မော်လမြိုင်၊ နိုဝင်ဘာ ၃
မွန်ပြည်နယ်၊ ၂၀၂၃ – ၂၀၂၄ ခုနှစ်၊ လျာထားသီးနှံများ၏ စိုက်ဧက ပြည့်မီရေး၊ ပန်းတိုင်အထွက်နှုန်းရရှိရေး လုပ်ငန်းညှိနှိုင်းအစည်းအဝေးကို နိုဝင်ဘာလ ၃ ရက်နေ့၊ မွန်းလွဲပိုင်းက ပြည်နယ်အစိုးရအဖွဲ့ရုံး၊ အောင်ဆန်းခန်းမ၌ ကျင်းပပြုလုပ်ရာ မွန်ပြည်နယ် ဝန်ကြီးချုပ် ဦးအောင်ကြည်သိန်း၊ ပြည်နယ်ဝန်ကြီးများ၊ တာဝန်ရှိသူများတက်ရောက်သည်။
အစည်းအဝေးတွင် ပြည်နယ်ဝန်ကြီးချုပ်က မွန်ပြည်နယ်အနေဖြင့် ဒေသတွင်း စာနပ်ရိက္ခာဖူလုံမှုရှိစေရန်အတွက် ဆန်စပါးစိုက်ပျိုးခြင်းအပြင် ဆီထွက်သီးနှံများ တိုးချဲ့စိုက်ပျိုးနိုင်ရေးနှင့် တောင်သူများ ရေ၊ မြေ၊ ဒေသနှင့်ကိုက်ညီပြီး သီးနှံအထွက်နှုန်း ကောင်းမွန်သည့် မျိုးကောင်း မျိုးသန့်များနှင့် မြေဩဇာများရရှိနိုင်ရေးတို့ကို ဦးစားပေးကဏ္ဍအနေဖြင့် အထူးအလေးထား ဆောင်ရွက်လျက်ရှိပါကြောင်း၊ နိုင်ငံတော်မှ နိုင်ငံ့စီးပွားဖွံ့ဖြိုးတိုးတက်ရေးအတွက် စိုက်ပျိုးမွေးမြူရေးလုပ်ငန်းများကို အခြေခံ၍ ဆောင်ရွက်နေခြင်းဖြစ်ကြောင်း၊ ထို့ကြောင့် စိုက်ပျိုးရေးလုပ်ငန်းများ ပန်းတိုင်ရည်မှန်းချက်အတိုင်း ထွက်ရှိမှုရှိ/မရှိ၊ မွေးမြူရေးလုပ်ငန်းများ တိုးတက်အောင်မြင်မှု ရှိ/မရှိ ချိန်ထိုးသုံး သပ်ဆောင်ရွက်ကြည့်ရန်လိုကြောင်း၊ မိမိတို့အနေဖြင့် “ရှေ့သို့ချီမည် ပန်းတိုင်ဆီ” “Keep Moving Forward To Achieve Our Goal” ဆိုသည့်အတိုင်း နိုင်ငံစီးပွား တိုးတက်ရေးအတွက် ဆက်လက်ကြိုးပမ်း ဆောင်ရွက်သွားမည် ဖြစ်ကြောင်း၊ မိမိတို့ တာဝန်ယူဆောင်ရွက်နေသည့်လုပ်ငန်းများ အောင်မြင်စေရန်အတွက် မရရအောင် လုပ်မည်ဆိုသည့်စိတ်မွေး၍ ဆောင်ရွက်သွားမည်ဆိုပါက မျှော်မှန်းသည်ထက် ပိုမိုတိုးတက်အောင်မြင်နိုင် မည်ဖြစ်ကြောင်းဖြင့် လမ်းညွှန်မှာကြားထားပါကြောင်း၊ ပြည်နယ်အတွင်း စိုက်ပျိုးရေးလုပ်ငန်းများ အောင်မြင်စွာဆောင်ရွက်နိုင်ရေး အလေးထား ဆောင်ရွက်ကြရန်လိုအပ်သလို စိုက်ပျိုးရေးလုပ်ငန်းများမှ ထွက်ရှိလာသည့် ထွက်ကုန်များ ထုပ်လုပ်၍ ပြည်ပအစားထိုးသွင်းကုန်များကို မိမိနိုင်ငံအတွင်း၌ အရည်အသွေးမီ ထုတ်လုပ်ပြီး ထုတ်ကုန်အရည်အသွေး မြင့်မားလာခြင်းဖြင့် ဈေးကွက်ပိုမိုရရှိလာစေမှာ ဖြစ်ကြောင်း၊ တောင်သူများအတွက် ဘက်စုံနည်းပညာသုံး စံပြစိုက်ကွက်များ ဖော်ဆောင်၍ စိုက်ပျိုးသည့် နည်းစနစ်များ၊ သွင်းအားစုများကိုလည်း အဖက်ဖက်မှ ထောက်ပံ့ဆောင်ရွက်ပေးလျက်ရှိပြီး စိုက်ပျိုးရေးရရှိရေးအတွက် နည်းလမ်းပေါင်းစုံမှ ဆောင်ရွက်ပေးလျက်ရှိကြောင်း၊ တောင်သူများအား မျိုးမှန်၊ မြေမှန်၊ ရေမှန်၊ စိုက်နည်းမှန် နည်းစနစ်ကောင်းများနှင့် လယ်ယာသုံးစက်ကရိယာများ ကူညီဆောင်ရွက်ပေးကြရန်နှင့် တောင်သူများအနေ့ဖြင့်လည်း လျာထားသီးနှံများ၏ စိုက်ဧကများ ပြည့်မီရေး၊ ပန်းတိုင်အထွက်နှုန်းရရှိရေး စိုက်ပျိုးကြရန်နှင့် စပါး၊ ဆီထွက်သီးနှင့် အခြားနှစ်ရှည်သီးနှံများအား ယခုနှစ်ထက် နောင်နှစ်များတွင်လည်း ပိုမိုစိုက်ပျိုးသွားကြရန် လိုအပ်ကြောင်းဖြင့် အမှာစကားပြောကြားသည်။
ဆက်လက်ပြီး ပြည်နယ်လုံခြုံရေးနှင့် နယ်စပ်ရေးရာဝန်ကြီး၊ ပြည်နယ်စီးပွားရေးရာဝန်ကြီး၊ အစိုးရအဖွဲ့အတွင်းရေးမှူးတို့က မွန်ပြည်နယ်အတွင်း ၂၀၂၃ – ၂၀၂၄ ခုနှစ်၊ လျာထားသီးနှံများ၏ စိုက်ဧက ပြည့်မီရေး၊ ပန်းတိုင်အထွက်နှုန်းရရှိရေး ဆောင်ရွက်ရမည့် အစီအအစဉ်များနှင့်ပတ်သက်၍ ဆွေးနွေးတင််ပြခဲ့ကြပြခဲ့သည်။
ဆက်လက်ပြီး ပြည်နယ်စိုက်ပျိုးရေးဦးစီးဌာန၊ ပြည်နယ်လယ်ယာမြေစီမံခန့်ခွဲရေးနှင့် စာရင်းအင်းဦးစီးဌာန၊ ပြည်နယ်ဆည်မြောင်းနှင့် ရေအသုံးချမှုစီမံခန့်ခွဲရေးဦးစီးဌာန၊ ပြည်နယ်စက်မှုလယ်ယာဦးစီးဌာနတို့မှ တာဝန်ရှိသူများက ပြည်နယ်အတွင်း စိုက်ဧကများ ပြည့်မီစွာ စိုက်ပျိုးနိုင်ရေးနှင့် ပန်းတိုင်အထွက်နှုန်းရရှိရေး ဆောင်ရွက်ထားရှိမှု အခြေအနေများအား လည်းကောင်း၊ ရွှေဇီဝသဘာဝဇီဝမြေဩဇာစက်ရုံ၊ တာဝန်ခံမှ စိုက်ပျိုးရေးလုပ်ငန်းများအတွက် လိုအပ်သည့် မြေဩဇာများ ရရှိနိုင်ရေးနှင့် မြေဩဇာများကို စနစ်တကျအသုံးပြုနိုင်ရေး ဆောင်ရွက်ထားရှိမှု အခြေအနေများအား လည်းကောင်း အသီးသီးရှင်းလင်းတင်ပြခဲ့ကြပြီး တက်ရောက်လာသူများမှ အထွေထွေဆွေးနွေးတင်ပြ၍ ပြည်နယ်ဝန်ကြီးများက ဖြည့်စွက်အကြံပြု ဆွေးနွေးတင်ပြခဲ့ကြမှုအပေါ် ပြည်နယ်ဝန်ကြီးချုပ်က လိုအပ်သည်များကို ပေါင်းစပ်ညှိနှိုင်းဆောင်ရွက်ပေးခဲ့ကာ နိဂုံးချုပ်အမှာစကားပြောကြားခဲ့ကြောင်း သိရှိရသည်။
