မွန်ပြည်နယ် ဝန်ကြီးချုပ် ဦးအောင်ကြည်သိန်း မွန်ပြည်နယ်အစိုးရအဖွဲ့၏ အစီအစဉ်ဖြင့် မျိုးစေ့ချကိရိယာ Drum seeder များ ထောက်ပံ့ပေးအပ်ပွဲ နှင့် စိုက်စနစ်မှန်ကန်ရေးအတွက် မျိုးစေ့ချကိရိယာ Drum seeder၊ လက်ဆွဲကောက်စိုက်စက် နှင့် ကောက်စိုက်စက်ဖြင့် စိုက်ပျိုးခြင်း ကွင်းသရုပ်ပြပွဲ အခမ်းအနား၊ မွန်ပြည်နယ် လယ်ယာမြေနှင့်အခြားမြေများသိမ်းဆည်းခြင်းခံရမှုများ ပြန်လည်စိစစ်ရေး ကော်မတီ အစည်းအဝေးအမှတ်စဉ် (၁/၂၀၂၄) တက်ရောက်

မော်လမြိုင်၊ ဇူလိုင် ၄
မွန်ပြည်နယ်အစိုးရအဖွဲ့၏ အစီအစဉ်ဖြင့် မျိုးစေ့ချကိရိယာ Drum seeder များ ထောက်ပံ့ပေးအပ်ပွဲ နှင့် စိုက်စနစ်မှန်ကန်ရေးအတွက် Drum seeder၊ လက်ဆွဲကောက်စိုက်စက် နှင့် ကောက်စိုက်စက်ဖြင့် စိုက်ပျိုးခြင်း ကွင်းသရုပ်ပြပွဲ အခမ်းအနားကို ဇူလိုင်လ ၄ ရက်နေ့၊ နံနက်ပိုင်းက မုဒုံမြို့နယ်၊ ဝက်တဲကျေးရွာ၊ စံပြစိုက်ခင်း ယာယီရှင်းလင်းဆောင်၌ ကျင်းပြုလုပ်ရာ မွန်ပြည်နယ် ဝန်ကြီးချုပ် ဦးအောင်ကြည်သိန်း၊ ပြည်နယ်ဝန်ကြီးများ၊ တာဝန်ရှိသူများ၊ ဒေသခံတောင်သူများ တက်ရောက်သည်။
အခမ်းအနားတွင် ပြည်နယ်ဝန်ကြီးချုပ်က မွန်ပြည်နယ်အတွင်း စိုက်ပျိုးရေးကဏ္ဍ ဖွံ့ဖြိုးတိုးတက် စေဖို့အတွက် သီးနှံအထွက်နှုန်း တိုးတက်ရေး သာမက အရည်အသွေး ကောင်းမွန်တဲ့ ထုတ်ကုန်များ ထုတ်လုပ်ပြီး တောင်သူများ ဝင်ငွေတိုးစေဖို့ အဖက်ဖက်က ဖြည့်ဆည်းဆောင်ရွက်ပေးလျက် ရှိပါကြောင်း၊ ကြဲခင်းစနစ်ဖြင့် စိုက်ပျိုးခြင်းကြောင့် မျိုးစေ့နှုန်းထားကုန်ကျမှုများခြင်း၊ ပေါင်းမြက်နှိမ်နင်းမှုခက်ခဲခြင်း၊ ပိုးမွှား ရောဂါကျရောက်ရန် လွယ်ကူသည့်အတွက်ကြောင့် အထွက်နှုန်းကို များစွာ ထိခိုက်နိုင်စေနိုင်တဲ့အတွက် စက်ကိရိယာများပိုမို အသုံးပြု စိုက်ပျိုးနိုင်ရန် တွန်းအားပေးဆောင်ရွက်သွားကြရမှာဖြစ်ကြောင်း၊ စပါးသီးနှံ စိုက်ပျိုးထုတ်လုပ်ရေးနှင့် ပတ်သက်၍ စပါးအထွက်နှုန်း ရနိုင်သမျှ တိုးတက် ထွက်ရှိရေး၊ မြို့နယ် အလိုက် ဆန်၊ စပါးဖူလုံမှု ရရှိရေးအတွက် ရေတိုရေရှည် စီမံကိန်းများ ချမှတ်၍လည်း