မော်လမြိုင်၊ အောက်တိုဘာ ၂၅
မွန်ပြည်နယ်အတွင်းရှိ မြို့နယ်အသီးသီးမှ ကြက်ခြေနီစေတနာ့လုပ်အားရှင်များအတွက် စွမ်းဆောင်ရည်မြှင့်တင်ခြင်း အစီအစဉ်ဖြစ်သည့် Emergency Medical Responder – Ambulance Training ဖွင့်ပွဲအခမ်းအနားကို ၂၀၂၂ ခုနှစ်၊ အောက်တိုဘာလ ၂၅ ရက်နေ့၊ နံနက်ပိုင်းက မော်လမြိုင်မြို့၊ ပြည်နယ်ကြက်ခြေနီကြီးကြပ်မှုကော်မတီရုံး၌ ကျင်းပပြုလုပ်ရာ မွန်ပြည်နယ် ဝန်ကြီးချုပ် ဦးဇော်လင်းထွန်း၊ ပြည်နယ်ဝန်ကြီးများ၊ ကြက်ခြေနီအသင်းမှ သင်တန်းသူ၊ သင်တန်းသားများ တက်ရောက်သည်။
အခမ်းအနားတွင် ပြည်နယ်ဝန်ကြီးချုပ်က မွန်ပြည်နယ်တွင် လူသားချင်းစာနာထောက်ထားမှုဆိုင်ရာ လူမှုကရုဏာ လုပ်ငန်းတွေကို ဆောင်ရွက်ပေးလျက်ရှိပြီး ထိုသို့ဆောင်ရွက်ကြတဲ့နေရာမှာ ရှေးဦးပြုစုခြင်းနှင့်အရေးပေါ်လူနာတင် ယာဉ်လုပ်ငန်း ဆောင်ရွက်ခြင်းသည်လည်း များစွာ အရေးပါကြောင်း၊ ရှေးဦးပြုစုခြင်းဆိုင်ရာလုပ်ငန်းများကို လူတိုင်းတတ်ထားအပ်သော ပညာရပ်များအဖြစ် ခံယူပြီး တတ်မြောက်ထားသည့် ပညာရပ်များနှင့်အတူ လူထုအကျိုးပြုလုပ်ငန်းများ ဆောင်ရွက်ကြရန် လိုအပ်ကြောင်း၊ ကြက်ခြေနီ မောင်၊ မယ်များအနေဖြင့် သင်တန်းမှ ပို့ချသည့် ဘာသာရပ်တွေကို လေ့လာမှတ်သားပြီး ပြန်လည်အသုံးချခြင်းဖြင့် ပြည်သူများ၏ ကျန်းမာရေးစောင့်ရှောက်မှုတွေကို အကောင်းဆုံးဆောင်ရွက်ပေးနိုင်မှာ ဖြစ်ကြောင်း၊ လူမှုကရုဏာလုပ်ငန်းများကို ကျရာနေရာမှ စွမ်းစွမ်းတမံဆောင်ရွက်ပေးကြရန်နှင့် အကူလိုအပ်သော ပြည်သူလူထုတိုင်းအတွက် ကြက်ခြေနီ အခန်းကဏ္ဍကနေ အားလုံးဝိုင်းဝန်းပူးပေါင်း ဆောင်ရွက်ပေးကြရန် ပြောကြားသည်။
ထို့နောက် မြန်မာနိုင်ငံကြက်ခြေနီအသင်း၊ ဒုတိယဥက္ကဋ္ဌ ဒေါက်တာအမရာမော်နိုင်မှ ကျေးဇူးတင်စကားပြန်လည်ပြောကြားကာ ကြက်ခြေနီအသင်း၏ လုပ်ငန်းဆောင်ရွက်မှု ပြခန်းများအား လှည့်လည်ကြည့်ရှုအားပေးသည်။
