၂၀၂၃ ခုနှစ်၊ ဩဂုတ်လ(၉)ရက်နေ့ (၀၆၀၀) ချိန်တွင် မွန်ပြည်နယ်၊ ကျိုက်ထိုခရိုင်၊ ဘီးလင်းမြို့နယ်တွင် မိုးသည်းထန်စွာရွာသွန်းမှုကြောင့် ဘီးလင်း မြစ်ရေသည် (၁၀၉၅) စင်တီမီတာသို့ ရောက်ရှိနေပြီး ဘီးလင်းမြစ်၏ စိုးရိမ်ရေအမှတ်၊ (၁၀၂၂) စင်တီမီတာဖြစ်သည့်အတွက် စိုးရိမ်ရေအမှတ်ထက် (၇၃) စင်တီမီတာကျော်လွန်ကာ ရန်ကုန်-မော်လမြိုင် ပြည်ထောင်စုကားလမ်းမကြီးပေါ်သို့ ရေလျှံတက်မှု ဖြစ်ပွားသဖြင့် ဘီးလင်းမြို့၊ ဘိုးလှကြီး ရပ်ကွက်၊ သကြားစက်ရုံနှင့် အရပ်ချက်စက်ရုံအကြား ရန်ကုန်- မော်လမြိုင်ကားလမ်း မိုင်တိုင်(၁၂၆/၄) နှင့် (၁၂၆/၅)အကြား လမ်းမပေါ်တွင် ရေအလျားပေ (၈၅၀) ၊ ရေအမြင့်(၂)ပေ၊ (၆)လက်မခန့်၊ ဒေါင့်ရပ်ကျေးရွာ၊ ရန်ကုန်-မော်လမြိုင် ကားလမ်းမိုင်တိုင် (၁၂၇/၇)နှင့် (၁၂၈/၀)အကြား ကားလမ်းမပေါ်သို့ ရေအလျား ပေ(၄၀၀)၊ ရေအမြင့် (၁၈) လက်မနှင့် ရန်ကုန်-မော်လမြိုင်ကားလမ်း မိုင်တိုင်အမှတ် (၁၂၉/၂)ရှိ မစောတံတား အနီးတွင် ရေအလျား ပေ(၁၀၀)၊ ရေအမြင့်(၃)ပေခန့်တို့မှာ ရေလွှမ်းမိုးမှုဖြစ်ပွားနေပါ၍ သထုံခရိုင်၊ သထုံမြို့နယ်၊ ဒုံဝန်းကျေးရွာအုပ်စု၊ ကမာစိုင်ကျေးရွာ (ဘီးလင်း-သထုံနယ်စပ်) ရန်ကုန်-မော်လမြိုင်ကားလမ်း မိုင်တိုင်အမှတ်၊ (၁၃၁/၆) နှင့် (၁၃၂/၇) အကြား ကျုံအိတ်တံတားထိပ်မှ သထုံမြို့နယ်၊ ဒုံဝန်းကျေးရွာထိ မော်တော်ယာဉ်ကြီး/ငယ် (၂၅၀)စီးခန့်တို့အား (၀၆၀၀) အချိန်ခန့်မှစ၍ ဖြတ်သန်းသွားလာခွင့် မပြုဘဲ ယာယီပိတ်ပင်ထားခဲ့ရာမှ ၂၀၂၃ ခုနှစ်၊ ဩဂုတ်လ (၁၀)ရက် (၀၅၃၀) အချိန်တွင် ရန်ကုန်-မော်လမြိုင် ကားလမ်းမပေါ်သို့ ရေလျှံနေမှုမှာ ပြန်လည်ကျဆင်းသွားသည့်အတွက် မော်တော်ယာဉ်များ ပုံမှန်အတိုင်း ဖြတ်သန်းသွားလာနေပြီးဖြစ်ပါကြောင်း သိရှိရပါသည်။