ကြိုးပမ်းကြရန် လိုအပ်ကြောင်း၊ စားနပ်ရိက္ခာ ဖူလုံဖို့ အတွက် စိုက်ပျိုး ထုတ်လုပ်မှု တိုးတက်မြင့်မားအောင် ဆောင်ရွက်တဲ့ နေရာမှာ တောင်သူများမှလည်း အင်တိုက်အားတိုက် ကြိုးစားဆောင်ရွက်ခြင်းဖြင့် နိုင်ငံတော်အတွက်အကျိုးပြုသလို  တောင်သူတွေရဲ့ လူမှုစီးပွားဘဝများလည်း မြင့်မားလာမှာဖြစ်ကြောင်းဖြင့် အမှာစကားပြောကြားခဲ့သည်။
ဆက်လက်ပြီး စိုက်ပျိုးရေးဦးစီးဌာန၊ မုဒုံမြို့နယ်ဦးစီးမှူးမှ မုဒုံမြို့နယ်အတွင်း စပါးစိုက်ပျိုးရေးလုပ်ငန်းများ၊ မိုးစပါးစိုက်ပျိုးဆောင်ရွက်နေမှု အခြေအနေများနှင့် ပတ်သက်၍ ရှင်းလင်းတင်ပြခဲ့ပြီး ပြည်နယ်ဝန်ကြီးချုပ်က မျိုးစေ့ချကိရိယာ Drum seeder များ အကျိုးဆောင် တောင်သူများအား ထောက်ပံ့ပေးအပ်ခဲ့ကာ အကျိုးဆောင် တောင်သူများကိုယ်စား ဒေသခံတောင်သူတစ်ဦးမှ ကျေးဇူးတင်စကား ပြန်လည်ပြောကြားခဲ့သည်။
အဲဒီနောက် ပြည်နယ်ဝန်ကြီးချုပ်က မုဒုံမြို့နယ်၊ ဝက်တဲကျေးရွာ၊ တောင်သူ ဦးကျော်မြင့်စိုး၏ စပါးစိုက်ခင်းအတွင်း စိုက်စနစ်မှန်ကန်ရေးအတွက် မျိုးစေ့ချကိရိယာ Drum seeder၊ လက်ဆွဲကောက်စိုက်စက် နှင့် ကောက်စိုက်စက်ဖြင့် စိုက်ပျိုးခြင်း ကွင်းသရုပ်ပြသခဲ့ကြမှုအပေါ် ကြည့်ရှုအားပေးခဲ့ပြီး ဒေသခံတောင်သူများအား ရင်းရင်းနှီးနှီးတွေ့ဆုံခဲ့ကာ မျိုးစေ့ချကိရိယာ Drum seeder များအား တောင်သူများထံ ဖြန့်ဝေပေးနိုင်ရေး တာဝန်ရှိသူများနှင့်တွေ့ဆုံ၍ လိုအပ်သည်များကို ပေါင်းစပ်ညှိနှိုင်း ‌ဆောင်ရွက်ပေးခဲ့သည်။
မွန်ပြည်နယ်အစိုးရအဖွဲ့၏ အစီအစဉ်ဖြင့် ပြည်နယ် တစ်ခုလုံးအတွက် တိုက်ရိုက်မျိုးစေ့ချကိရိယာ Drum seeder (၅၈၀) လက်မှ မုဒုံမြို့နယ် အတွက် (၆၀) လက်ကို တောင်သူများအား ထောက်ပံ့ပေးအပ်သွားမည် ဖြစ်ကြောင်း သိရှိရသည်။
မွန်ပြည်နယ် လယ်ယာမြေနှင့်အခြားမြေများသိမ်းဆည်းခြင်းခံရမှုများ ပြန်လည်စိစစ်ရေး ကော်မတီ အစည်းအဝေးအမှတ်စဉ် (၁/၂၀၂၄) ကို ယနေ့မွန်းလွဲပိုင်းက ပြည်နယ်အစိုးရအဖွဲ့ရုံး၊ အောင်ဆန်းခန်းမ၌ ကျင်းပပြုလုပ်ရာ မွန်ပြည်နယ် လယ်ယာမြေနှင့်အခြားမြေများ သိမ်းဆည်းခြင်းခံရမှုများ ပြန်လည်စိစစ်ရေးကော်မတီ၊ ဥက္ကဋ္ဌ၊ ပြည်နယ်ဝန်ကြီးချုပ်က မွန်ပြည်နယ်တွင် ဒေသခံပြည်သူများ၏ အမှန်တစ်ကယ်လုပ်ကိုင်ဆောင်ရွက်ခဲ့သည့် လယ်ယာမြေနှင့် အခြားမြေများသိမ်းဆည်းခြင်းခံရမှုများအတွက် နစ်နာဆုံးရှုံးမှုမရှိစေရေး ဥပဒေ၊ လုပ်ထုံးလုပ်နည်းများအညီ အထူးအလေးထား ဆောင်ရွက်ပေးလျက်ရှိပါကြောင်း၊ လယ်ယာမြေများပေါ်တွင် စပါး၊ သီးနှံများ စိုက်ပျိုးထားရှိခြင်း ရှိ၊ မရှိ စိစစ်ကြပ်မတ်ဆောင်ရွက်သွားကြရန်နှင့် မြေယာအလွဲသုံးစားမှုများ၊ အခြားနည်းအသုံးပြုထားခြင်းများကိုလည်း မြေပြင်ကွင်းဆင်း စိစစ်ဆောင်ရွက်ကြရန်လိုအပ်ကြောင်း၊ ခရိုင်၊ မြို့နယ်၊ ရပ်ကွက်၊ ကျေးရွာအုပ်စု လယ်ယာမြေနှင့်အခြားမြေများ သိမ်းဆည်းခံရမှုများ ပြန်လည်စိစစ်ရေးကော်မတီအဖွဲ့ များကိုလည်း အဆင့်ဆင့်ဖွဲ့စည်းတာဝန်ပေးအပ်ထားပြီးဖြစ်၍ ကော်မတီများအနေဖြင့် တင်ပြလာသည့် မြေယာကိစ္စရပ်များနှင့် ပတ်သက်၍ မြေသိမ်းဆည်းမှုစတင်ဖြစ်ပွားခဲ့သည့် ဖြစ်စဉ်ကို သေချာစွာ စိစစ်ရန်၊ သိမ်းဆည်းမြေများပြန်လည်စိစစ်ခြင်း လုပ်ငန်းများ ဆောင်ရွက်ရာတွင် အမှန်တကယ် နစ်နာမှုရှိသူများ နစ်နာမှုမရှိစေရေး မူဝါဒလုပ်ငန်းစဉ်များအတိုင်း ဝိုင်းဝန်းဆောင်ရွက်‌ပေးကြရန်ဖြင့် အမှာစကားပြောကြားခဲ့သည်။
ဆက်လက်ပြီး ပြည်နယ် မြေစာရင်းဦးစီးဌာန၊ ညွှန်ကြားရေးမှူး ဦးမင်းသိန်းမှ မွန်ပြည်နယ် လယ်ယာမြေနှင့်အခြားမြေများ သိမ်းဆည်းခြင်းခံရမှုများ ပြန်လည်စိစစ်ရေးကော်မတီသို့ တင်ပြလာသည့် လယ်ယာမြေဆိုင်ရာ ကိစ္စရပ်များအား ရှင်းလင်းတင်ပြခဲ့သည်။
အဲဒီနောက် ကော်မတီဝင်များမှ ပြည်နယ်အတွင်း လယ်ယာမြေနှင့်အခြားမြေများ သိမ်းဆည်းခြင်းခံရမှုများ ပြန်လည်စိစစ်ရေး ဆောင်ရွက်ထားရှိမှု အခြေအနေများနှင့် ပတ်သက်၍ သက်ဆိုင်ရာ ကဏ္ဍအလိုက် အသီးသီးရှင်းလင်းတင်ပြခဲ့ကြပြီး အစည်းအဝေးသို့ တက်ရောက်လာသူများမှ ဖြည့်စွက်ဆွေးနွေးတင်ပြခဲ့ကြမှုအပေါ် ပြည်နယ်ဝန်ကြီးချုပ်က လိုအပ်သည်များကို ပေါင်းစပ်ညှိနှိုင်းဆောင်ရွက်ပေးခဲ့ကာ နိဂုံးချုပ်အမှာစကား ပြောကြားခဲ့ကြောင်း သိရှိရသည်။