မွန်ပြည်နယ်အတွင်း မြို့ပြသွင်ပြင်လက္ခဏာပေါ်လွင်စေရေးနှင့် မြို့သန့်ရှင်းသာယာလှပစေရေး အလေးထားဆောင်ရွက်လျက်ရှိရာ မွန်ပြည်နယ် ဝန်ကြီးချုပ် ဦးဇော်လင်းထွန်း၊ ပြည်နယ်ဝန်ကြီးများနှင့် တာဝန်ရှိသူများသည် ၂၀၂၂ ခုနှစ်၊ အောက်တိုဘာလ ၃၁ ရက်နေ့၊ နံနက်ပိုင်းက မော်လမြိုင်မြို့၊ ကမ်းနားလမ်းတစ်လျှောက် ပြည်သူ့အကျိုးပြု စုပေါင်းသန့်ရှင်းရေးဆောင်ရွက်မှုတို့ကို ကြည့်ရှုအားပေးသည်။
ခရိုင်အဆင့်ရှာဖွေကယ်ဆယ်ရေး သင်တန်းအမှတ်စဉ် (၁/၂၀၂၂) သင်တန်းဆင်းပွဲ အခမ်းအနားကို ယနေ့နံနက်ပိုင်းက မော်လမြိုင်မြို့၊ ပြည်နယ်ခန်းမ၌ ကျင်းပပြုလုပ်ရာ မွန်ပြည်နယ် ဝန်ကြီးချုပ် ဦးဇော်လင်းထွန်း၊ ပြည်နယ်ဝန်ကြီးများ၊ တာဝန်ရှိသူများ၊ မီးသတ်တပ်ဖွဲ့ဝင်များ၊ ကြက်ခြေနီအဖွဲ့များ၊ အရပ်ဘက် လူမှုကယ်ဆယ်ရေးအဖွဲ့များ၊ သင်တန်းသူ၊ သင်တန်းသားများ တက်ရောက်သည်။
အခမ်းအနားတွင် ပြည်နယ်ဝန်ကြီးချုပ်က မွန်ပြည်နယ်တွင် သဘာဝဘေးအန္တရာယ်များနှင့် အခြားဘေးအန္တရာယ်များ ဖြစ်ပွားသည်နှင့်တပြိုင်နက် ရှာဖွေကယ်ဆယ်ခြင်းလုပ်ငန်းများကို မြန်မာနိုင်ငံ မီးသတ်တပ်ဖွဲ့အပါအဝင် အရပ်ဘက်အဖွဲ့အစည်းများနှင့် တာဝန်ရှိသူများ၏ ပူးပေါင်းဆောင်ရွက်မှုဖြင့် အချိန်နှင့်တစ်ပြေးညီ ထိရောက်မြန်ဆန်စွာ ဆောင်ရွက်ပေးနိုင်ခဲ့ကြောင်း၊ ဘေးအန္တရာယ် မကျရောက်ခင် ကြိုတင်ပြင်ဆင်ခြင်း၊ လေ့ကျင့်ခြင်းတွေကို စဉ်ဆက်မပြတ်ဆောင်ရွက်ကြရာမှာ ဖြစ်သလလို ဖြစ်ပွားလာပါကလည်း အလျင်အမြန် တုံ့ပြန်ဆောင်ရွက်ခြင်းနှင့် ဆုံးရှုံးမှု နည်းပါးသည်ထက် နည်းပါးစွာ ဆောင်ရွက်ခြင်းဖြင့် ပြည်သူများရဲ့ အသက်အိုးအိမ်းစည်းစိမ်တွေကို ကာကွယ်စောင့်ရှောက်ကြရမှာ ဖြစ်ကြောင်း၊ ဘေးအန္တရာယ်ဆိုင်ရာ ကြိုတင်ကာကွယ်ခြင်း၊ ရှာဖွေကယ်ဆယ်ခြင်းနှင့် ပြန်လည်ထူထောင်ခြင်းဆိုင်ရာ လုပ်ငန်းများကို မျက်ခြေမပြတ် လေ့လာဆည်းပူးသင်ကြားပြီး ရရှိလာတဲ့ လုပ်ငန်းအတွေ့အကြုံ၊ ဗဟုသုတများကို အခြေခံကာ မိမိတို့ရပ်ရွာဒေသအတွက် ပြန်လည်အသုံးချဖို့၊ ကိုယ်စွမ်းညာဏ်စွမ်းရှိသမျှ ကာကွယ်ကူညီစောင့်ရှောက်ဖို့၊ ပြည်သူများယုံကြည်အားထားရတဲ့ စွမ်းဆောင်ရည်ပြည့်ဝသူများဖြစ်စေဖို့ တိုက်တွန်းလိုကြောင်းဖြင့် အမှာစကား ပြောကြားခဲ့သည်။
