မော်လမြိုင်၊ နိုဝင်ဘာ ၅
မွန်ပြည်နယ်၊ မော်လမြိုင်မြို့၊ နာဂဝီသတောင်ရိုးတန်းတွင် တင့်တယ်သပ္ပါယ်စွာပွင့်ထွန်း တည်ထားကိုးကွယ်တော်မူခဲ့သော မဟာမြတ်မုနိ ရုပ်ရှင်တော်မြတ်ဘုရားကြီး၏ ဦးသျှောင်မကိုဋ်တော်အား ရွှေစင်၊ ရွှေသား၊ ရွှေပန်းခက် ထုဆစ်ခြင်း(ဗုဒ္ဓပူဇာ) မင်္ဂလာနှင့် ဗုဒ္ဓဘိသေက အနေကဇာတင် အလှူတော်မင်္ဂလာ ရေစက်ချ အခမ်းအနားကို နိုဝင်ဘာလ ၅ ရက်နေ့နံနက်ပိုင်းက ကျင်းပပြုလုပ်ရာ ရှေးဦးစွာမွန်ပြည်နယ်ဝန်ကြီးချုပ် ဦးအောင်ကြည်သိန်းနှင့် ဇနီး၊ ပြည်နယ်တရားလွှတ်တော် တရားသူကြီးချုပ် ဦးညီညီစိုး၊ ပြည်နယ်ဝန်ကြီးများက မဟာမြတ်မုနိ ရုပ်ရှင်တော်မြတ်ဘုရားကြီးဖူးမြော်ကြည်ညိုခဲ့ကြသည်။
ဆက်လက်ပြီး ဩဝါဒ ဆရာတော်ကြီးများမှ ဦးစီးအမှူးပြု၍ မဟာမြတ်မုနိဘုရားကြီး၏ ဦးသျှောင်မကိုဋ်တော်အား ဗုဒ္ဓဘိသေက အနေကဇာတင်လှူပူဇော်ခဲ့သည်။
အဲဒီနောက် မဟာမြတ်မုနိဘုရားကြီး ဦးသျှောင်မကိုဋ်တော်အား ရွှေစင်၊ ရွှေသား၊ ရွှေပန်းခက် ထုဆစ်ခြင်း(ဗုဒ္ဓပူဇာ) မင်္ဂလာနှင့် ဗုဒ္ဓဘိသေက အနေကဇာတင် အလှူတော်မင်္ဂလာ ရေစက်ချ အခမ်းအနား မဟာမြတ်မုနိဘုရားကြီးဝင်းအတွင်းရှိ သုခချမ်းသာ ကျောင်းဆောင်တော်ကြီး၌ ကျင်းပပြုလုပ်ရာ အခမ်းအနားကို နမောတဿ သုံးကြိမ်ရွတ်ဆို ဘုရားကန်တော့ဖွင့်လှစ်၍ မော်လမြိုင်မြို့၊ ဝဲပျံကျောင်းတိုက်ကြီး၏ ဦးစီပဓာန နာယကဆရာတော် သာသနဓဇဓမ္မာစရိယ၊ မဟာဂန္တဝါစက ပဏ္ဍိတ ဘဒ္ဒန္တ နန္ဒဝံသ ဆရာတော်ကြီးထံ ငါးပါးသီလခံယူ ဆောက်တည်ခဲ့ကြပြီး ဆရာတော်၊ သံဃာတော် ဆရာတော်အရှင်သူမြတ်ထံမှ မေတ္တာသုတ် အစရှိသော ပရိတ်တော်များ နာယူကြည်ညိုခဲ့ကြသည်။
အဲဒီနောက် ပြည်နယ်ဝန်ကြီးချုပ်၊ ပြည်နယ်တရားလွှတ်တော် တရားကြီးချုပ်နှင့် ပြည်နယ်ဝန်ကြီးများက ဆရာတော်အရှင်သူများထံ လှူဖွယ်ဝတ္ထုများ ဆက်ကပ်လှူဒါန်းခဲ့ကြပြီး လှူဒါန်းမှု အစုစုအတွက် အနုမောဒနာ တရားနာယူ ကြည်ညို၍ ရေစက်သွန်းချ အမျှ ပေးဝေခဲ့ကြကာ ဆရာတော်အရှင်သူမြတ်များအား နေ့ဆွမ်း ဆက်ကပ်လှူဒါန်းခဲ့ကြသည်။
၂၀၂၃ ခုနှစ်၊ နို၀င်ဘာလ(၇)ရက်နေ့ တွင် ကျရောက်မည့် ပြည်ထဲရေး၀န်ကြီးဌာန၊ အထွေထွေအုပ်ချုပ်ရေးဦးစီးဌာန၏ (၃၅) နှစ်မြောက် နှစ်ပတ် လည်နေ့ အထိမ်းအမှတ် မွန်ပြည်နယ် အထွေထွေအုပ်ချုပ်ရေးဦးစီးဌာန သံဃာတော်များအား နေ့ဆွမ်းဆက်ကပ်လှူဒါန်းခြင်း အခမ်းအနားကို ယနေ့နံနက်ပိုင်းက၊ မော်လမြိုင်မြို့၊ ရွှေတောင်ကျောင်းတိုက်ကြီး၊ ဓမ္မာရုံတော်၌ ကျင်းပပြုလုပ်ရာ ရှေးဦးစွာ နမောတဿ သုံးကြိမ်ရွတ်ဆို ဘုရားကန်တော့၍ ပြည်နယ်ဝန်ကြီးချုပ်က ရွှေတောင်ကျောင်းတိုက်ကြီး၏ ဦးစီး ပဓါနနာယက ဆရာတော် ဘဝိမလ (အဂ္ဂမဟာ သဒ္ဓမ္မ ဇောတိက ဓဇ၊ ဂန္ထဝါစကပဏ္ဍိတ၊ ဓမ္မကထိက ဗဟုဇနဟိတဓရ)ထံ လှူဖွယ်ဝတ္ထုများ ဆက်ကပ်လှူဒါန်းခဲ့ပြီး မွန်ပြည်နယ် အထွေထွေအုပ်ချုပ်ရေးဦးစီးဌာန၊ ပြည်နယ်အုပ်ချုပ်ရေးမှူးနှင့် ဝန်ထမ်းများက ဆရာတော်အရှင်သူမြတ်များအား နေ့ဆွမ်း ဆက်ကပ်လှူဒါန်းခဲ့ကြကြောင်း သိရှိရသည်။