မွန်ပြည်နယ်အတွင်း မှီတင်းနေထိုင်ကြသည့် တိုင်းရင်းသားလူငယ်များကို အလုပ်အကိုင်အခွင့်အလမ်း ရရှိရန်နှင့် အသက်မွေးဝမ်းကျောင်း ကိုယ်ပိုင်စီးပွားရေးလုပ်ငန်းများ ဖန်တီးနိုင်ရန် ရည်ရွယ်၍ အဆင့်မြင့်အိမ်တွင်းမှုစက်ချုပ်သင်တန်း အမှတ်စဉ်(၅)နှင့် မွန်ရိုးရာ လက်ယက်ကန်း သင်တန်းအမှတ်စဉ်(၂၁)သင်တန်းဖွင့်ပွဲ အခမ်းအနားကို ယနေ့နံနက်ပိုင်းက မုဒုံမြို့နယ်၊ ကွမ်တာကျေးရွာရှိ အမျိုးသမီး အိမ်တွင်းမှုသက်မွေးလုပ်ငန်းပညာသင်ကျောင်း၌ ကျင်းပပြုလုပ်ရာ ပြည်နယ်ဝန်ကြီးချုပ်က မွန်ပြည်နယ်အတွင်း သက်ဆိုင်ရာ နယ်ပယ်အလိုက် နည်းပညာ ကျွမ်းကျင်သည့် လူသားအရင်းအမြစ်ကောင်းများ ပေါများစွာထွက်ပေါ်လာစေရေးအတွက် အထူးအလေးပေး ဆောင်ရွက်လျက်ရှိကြောင်း၊ ပြည်နယ်အတွင်း သထုံမြို့နယ်၊ မုဒုံမြို့နယ်နှင့် ရေးမြို့နယ်တို့တွင် လူငယ်သင်တန်းကျောင်းများ၊ အမျိုးသမီးအိမ်တွင်းမှု သက်မွေးပညာသင်တန်းကျောင်းများကို ဖွင့်လှစ်ပြီး တိုင်းရင်းသူများအတွက် အိမ်တွင်းမှုသက်မွေးပညာရပ်များအတွက် တတ်မြောက်သည်အထိ လေ့ကျင့်သင်ကြားပေးခြင်း၊ ကိုယ်ပိုင်စီးပွားရေး လုပ်ငန်းများ ထူထောင်ပံ့ပိုးပေးခြင်း၊ အပ်ချုပ်စက်များကို အရစ်ကျစနစ်နဲ့ ရောင်းချပေးခြင်းအပြင် မြန်မာနိုင်ငံ အထည်ချုပ်လုပ်ငန်းရှင်များအသင်းနဲ့ညှိနှိုင်းပြီး အထည်ချုပ်စက်ရုံများတွင် အလုပ်အကိုင်ရရှိရေးအတွက် စီစဉ်ဆောင်ရွက်ပေးထားကြောင်း၊ သင်တန်းသူများအနေနဲ့ အသိပညာ၊ အတတ်ပညာများ ပြည့်ဝသူများဖြစ်အောင် အစဉ်ကြိုးစားကာ စူးစမ်းလေ့လာမှု၊ တီထွင်ဖန်တီးမှုမျာဖြင့် အိမ်တွင်းမှု ပညာရပ်များကိုအသုံးချပြီး တစ်ပိုင်တစ်နိုင် စီးပွားရေးလုပ်ငန်းများနှင့် ဒေသအကျိုးပြုလုပ်ငန်းများကို ဆောင်ရွက်ပေးကြရန် တိုက်တွန်းလိုကြောင်း ပြောကြားသည်။
အဲဒီနောက် သင်တန်းကျောင်းအုပ်ဆရာမကြီးမှ ကျောင်းဆိုင်ရာ အချက်အလက်များနှင့် သင်တန်းဖွင့်လှစ်သင်ကြားမှု အခြေအနေတို့အား ရှင်းလင်းတင်ပြခဲ့ပြီး ပြည်နယ်ဝန်ကြီးချုပ်က လိုအပ်သည်များကို ပေါင်းစပ်ညှိနှိုင်း ဆောင်ရွက်ပေးကာ သင်တန်းသူများအား ရင်းရင်းနှီးနှီး လိုက်လံနှုတ်ဆက်သည်။
