မော်လမြိုင်၊ အောက်တိုဘာ ၅
၂၀၂၂ ခုနှစ်၊ အောက်တိုဘာလ ၅ ရက်နေ့တွင် ကျရောက်သည့် ကမ္ဘာ့ဆရာများနေ့ကို ကြိုဆိုဂုဏ်ပြုသောအားဖြင့် မော်လမြိုင် ပညာရေးဒီကရီကောလိပ်တွင် တက်ရောက်နေကြသည့် သင်တန်းသား၊ သင်တန်းသူ ဆရာ၊ ဆရာမများ နေထိုင်စားသောက်မှုအဆင်ပြေစေရေးနှင့် စိတ်အေးချမ်းသာစွာ သင်တန်း တက်ရောက်နိုင်ရေးအတွက် ပြည်နယ်ဝန်ကြီးချုပ် ဦးဇော်လင်းထွန်း၊ ပြည်နယ်ဝန်ကြီးများသည် အောက်တိုဘာလ ၅ ရက်နေ့၊ နေ့လယ်ပိုင်းက မော်လမြိုင် ပညာရေးဒီကရီကောလိပ်၌ လုပ်ငန်းခွင် အကြိုမူလတန်းဆရာအတတ်ပညာသင်တန်း (၈/၂၀၂၂) သင်တန်းနှင့် လုပ်ငန်းခွင် အကြိုမူလတန်းဆရာအတတ်သင် ဒီပလိုမာသင်တန်းသို့ တက်ရောက်နေကြသည့် သင်တန်းသား၊ သင်တန်းသူ (၄၀၄) ဦးအတွက် ကြက်ဥ အလုံး (၂၀၀၀) ၊ ငါးခြောက် ပိသာ (၁၀၀)၊ အဟာရဖြည့်စွက်စာများနှင့် စားကုန်ပစ္စည်းများ ထောက်ပံ့ပေးအပ်သည်။
ထိုသို့ ထောက်ပံ့ပေးအပ်ရာတွင် ပြည်နယ်ဝန်ကြီးချုပ်က မျိုးဆက်သစ်များရဲ့ ပညာရည် အရည်အသွေးတိုးတက် မြင့်မားလာစေရေးအတွက် ကြိုးပမ်းဆောင်ရွက်ရာတွင် ပညာရေးကဏ္ဍဟာ များစွာအရေးပါလျက်ရှိကြောင်း၊ သင်တန်းတက်ရောက်နေသူများ အနေဖြင့် ကိုဗစ်-၁၉ ရောဂါ ကူးစက်ပြန့်ပွားမှု ထိန်းချုပ်နိုင်ရေးအတွက် ထုတ်ပြန်ထားသည့် စည်းကမ်းချက်များအညီ နေထိုင်ကြရန်လိုအပ်သလို ကျန်မာရေးကိုလည်း အထူးဂရုစိုက်ကြရန်လိုပါကြောင်း၊ သင်တန်းတက်ရောက်စဉ် ကာလအတွင်း ဆရာအတတ်ပညာများကို လေ့လာဆည်းပူးပြီး အနာဂတ် လူငယ်၊ လူရွယ်များကို ပညာတတ်မြောက်စေရေး ကြိုးစားဆောင်ရွက်ပေးကြရန်နှင့် လိုအပ်သည်များကိုလည်း ဖြည်းဆည်းထောက်ပံ့ ပေးသွားမည်ဖြစ်ကြောင်း လမ်းညွှန်မှာကြားသည်။
ထို့နောက် ပြည်နယ်ဝန်ကြီးချုပ်နှင့် ဝန်ကြီးများမှ သင်တန်းသူ၊ သင်တန်းသားများအတွက် စားကုန်ပစ္စည်းများ ထောက်ပံ့ပေးအပ်ခဲ့ကြပြီး မော်လမြိုင်ပညာရေးဒီကရီကောလိပ် ကျောင်းအုပ်ဆရာမကြီး ဒေါ်ဝင်းသိင်္ဂီကျော်မှ ကျေးဇူးတင်စကားပြန်လည်ပြောကြားသည်။
