သမိုင်းဝင် ကျိုက်ဖျဉ်ကူ စေတီတော်မြတ်ကြီး စိန်ဖူးတော်၊ ငှတ်မြတ်နားတော်၊ ထီးတော် ပြန်လည်တင်လှူပူဇော်နိုင်ရေး အလှူငွေများလှူဒါန်း၊ မွန်ပြည်နယ်မြေအသုံးချမှုကော်မတီ လုပ်ငန်းညှိနှိုင်းအစည်းအဝေး (၁/ ၂၀၂၂) တက်ရောက်

မော်လမြိုင်၊ စက်တင်ဘာ ၂၅
သာသာ၊ သာသနာ ရောင်ဝါထွန်းလင်းတောက်ပသည့် မွန်ပြည်နယ်တစ်ခွင်မှာ တန်းခိုးကြီး ဘုရားစေတီပုထိုးများစွာတည်ရှိပြီး ပေါင်မြို့နယ်၊ မုတ္တမ တောင်ရိုးတန်းတွင် တည်ထားကိုးကွယ်တော်မူသော ရှေးဟောင်းဘုရား (၁၆) ဌာန သမိုင်းဝင် ဆံတော်ရှင်များ ကိန်းဝပ်စံပယ်တော်မူသော စေတီတော်များအနက်မှ သမိုင်းဝင် ကျိုက်ဖျဉ်ကူ စေတီတော်မြတ်ကြီး စိန်ဖူးတော်၊ ငှတ်မြတ်နားတော်၊ ထီးတော် ပြန်လည်တင်လှူပူဇော်နိုင်ရေးအတွက် ၂၀၂၂ ခုနှစ်၊ စက်တင်ဘာလ ၂၅ ရက်နေ့၊ သီတင်းကျွတ်လဆန်း (၁) ရက်နေ့၊ နံနက်ပိုင်းက ကျိုက်ဖျဉ်ကူ စေတီတော်မြတ်ကြီး ဓမ္မာရုံ၌ ကျင်းပပြုလုပ်ရာ ဆရာတော်၊ သံဃာတော် အရှင်သူမြတ်များမှ ဦးစီးအမှူးပြု၍ ဧည့်ပရိသတ်အပေါင်းတို့မှ အခမ်းအနားကို နမောတဿ သုံးကြိမ်ရွတ်ဆို ဘုရားကန်တော့ပြီး ဆရာတော် သံဃာတော်များ ရွတ်ပွားသရဇ္ဈာယ်မူအပ်သော ပရိတ် တရားတော်များ နာယူကြည်ညို၍ လှူဖွယ်ဝတ္ထုများ ဆက်ကပ်လှူဒါန်းခဲ့ကာ စေတီတော်မြတ်ကြီး စိန်ဖူးတော်၊ ငှတ်မြတ်နားတော်၊ ထီးတော် ပြန်လည်တင်လှူပူဇော်နိုင်ရေးအတွက် သာသနာရေးရာများ လျှောက်ထား၍ အပူဇော်ခံထားရှိရာ ဓမ္မာရုံတော်ပို့ ပြည်နယ်ဝန်ကြီးချုပ် ဦးဇော်လင်းထွန်း၊ ပြည်နယ်ဝန်ကြီးများ၊ အလှူရှင်များဖြစ်ကြသော မဏိဇောတဓရ ဦးလှထွန်းမိသားစု၊ စေတနာရှင် အလှူရှင်များ၊ တာဝန်ရှိသူများမှ ပင့်ဆောင်ပူဇော်ကြသည်။
