မွန်ပြည်နယ်အတွင်း ဘက်စုံလွှမ်းခြုံနိုင်သော ပညာရေးစနစ်ကို အကောင်အထည်ဖော်ဆောင်ရွက်ရာတွင် ပြည်နယ်၏ အခြေခံပညာရေးကဏ္ဍ အရည်အသွေး တိုးတက်မြင့်မားရေးကို အထူးအလေးထား ဆောင်ရွက်လျက်ရှိရာ မွန်ပြည်နယ် ၊ ၂၀၂၃ ခုနှစ်၊ တက္ကသိုလ်ဝင်စာမေးပွဲ ဝင်ရောက်ဖြေဆိုမည့် ကျောင်းသူ၊ ကျောင်းသားများအား တွေ့ဆုံအားပေးခြင်း အခမ်းအနားကို ဖေဖော်ဝါရီလ ၂၈ ရက်နေ့၊ မွန်းလွဲပိုင်းက အမှတ် (၉) အခြေခံပညာအထက်တန်းကျောင်း၊ ကျောင်းခန်းမဆောင်၌ ကျင်းပပြုလုပ်ရာ မွန်ပြည်နယ် ဝန်ကြီးချုပ် ဦးအောင်ကြည်သိန်း၊ ပြည်နယ်ဝန်ကြီးများ၊ ဌာနဆိုင်ရာတာဝန်ရှိသူများ၊ ဆရာ၊ ဆရာမများ၊ တက္ကသိုလ်ဝင်စာမေးပွဲ ဝင်ရောက်ဖြေဆိုမည့် ကျောင်းသူ၊ ကျောင်းသားများ တက်ရောက်သည်။
အခမ်းအနားတွင် ပြည်နယ်ဝန်ကြီးချုပ်က မွန်ပြည်နယ်သည် နှစ်စဉ် တက္ကသိုလ်ဝင်တန်းစာမေးပွဲ အောင်ချက်မြင့်မားသည့် ပြည်နယ်တစ်ခုဖြစ်သည်နှင့်အညီ ပြည်နယ်၏ အခြေခံပညာရေးကဏ္ဍ အရည်အသွေး တိုးတက်မြင့်မားရေးကို အထူးအလေးပေး ဆောင်ရွက်လျက်ရှိပါကြောင်း၊ သားတို့ သမီးတို့ အနေဖြင့်လည်းစာမေးပွဲဖြေဆိုဖို့အတွက် အသင့်ဖြစ် နေပြီလို့ ထင်မြင်ယူဆမိသလို စာမေးပွဲကို အခက်အခဲမရှိ ဖြေဆို အောင်မြင်နိုင်ရေးကလည်း အရေးကြီးကြောင်း၊ တက္ကသိုလ်ဝင် စာမေးပွဲကို အေးချမ်း လုံခြုံစွာ ဖြေဆိုနိုင်ရေးအတွက် လိုအပ်သည့် ကိစ္စအရပ်ရပ်များအပြင် ကျန်းမာရေး စောင့်ရှောက်မှုများကို ဖြည့်ဆည်းဆောင်ရွက် ပေးသွားမှာ ဖြစ်ပြီး စာမေးပွဲကို စိတ်အေးချမ်းမြေ့စွာ ဖြေဆိုနိုင်ရေးကိုလည်း အထူးဂရုစိုက် ဆောင်ရွက်ပေးသွားမှာဖြစ်ကြောင်း၊ ၂၀၂၃ ခုနှစ် တက္ကသိုလ်ဝင် စာမေးပွဲကို ထူးထူးချွန်ချွန် အောင်မြင်စွာ ဖြေဆိုနိုင်စေရန်နှင့် မျှော်မှန်းထားတဲ့ ပန်းတိုင်ကို အရောက်လှမ်းနိုင် ကြပါစေရန် ဆန္ဒပြုပြောကြားလိုပါကြောင်းဖြင့် အမှာစကားပြောကြားခဲ့သည်။
ဆက်လက်ပြီး ပြည်နယ်ဝန်ကြီးချုပ်က ၂၀၂၃ ခုနှစ် ၊ တက္ကသိုလ်ဝင်စာမေးပွဲ ဝင်ရောက်ဖြေဆိုမည့် ကျောင်းသူ၊ ကျောင်းသားများအတွက် အာဟာရဖြည့်စွက်စာများ၊ ကြက်ဥနှင့် ကွေကာအုပ်များ ထောက်ပံ့ပေးအပ်ခဲ့သည်။
ထို့နောက် ပြည်နယ်ဝန်ကြီးချုပ်က ကျောင်းသူ၊ ကျောင်းသားလေးများအား ရင်းရင်းရင်းနှီးနှီး တွေ့ဆုံအားပေးခဲ့သည်။
အဲဒီနောက် ပြည်နယ်ဝန်ကြီးချုပ်နှင့် ပြည်နယ်ဝန်ကြီးများက ကျောင်းသူကျောင်းသား တစ်ဦးချင်းစီးအား အာဟာရဖြည့်စွက်စာများ အသီးသီး ပေးအပ်ခဲ့ကြသည်။
၂၀၂၃ ခုနှစ် ၊ တက္ကသိုလ်ဝင်စာမေးပွဲကို မတ်လ ၈ ရက်နေ့မှ၊ ၁၈ ရက်နေ့အထိ ကျင်းပပြုလုပ်သွားမည်ဖြစ်ကာ မွန်ပြည်နယ်အနေဖြင့် စာစစ်ဌာန (၂၃) ခုရှိပြီး ဝင်ရောက် ဖြေဆိုမည့် ကျောင်းသား၊ ကျောင်းသူ စုစုပေါင်း (၆၂၂၀) ဦး ရှိကြောင်းနှင့် တက္ကသိုလ်ဝင်စာမေးပွဲကတ်ပြားများကို သက်ဆိုင်ရာ အခြေပညာအထက်တန်းများနှင့် မြို့နယ်အသီးသီးရှိ ပညာရေးမှူးရုံးများမှာ ဖေဖော်ဝါရီ၂၀ ရက်နေ့မှ စတင်ထုတ်ပေးလျက်ရှိကြောင်း သိရှိရသည်။