ထို့နောက် ပြည်နယ်ဝန်ကြီးချုပ်မှ သင်တန်းဆင်းလက်မှတ်များ ပေးအပ်ခဲ့ပြီး ရှာဖွေကယ်ဆယ်ရေးလုပ်ငန်းများ ဆောင်ရွက်ချက် ဗီဒီယိုမှတ်တမ်းအား ပြသခဲ့မှုအပေါ် ကြည့်ရှုအားပေးခဲ့သည်။
မွန်ပြည်နယ် ယာဉ်အန္တရာယ်၊ လမ်းအန္တရာယ်ကင်းရှင်းရေးကောင်စီ၏ (၂/ ၂ဝ၂၂) လုပ်ငန်းညှိနှိုင်း အစည်းအဝေးကို ယနေ့မွန်းလွဲပိုင်းက ပြည်နယ်အစိုးရအဖွဲ့ရုံး၊ အောင်ဆန်းခန်းမ၌ ကျင်းပပြုရာ မွန်ပြည်နယ် ဝန်ကြီးချုပ် ဦးဇော်လင်းထွန်း၊ ပြည်နယ်ဝန်ကြီးများ၊ ပြည်နယ် ယာဉ်အန္တရာယ်၊ လမ်းအန္တရာယ်ကင်းရှင်းရေးကောင်စီဝင်များ တက်ရောက်သည်။
အစည်းအဝေးတွင် ပြည်နယ်ဝန်ကြီးချုပ်က မွန်ပြည်နယ်အတွင်း ယာဉ်မတော်တဆ ထိခိုက်မှုအန္တရာယ်ကြောင့် အသက်ဆုံးရှုံးမှုများ၊ ဒဏ်ရာရမှုများ၊ ယာဉ်ကြောင့်ဖြစ်ပေါ်သော သဘာဝပတ်ဝန်းကျင် ထိခိုက်မှုများနှင့် ယာဉ်ကြောပိတ်ဆို့မှုများ မဖြစ်ပွားစေရေးအတွက် အထူးအလေးထား ဆောင်ရွက်သွားကြရမည်ဖြစ်ကြောင်း၊ လမ်းညွှန် အမှတ်အသားများ စနစ်တကျရှိစေရေးနှင့် သတ်မှတ်ထားသည့် ယာဉ်စည်းကမ်း၊ လမ်းစည်းကမ်းများအတိုင်း လိုက်နာဆောင်ရွက်ကြစေရေး ထိန်းသိမ်းကြပ်မတ်ရန် လိုကြောင်း၊ ယာဉ်အန္တရာယ်၊ လမ်းအန္တရာယ်ကင်းရှင်းရေးအဖွဲ့အဆင့်ဆင့်မှ ယာဉ်တိုက်ခိုက်မှုလျော့နည်းကျဆင်းလာစေရေးအတွက် ကြိုတင်ကာကွယ်ခြင်း၊ အသိပညာပေးခြင်း၊ စစ်ဆေးအရေးယူခြင်းများကို ဆက်စပ်ဌာနများ၊ သက်ဆိုင်ရာအဖွဲ့အစည်းများနှင့် ပူးပေါင်းပြီး အရှိန်အဟုန် မြင့်တင်ဆောင်ရွက်ကြရန် လိုကြောင်း၊ ယာဉ်မတော်တဆဖြစ်စဉ်များပေါ်မူတည်၍ မော်တော်ယာဉ်အားနည်းမှု၊ မဆင်မခြင် မောင်းနှင်မှု၊ လမ်းအခြေအနေ ချို့ယွင်းမှု အစရှိသည်ဖြင့် ဖြေရှင်းဆောင်ရွက်ရမည့် ကိစ္စရပ်များကို ဆောင်ရွက်ကြရန်နှင့် လုပ်ငန်းစီများအတိုင်း ထိရောက်အောင်မြင်အောင်စွာ အားလုံးဝိုင်းဝန်းပူးပေါင်း ဆောင်ရွက်ကြရန် မှာကြားသည်။
အဲဒီနောက် တက်ရောက်လာသူများမှ ပြည်နယ်အတွင်း ယာဉ်အန္တရာယ်၊ လမ်းအန္တရာယ်ကင်းရှင်းရေး ဆောင်ရွင်ထားရှိမှု အခြေအနေများ၊ ယာဉ်စည်းကမ်း၊ လမ်းစည်းကမ်းဆိုင်ရာ အသိပညာပေးခြင်းနှင့် အရေးယူ ဆောင်ရွက်ခြင်းဆိုင်ရာ ကိစ္စရပ်များနှင့် ပတ်သက်၍ ရှင်းလင်းတင်ပြခဲ့ကြမှုအပေါ် ပြည်နယ်ဝန်းကြီးများမှ ဖြည့်ဆွက်ဆွေးနွေး တင်ပြခဲ့ကြပြီး ပြည်နယ်ဝန်ကြီးချုပ်က လိုအပ်သည်များကို ပေါင်းစပ်ညှိနှိုင်းဆောင်ရွက်ပေးခဲ့သည်။