ထို့နောက် သမိုင်းဝင် ကျိုက်ဖျဉ်ကူ စေတီတော်မြတ်ကြီး စိန်ဖူးတော်၊ ငှတ်မြတ်နားတော်၊ ထီးတော် ပြန်လည်တင်လှူပူဇော်နိုင်ရေးအတွက် ပြည်နယ်ဝန်ကြီးချုပ်နှင့် ဇနီး၊ ပြည်နယ်ဝန်ကြီးများ၊ စေတနာရှင်၊ အလှူရှင်များ၊အများပြည်သူများက အလှူငွေများ ထည့်ဝင်လှူဒါန်းကြမှုအပေါ် လက်ခံ၍ လှူဒါန်းမှု အစုစု အတွက် အနုမောဒနာ တရားနာယူ ကြည်ညိုပြီး ရေစက်သွန်းချ အမျှ ပေးဝေခဲ့ကြသည်။
မွန်ပြည်နယ်တွင် ပေါင်မြို့နယ် သမိုင်းဝင် ကျိုက်ဖျဉ်ကူ စေတီတော်မြတ်ကြီး စိန်ဖူးတော်၊ ငှတ်မြတ်နားတော်၊ ထီးတော် ပြန်လည်တင်လှူပူဇော်ခြင်းကို လာမည့် ၂၀၂၃ ခုနှစ်၊ ပြာသိုလပြည့်နေ့တွင် လည်းကောင်း၊ သထုံမြို့နယ်ရှိ အလံတစ်ရာ စေတီတော် ထီတော်တင်လှူခြင်းကို တပို့လပြည့်နေ့တွင် လည်းကောင်း၊ သထုံရွှေစာရံတော် ထီတော်တင်လှူခြင်းနှင့် လုံးတော်ပြည့်ရွှေသင်္ကန်းကပ်လှူ ပူဇော်ခြင်းကို တပေါင်းလပြည့်နေ့တို့တွင် လည်းကောင်း ကျင်းပပြုလုပ်သွားမည် ဖြစ်ပါကြောင်း သိရှိရသည်။

မွန်ပြည်နယ်အနေဖြင့် မြေအသုံးချမှုစီမံခန့်ခွဲခြင်း၊ မြေခွဲဝေချထားခြင်းနှင့် မြေအသုံးချမှု စီမံကိန်းလုပ်ငန်းစဉ်များ အရည်အသွေး ကောင်းမွန်စေခြင်းတို့ကို ရည်ရွယ်၍ မြေအသုံးချမှု မူဝါဒကို အကောင်အထည်ဖော်ဆောင်ရွက်လျက်ရှိရာ မွန်ပြည်နယ်မြေအသုံးချမှုကော်မတီ လုပ်ငန်းညှိနှိုင်းအစည်းအဝေး (၁/ ၂၀၂၂) ကို ၂၀၂၂ ခုနှစ်၊ စက်တင်ဘာလ ၂၇ ရက်နေ့၊ နံနက်ပိုင်းက ပြည်နယ်အစိုးရအဖွဲ့ရုံး၊ အောင်ဆန်းခန်းမ၌ ကျင်းပပြုလုပ်ခဲ့ရာ ပြည်နယ်ဝန်ကြီးချုပ် ဦးဇော်လင်းထွန်းက နိုင်ငံတော်၏ ဖွံ့ဖြိုးရေးနှင့် ပတ်ဝန်းကျင်ထိန်းသိမ်းရေးဆိုင်ရာ လုပ်ငန်းများ၊ မြေအသုံးချမှု စီမံကိန်းနှင့် ရင်းနှီးမြှုပ်နှံမှု လုပ်ငန်းများအတွက် မြေအသုံးချမှုနှင့် စပ်လျဉ်း၍ အသုံးချမည့်မြေပမာဏ လျာထားဆုံးဖြတ်ရာတွင် တိကျမှန်ကန်သည့် သတင်းအချက်အလက်ကို အကျိုးသက်ဆိုင်သူများအား ပွင့်လင်းမြင်သာစွာ သိရှိစေရေးဆောင်ရွက်ရာတွင် ချမှတ်ထားသည့် မြေအသုံးချမှု မူဝါဒများနှင့်အညီဖြစ်စေရေး အလေးထားဆောင်ရွက်ကြရမည်ဖြစ်ကြောင်း၊ မြန်မာနိုင်ငံ အမျိုးသားမြေပုံစနစ် (One Map Myanmar) ရေးဆွဲပြုစုရန်အတွက် ပြည်သူများကိုးကားနိုင်မည့် ကိန်းဂဏန်းအချက်အလက်များကို သက်ဆိုင်ရာဌာနများနှင့် ပူးပေါင်း၍ ပြုစုဆောင်ရွက်ပေးရန်လိုကြောင်း၊ ပြည်နယ်အတွင်း ယဉ်ကျေးမှုအမွေအနှစ်နှင့် ဂေဟစနစ်များ ထိန်းသိမ်းရေးအတွက် သဘာဝ ထိန်းသိမ်းရေးနယ်မြေအဖြစ်၊ ကြိုးဝိုင်း၊ ကြိုးပြင် ကာကွယ်တောများ၊ ဘေးမဲ့တောများ၊ သဘာဝပတ်ဝန်းကျင် ထိန်းသိမ်းရေး ဧရိယာများကို ဖွဲ့စည်းသတ်မှတ်ပြီး ထိန်းသိမ်းစောင့်ရှောက်ကြရမည်ဖြစ်ကြောင်း၊ အများပြည်သူများ မြေအသုံးချခြင်း၊ မြေလုပ်ပိုင်ခွင့်ချထားခြင်းနှင့် အခြားနည်းအသုံးပြုခြင်းတို့နှင့် စပ်လျဉ်း၍ တရားဝင်အခွင့်အရေး ရရှိစေရေးနှင့် မြေ အငြင်းပွားမှုများကို လွယ်ကူစွာဖြေရှင်းနိုင်ခြင်းတို့ကို ဆောင်ရွက်နိုင်ရန် တိကျသောနယ်နိမိတ် မြေပုံများရေးဆွဲရာတွင် မြေကြီးမြေပုံစနစ်၊ မြေအမျိုးအစားသတ်မှတ်သည့် စနစ် ထားရှိကျင့်သုံးနိုင်ရေးအတွက် အားလုံးဝိုင်းဝန်းပူးပေါင်း ဆောင်ရွက်ပေးကြရန် ပြောကြားသည်။
အဲဒီနောက် ပြည်နယ်မြေအသုံးချမှုကော်မတီအတွင်းရေးမှူး၊ သစ်တောဦးစီးဌာန၊ ပြည်နယ်ညွှန်ကြားရေးမှူးမှ မြေအသုံးချမှု မူဝါဒအရ မြေအသုံးချမှုနှင့် လုပ်ကိုင်ခွင့်များ ဆောင်ရွက်ပြီးစီးမှု၊ မြေအသုံးချမှုကော်မတီအဆင့်ဆင့် ဖွဲ့စည်းဆောင်ရွက်ပြီးစီးမှုနှင့် ယင်းတို့၏လုပ်ငန်းတာဝန်များ ၊ သစ်တောဖုံးလွှမ်းမှုနှင့် သစ်တောမြေ တိုးချဲ့ဖွဲ့စည်းရန်လျာထား ဆောင်ရွက်မှုများ၊ လယ်ယာမြေ လုပ်ပိုင်ခွင့် လျှောက်ထားမှုနှင့် စက်ရုံစုဧရိယာများ ဖော်ဆောင်နေမှုအခြေအနေတို့အား ရှင်းလင်းတင်ပြခဲ့ပြီး ပြည်နယ်ဝန်ကြီးများနှင့် ကော်မတီဝင်များမှ ဖြည့်စွက်ဆွေးနွေးခဲ့ကြမှုအပေါ် ပြည်နယ်ဝန်ကြီးချုပ်က လိုအပ်သည်များကို ပေါင်းစပ်ညှိနှိုင်းဆောင်ရွက်ပေးသည်။

You may also like