| မော်လမြိုင်၊ ဒီဇင်ဘာ ၂၃ (၇၅)နှစ်မြောက် စိန်ရတုလွတ်လပ်ရေးနေ့အထိမ်းအမှတ်အကြို မွန်ပြည်နယ် ဝန်ကြီးချုပ်ဖလား (၁၀)မြို့နယ်လှေလှော်ပြိုင်ပွဲဖွင့်ပွဲအခမ်းအနားကို ဒီဇင်ဘာလ ၂၃ ရက်နေ့၊ နံနက်ပိုင်းက မုဒုံမြို့၊ ကန်ကြီးမင်္ဂလာကန်တော်၌ ကျင်းပပြုလုပ်ရာ မွန်ပြည်နယ်ဝန်ကြီးချုပ် ဦးဇော်လင်းထွန်း၊ ပြည်နယ်ဝန်ကြီးများနှင့် တာဝန်ရှိသူများ တက်ရောက်သည်။ ဦးစွာ ပြည်နယ်ဝန်ကြီးချုပ်က မွန်ပြည်နယ်တွင် အားကစားအဆင့်အတန်း တိုးတက်မြင့်မားလာရေးဦးတည်၍ အသွင်သဏ္ဍာန် အမျိုးမျိုးဖြင့် ကဏ္ဍပေါင်းစုံ တွန်းအားပေး ပံ့ပိုးဆောင်ရွက်လျက်ရှိကြောင်း၊ လှေလှော်အားကစားနည်းကို အများပြည်သူများ ပိုမိုစိတ်ဝင်စားလာစေပြီး ရိုးရာအားကစားနည်းကို တန်ဖိုးထား မြတ်နိုးတတ်စေရန် ရည်ရွယ်၍ ကျင်းပပြုလုပ်ရခြင်းဖြစ်သလို တစ်ဖက်ကလည်း ထူးချွန်ပြီး အရည်အချင်းပြည့်ဝသည့် လှေလှော် အားကစားသမားများ မွေးထုတ်ပေးနိုင်ရန် ဆောင်ရွက်ပေးခြင်းဖြစ်ကြောင်း၊ ပြိုင်ပွဲဝင် အားကစားသမားများအနေဖြင့် လှေလှော်အားကစားနည်း၏ အနှစ်သာရကို ပေါ်လွင်ထင်ဟပ်စေရန်အတွက် မိမိတို့၏ စုပေါင်းစွမ်းအားတို့ဖြင့် တက်ညီလက်ညီ အစွမ်းကုန်ကြိုးစားယှဥ်ပြိုင်သွားကြစေလိုကြောင်းဖြင့် အမှာစကားပြောကြားသည်။ ထို့နောက် ပြည်နယ်ဝန်ကြီးချုပ်နှင့် တာဝန်ရှိသူများက လှေလှော်ပြိုင်ပွဲဖွင့်ပွဲအခမ်းအနားအား ဖဲကြိုးဖြတ်၍ ဖွင့်လှစ်ပေးခဲ့ပြီး ပြိုင်ပွဲဝင် လှေလှော်အသင်းများ၏ ယှဉ်ပြိုင်မှုများကို ကြည့်ရှုအားပေး ခဲ့သည်။ (၂၀၂၂-၂၀၂၃)ပညာသင်နှစ် အခြေခံပညာဦးစီးဌာန၊ မွန်ပြည်နယ် အခြေခံပညာအထက်တန်းဆင့် Grade-10, Grade-11 ဘာသာရပ်မွမ်းမံအလုပ်ရုံဆွေးနွေးပွဲဖွင့်ပွဲ အခမ်းအနားကို ယနေ့မွန်းလွဲပိုင်းက မော်လမြိုင်မြို့၊ အမှတ် (၉) အခြေခံပညာအထက်တန်းကျောင်း၊ ကျောင်းခန်းမဆောင်၌ ကျင်းပပြုလုက်ရာ ပြည်နယ်ဝန်ကြီးချုပ်က မွန်ပြည်နယ်အတွင်း ဘက်စုံလွှမ်းခြုံနိုင်သော ပညာရေးစနစ်ကို အကောင်အထည်ဖော်ဆောင်ရွက်ရာတွင် အရည်အသွေးပြည့်ဝသော ပညာရေးကို လက်တွေ့အကျဆုံးနှင့် အဓိကဖော်ဆောင်ရမဲ့သူများသည် သင်ကြားရေးစွမ်းရည်ပြည့်ဝတဲ့ ဆရာ၊ ဆရာမများပင်ဖြစ်ကြောင်း၊ ဆရာများ၏ အရည်အသွေးသည် ကျောင်းသားများ၏ သင်ယူတတ်မြောက်မှုအရည်အသွေးအပေါ် များစွာ တည်မှီမှုရှိကြောင်း၊ ဘာသာရပ်ဆိုင်ရာ အလုပ်ရုံဆွေးနွေးပွဲမှ အခြေခံ၍ သင်ရိုးသစ် ဘာသာရပ်သင်ခန်းစာများ သင်ကြားရာတွင် မှန်ကန်စွာ လက်တွေ့အသုံးချတတ်စေရေးနှင့် သင်ခန်းစာချိတ်ဆက်သင်ကြားနိုင်ရေးအတွက် ထိရောက်သော ဆွေးနွေးမှုရလာဒ်ကောင်းများ ပေါ်ထွက်လာစေရေး အားလုံးဝိုင်းဝန်းပူးပေါင်း ဆောင်ရွက်ပေးကြစေလိုကြောင်းဖြင့် အမှာစကားပြောကြားခဲ့သည်။ ထို့နောက် မွန်ပြည်နယ်ပညာရေးမှူး၊ ဒေါက်တာချိုချိုမြတ်အောင်မှ အလုပ်ရုံဆွေးနွေးပွဲနှင့် စပ်လျဉ်းသည့် ကိစ္စရပ်များအား ရှင်းလင်းတင်ပြခဲ့ပြီး အလုပ်ရုံဆွေးနွေးပွဲအတွက် ထောက်ပံ့ပေးအပ်ငွေများ ပေးအပ်ထောက်ခဲ့သည်။ မွန်ပြည်နယ်အတွင်း သန့်ရှင်း၍ စိမ်းလန်းစိုပြည်သောကျောင်းဆု လျှောက်ထားလာသော အခြေခံကျောင်းများသို့ အထောက်အပံ့ပစ္စည်းများ ထောက်ပံ့ခြင်းအခမ်းအနားကို ယနေ့မွန်းလွဲပိုင်းက ပြည်နယ်အစိုးရအဖွဲ့ရုံး၊ အောင်ဆန်းခန်းမ ကျင်းပပြုလုပ်ရာ ပြည်နယ်ဝန်ကြီးချုပ်က မွန်ပြည်နယ်အနေဖြင့် မြို့နယ်အသီးသီးမှာရှိတဲ့ အခြေခံပညာကျောင်းများကို သန့်ရှင်း၍ စိမ်းလန်းစိုပြည်သောကျောင်းများ ပေါ်ထွန်းလာစေရေးအတွက် အထူးအလေးပေး ဆောင်ရွက်လျက်ရှိကြောင်း၊ အခြေခံပညာ ကျောင်းနေအရွယ် ကလေးလူငယ်များထံ ပတ်ဝန်းကျင် ထိန်းသိမ်းရေးဆိုင်ရာ ဆောင်ရွက်ချက်များကို အသိအမြင်များ မျှဝေသင်ကြားရန် လိုအပ်ပြီး ကလေးသူငယ်များ အနေဖြင့်လည်း ငယ်ရွယ်စဉ်မှစ၍ အမှိုက်များကို အမှိုက်စို/ အမှိုက်ခြောက် ခွဲခြား၍ စနစ်တကျ စွန့်ပစ်တတ်သော အပြုအမူကောင်းများ ရရှိသွားစေရန် ရည်ရွယ်၍ ထောက်ပံ့ပေးအပ်ခြင်းဖြစ်ကြောင်း၊ အခြေခံပညာကျောင်းများအနေဖြင့် သန့်ရှင်း၍ စိမ်းလန်းစိုပြည်သောကျောင်းများ ဖြစ်ပေါ်လာစေရေးအတွက် သတ်မှတ်ထားသော အခြေခံစံနှုန်းများ၊ အညွှန်းကိန်းများကို တိတိကျကျ လိုက်နာဆောင်ရွက်သွားရန်လိုအပ်သလို ရေရှည်ထိန်းသိမ်းပြီး စဉ်ဆက်မပြတ် ဆောင်ရွက် သွားကြဖို့လည်း လိုအပ်ကြောင်းဖြင့် အမှာစကား ပြောကြားခဲ့သည်။ ထို့နောက် ပြည်နယ်ဝန်ကြီးချုပ်နှင့် တာဝန်ရှိသူများက သန့်ရှင်း၍ စိမ်းလန်းစိုပြည်သောကျောင်းဆု လျှောက်ထားလာသော အခြေပညာ (၂၃) ကျောင်းအတွက် အခြေခံပတ်ဝန်းကျင်ဆိုင်ရာသာသာရပ် ဆရာများလက်စွဲ စာအုပ်များနှင့် အမှိုက်ပုံးများ အသီးသီးထောက်ပံ့ပေးအပ်ခဲ့သည်။ |
