန်စိမ်းများကို လှူဒါန်းလောင်းလှူပူဇော်ခဲ့ကြကြောင်း သိရှိရသည်။
